Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Josué 22:1-34

LI TI ATËNË NI

  • Ruben, Gad na ndambo ti mara ti Manassé akiri na est (1-8)

  • Ala sara mbeni gbalaka na terê ti Ngu ti Jourdain (9-12)

  • Ala fa nda ti sarango gbalaka ni (13-29)

  • Kpale ni ahunzi (30-34)

22  Na pekoni, Josué airi azo ti mara ti Ruben, ti mara ti Gad nga na ti ndambo ti mara ti Manassé,  lo tene na ala: “Ala sara ye alingbi na yanga kue so Moïse, wakua ti Jéhovah, amû lani na ala+ nga ala mä yanga ti mbi na yâ ti aye kue so mbi mû yanga na ala ti sara.+  Ngbene ye kâ juska laso ala dö aita ti ala ala zia pëpe;+ ala ngbâ lakue ti sara ye alingbi na commandement so Jéhovah Nzapa ti ala amû.+  Fadeso, Jéhovah Nzapa ti ala amû ndo ti wungo terê na aita ti ala, gï tongana ti so lo mû lani zendo ni na ala.+ Ti fadeso, ala lingbi ti kiri na yâ ti atente ti ala na kodro so Moïse, wakua ti Jéhovah, amû na ala lani na mbage* ti Ngu ti Jourdain ti ga ti ala.+  Me zia ala sara kue ti sara ye alingbi na commandement ni nga na Ndia so Moïse, wakua ti Jéhovah, amû lani na ala,+ na lege so ala ndoye Jéhovah Nzapa ti ala,+ ala tambela na lege kue so lo fa na ala,+ ala sara ye alingbi na acommandement ti lo,+ ala ngbâ na terê ti lo+ na ala sara na lo+ na bê ti ala kue nga na âme* ti ala kue.” +  Na pekoni, Josué airi tënë nzoni na ndö ti ala na lo tene na ala ti gue, na ala kiri na yâ ti atente ti ala.  Na azo ti mbeni ndambo ti mara ti Manassé, Moïse amû lani na ala héritage ti ala na Basan,+ me na tanga ti azo ti ndambo ti mara ni, Josué amû na ala sese na terê ti Ngu ti Jourdain na mbage ti ouest,+ legeoko na aita ti ala. Nga, tongana Josué atene na ala ti gue na yâ ti atente ti ala, lo iri tënë nzoni na ndö ti ala  na lo tene na ala: “Ala kiri na yâ ti atente ti ala na gbâ ti aye ti mosoro, na gbâ ti anyama, na argent, na lor, na cuivre, na wen nga na gbâ ti abongo.+ Legeoko na aita ti ala, ala mû ti ala nga mbage ti akungba so ala gbu na bira na peko ti awato ti ala.”+  Na pekoni, azo ti mara ti Ruben, ti mara ti Gad nga na azo ti ndambo ti mara ti Manassé azia tanga ti azo ti Israël na Shilo, so ayeke na sese ti Canaan, ala kiri na sese ti Galaad,+ sese so a mû na ala lani ti sara kodro dä na peko ti yanga so Jéhovah amû na lege ti Moïse.+ 10  Tongana ala si nduru na Ngu ti Jourdain so ayeke na sese ti Canaan, azo ti mara ti Ruben, ti Gad nga na azo ti ndambo ti mara ti Manassé aleke mbeni kota gbalaka, gbalaka ni akono mingi, ala sara ni na terê ti Ngu ti Jourdain. 11  Na pekoni, a tene na tanga ti azo ti Israël ni,+ atene: “Bâ, azo ti mara ti Ruben, ti mara ti Gad nga na azo ti ndambo ti mara ti Manassé asara mbeni gbalaka na yanga ti sese ti Canaan na terê ti Ngu ti Jourdain na mbage ti sese ti azo ti Israël.” 12  Na ngoi so azo ti Israël amä tënë ni, ala kue abungbi na ndo oko na Shilo+ ti gue ti sara bira na ala. 13  Na pekoni, azo ti Israël atokua Phinéhas,+ molenge ti prêtre Éléazar, ti gue na mbage ti azo ti mara ti Ruben, ti mara ti Gad nga na azo ti ndambo ti mara ti Manassé so ayeke na sese ti Galaad, 14  amokonzi bale-oko ayeke na terê ti lo, mokonzi oko oko ti mara ti azo ti Israël kue, ala oko oko kue ayeke amokonzi na ndö ti ahale ti akotara ti ala na popo ti azo saki mingi na Israël.+ 15  Tongana ala si na terê ti azo ti mara ti Ruben, ti azo ti mara ti Gad nga na ti ndambo ti mara ti Manassé na sese ti Galaad, ala tene na ala: 16  “Bungbi ti azo ti Jéhovah kue atene: ‘Mara ti ye ti sioni ti nyen+ la ala sara na terê ti Nzapa ti Israël so? Ala ke Jéhovah laso na lege so ala sara mbeni gbalaka ti sara kpengba-li na Jéhovah.+ 17  Ye ti sioni so e sara lani na Péor ade alingbi na e ape? Atâa so aye ti ngangu aga lani na ndö ti bungbi ti azo ti Jéhovah, juska laso ade a sukula ni na terê ti e pëpe.+ 18  Laso ala yeke ke Jéhovah? Tongana laso ala sara kpengba-li na Jéhovah, kekereke lo yeke sara ande ngonzo na terê ti bungbi ti azo ti Israël kue.+ 19  Me tongana a yeke ngbanga ti so sese ti ala ayeke sioni, zia ala fâ ngu ala gue na ndö ti sese so ayeke ti Jéhovah,+ ndo so tabernacle ti Jéhovah ayeke dä na ala sara kodro na popo ti e.+ Me ala sara kpengba-li na Jéhovah pëpe, ala sara si a bâ e tongana azo ti kpengba-li pëpe na lege so ala sara mbeni gbalaka nde na gbalaka ti Jéhovah Nzapa ti e.+ 20  So si na ngoi so Acan+ molenge ti Zérah asara ye ague nde na yanga so a mû na ndö ti tënë ti ye so a deba ni awe so, eskê ngonzo ti Nzapa aga lani na ndö ti bungbi ti azo ti Israël kue ape?+ A yeke gï lo oko la lo kui lani ndali ti sioni so lo sara so pëpe!’”+ 21  Na mango tënë so, azo ti mara ti Ruben, ti mara ti Gad na ndambo ti mara ti Manassé, akiri tënë na amokonzi so ayeke na ndö ti azo saki mingi na Israël,+ atene: 22  “Jéhovah, Nzapa ti anzapa! Jéhovah, Nzapa ti anzapa!+ Lo hinga, azo ti Israël kue ahinga. Jéhovah, tongana e sara kpengba-li wala e ke yanga ti mo, zia mo sö e laso pëpe. 23  Tongana e leke gbalaka so ti tene e ke Jéhovah na ti tene e yâa na ndö ni asandaga so a zö ni agbi kue wala asandaga ti alê ti kobe wala asandaga ti beoko, fade Jéhovah afâ ngbanga na ndö ti e.+ 24  Me a yeke tongaso pëpe, e sara ni ndali ti mbeni ye nde, ngbanga ti so e tene na yâ ti bê ti e, e tene: ‘Mbeni lâ amolenge ti ala ayeke tene ande na amolenge ti e, atene: “Nyen la abungbi ala na Jéhovah Nzapa ti Israël nyen? 25  Jéhovah azia Ngu ti Jourdain tongana yanga ti sese na popo ti e na ala azo ti mara ti Ruben, nga na ti mara ti Gad. Mbeni ye oko abungbi ala na Jéhovah pëpe.” Na fade amolenge ti ala ayeke kanga lege na amolenge ti e ti voro* Jéhovah.’ 26  “Ni la si e tene: ‘Zia e sara kue ti leke mbeni gbalaka, a yeke ti tene e yâa pëpe na ndö ni asandaga so a zö ni agbi kue wala ambeni sandaga nde, 27  me ti tene a duti témoin na popo ti e na ala+ nga na ahale ti e na peko ti e, tongaso si e ngbâ ti sara kua ti Jéhovah na gbele lo na lege ti asandaga so a zö ni agbi kue, ambeni sandaga nga na asandaga ti beoko.+ Tongaso si mbeni lâ amolenge ti ala atene pëpe na amolenge ti e, atene: “Mbeni ye oko abungbi ala na Jéhovah pëpe.’” 28  Tongaso, e tene: ‘Tongana a si so mbeni lâ amolenge ti ala atene tënë ni so na e nga na ahale ti e, e yeke tene ande na ala, e tene: “Ala bâ gbalaka so akotara ti e asara ni ândö so la, ala sara ni akpa gbalaka ti Jéhovah, a sara ni pëpe ti tene a yâa na ndö ni asandaga so a zö ni agbi kue wala ambeni sandaga nde, me ti tene a duti mbeni témoin na popo ti e na ala.”’ 29  E pensé lâ oko pëpe ti sara kpengba-li na Jéhovah ti tene laso e ke Jéhovah+ na lege so e leke mbeni gbalaka ti yâa na ndö ni asandaga so a zö ni agbi kue, wala asandaga ti alê ti kobe wala ambeni sandaga, nde na gbalaka ti Jéhovah Nzapa ti e so ayeke na devant ti tabernacle ti lo.”+ 30  Na ngoi so prêtre Phinéhas, na amokonzi ti bungbi ti azo ni nga na amokonzi na ndö ti asewa saki mingi ti Israël so ayeke na terê ti lo amä tënë so ahale ti Ruben, ti Gad nga na ti Manassé atene, tënë ni anzere na ala.+ 31  Tongaso, Phinéhas, molenge ti prêtre Éléazar, atene na ahale ti Ruben, ti Gad nga na ti Manassé, atene: “Laso e hinga awe so Jéhovah ayeke na popo ti e, ngbanga ti so ala sara mbeni ye ti sioni tongaso na terê ti Jéhovah pëpe. Ala sö azo ti Israël na maboko ti Jéhovah awe.” 32  Na pekoni, Phinéhas, molenge ti prêtre Éléazar, nga na amokonzi ni alondo na mbage ti azo ti mara ti Ruben, ti azo ti mara ti Gad na sese ti Galaad ala kiri na sese ti Canaan, ala gue ala fa peko ti tënë ni na tanga ti azo ti Israël. 33  Tënë ni anzere na azo ti Israël. Na pekoni, azo ti Israël asepela Nzapa, na ala tene encore ape tënë ti sarango bira na azo ti mara ti Ruben na ti mara ti Gad ti futi ndo so ala sara kodro dä. 34  Tongaso, azo ti mara ti Ruben na ti mara ti Gad azia iri na ndö ti gbalaka* ni, ngbanga ti so “a yeke témoin na popo ti e so Jéhovah ayeke tâ Nzapa.”

Kete tënë

So ti tene na mbage ti est.
Na Hébreu: “ti kpe mbeto ti.”
Nda ti tënë so afa so âmanke a zia iri ti gbalaka ni témoin.