Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Josué 2:1-24

LI TI ATËNË NI

  • Josué atokua azo use ti bembe Jéricho (1-3)

  • Rahab ahonde azo ti bembengo ndo ni (4-7)

  • Yanga so a mû na Rahab (8-21a)

    • A hunda ti kanga bengba kamba na terê ti fenêtre (18)

  • Azo ti bembengo ndo ni akiri na terê ti Josué (21b-24)

2  Na pekoni, na Sittim+ Josué, molenge ti Nun, atokua azo use na hondengo ni ti gue ti bembe ndo ni. Lo tene na ala: “Ala gue na ala bâ kodro ni, mbilimbili ala bâ gbata ti Jéricho.” Tongaso, ala gue na ala si na da ti mbeni wali-ndumba so iri ti lo ayeke Rahab,+ na ala ngbâ na ndo so.  A tene na gbia ti Jéricho atene: “Bâ! ambeni koli na popo ti azo ti Israël aga ge na bï so ti bembe ndo na yâ ti kodro ni.”  Tongaso, gbia ti Jéricho atokua ndo na Rahab, atene: “Mo sigi na azo so aga na ndo ti mo so, teti ala ga ti bembe ndo na yâ ti kodro ni kue la.”  Me wali ni amû akoli use so lo honde ala. Na pekoni lo tene: “Biani, akoli ni so asi fade na ndo ti mbi ge, me mbi hinga ndo so ala londo dä pëpe.  Na ngoi so ndo avuko fade si a ga nga nduru ti kanga yanga ti gbagba ti kodro ni, akoli so asigi ala hon ti ala awe. Mbi hinga ndo so ala gue dä pëpe, me tongana ala tomba peko ti ala hio, fade ala yeke wara ala.”  (Andâ, lo honde ala na li ti da ti lo na popo ti akeke ti lin* so a leke ni na molongo na li ti da ni.)  Tongaso, akoli ni atomba peko ti ala na ndö ti lege so ague na Ngu ti Jourdain na ndo so zo alingbi ti fâ ngu ni na gere.+ Gï so ala sigi awe, a kanga yanga ti gbagba ti kodro ni na peko ti ala.  Kozo si akoli ni so alango, Rahab amonté na peko ti ala na li ti da ni.  Lo tene na ala: “Mbi hinga so Jéhovah ayeke mû kodro ni na ala,+ na mbeto ti ala agbu e ngangu.+ Mbeto ti ala ahon ndö ti azo ti kodro ni kue.+ 10  Teti so e mä tongana nyen Jéhovah asara si Ngu-Bengba ahule lani na devant ti ala na ngoi so ala sigi na Égypte,+ e mä nga tënë ti ye so ala sara lani na Sihon+ na Og,+ agbia use ti azo ti mara ti Amori so ayeke na mbage* ti Ngu ti Jourdain, agbia so ala fâ ala lani. 11  So e mä tënë ni lani, bê ti e afun kue nga ngangu ti azo ti kodro ni kue ahunzi ndali ti ala, teti Jéhovah Nzapa ti ala ayeke Nzapa na yayu kâ nga na sese ge.+ 12  Fadeso, ala deba yanga ti ala na mbi na iri ti Jéhovah, ngbanga ti so mbi fa tâ ndoye na mbage ti ala, fade ala nga ala yeke fa tâ ndoye na mbage ti afami ti mbi,* na a yeke nzoni ala fa na mbi mbeni ye so afa so ala yeke sara ye alingbi na tënë ti yanga ti ala. 13  A lingbi ala bata na fini babâ ti mbi, mama ti mbi, aita ti mbi ti koli na aita ti mbi ti wali nga na azo kue so ayeke afami ti mbi. A yeke nzoni ala bata e* na fini.”+ 14  Tongaso, akoli so atene na lo: “E yeke mû fini ti e ndali ti mo.* Tongana mo fa nda ti gango ti e so na gigi pëpe, fade e yeke fa tâ ndoye na mbage ti mo nga e yeke sara ye na mo na lege ni na ngoi so Jéhovah ayeke mû na e sese ni.” 15  Na pekoni, lo descend ala na kamba na lê ti fenêtre, ndali ti so da ti lo ni ayeke na nduzu na atingbi terê na gbagba ti kodro ni. Ndo so lo yeke lango dä ayeke na ndö ti gbagba ni.+ 16  Rahab atene na ala: “Ala gue na yâ ti ando so ahoto ayeke dä, ala honde terê ti ala kâ lango ota, tongaso si azo so ayeke tomba peko ti ala so awara ala pëpe. Na pekoni, tongana azo so atomba peko ti ala ni akiri awe, ala lingbi ti hon senge.” 17  Tongaso, akoli ni atene na lo: “Mo hunda na e fade ti deba yanga ti e na mo, e hinga biani so e yeke sara ye alingbi na ni nga tënë ayeke duti na li ti e pëpe.+ 18  Ti mo, na ngoi so e ga ande ti mû kodro ni, mo kanga bengba kamba so na terê ti fenêtre so mo descend e fade dä so. A yeke nzoni mo mû babâ ti mo, mama ti mo, aita ti mo nga na afami ti mo* kue, mo bungbi ala ndo oko na yâ ti da ti mo.+ 19  Ye oko, tongana mbeni zo asigi na yâ ti da ti mo, fade mênë ti lo ayeke gï na li ti lo, me na li ti e pëpe. Me tongana mbeni ye ti sioni asi na mbeni zo na ngoi so lo ngbâ na yâ ti da ti mo, fade ngbanga ti mênë ti lo aga na li ti e. 20  Me tongana mo fa nda ti gango ti e so na gigi,+ deba ti yanga so mo hunda fade na e so, tënë ni ayeke na li ti e pëpe.” 21  Tongaso, Rahab atene na ala: “Zia ye ni asi alingbi na tënë ti yanga ti ala.” Na pekoni, lo zia ala hon. Tongana ala hon awe, lo kanga bengba kamba ni na terê ti fenêtre ni. 22  Ala mû lege ala gue na yâ ti ando so ahoto ayeke dä na ala duti kâ lango ota juska azo so atomba peko ti ala akiri. Azo so ayeke tomba peko ti ala agi ala na ndö ti alege kue, me ala wara ala pëpe. 23  Akoli use so alondo na yâ ti ahoto ni adescend, ala fâ ngu ni na ala ga na terê ti Josué molenge ti Nun. Ala fa na lo peko ti aye kue so asi na ala. 24  Ala tene na Josué: “Jéhovah azia kodro ni kue na maboko ti e awe.+ Na mango tënë na ndö ti e, ngangu ti azo ti kodro ni kue ahunzi.”+

Kete tënë

A yeke mbeni kete keke so azo a yeke lu ni giriri. A yeke mû akamba ni so ti leke na bongo.
So ti tene na mbage ti est.
Na Hébreu: “azo ti da ti babâ ti mbi.”
Wala “âme ti e.”
Wala “Âme ti e la ayeke kui ande na place ti mo.”
Na Hébreu: “azo ti da ti babâ ti mo.”