Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Josué 18:1-28

LI TI ATËNË NI

  • A kangbi atanga ti sese ni na kodro ti Shilo (1-10)

  • Héritage ti Benjamin (11-28)

18  Na pekoni, azo ti Israël kue abungbi ndo oko na Shilo,+ na ala leke tente ti bungbi kâ,+ ndali ti so sese ni ayeke fadeso na gbe ti ala awe.+  Me na popo ti azo ti Israël, amara mbasambala ade awara héritage ti ala pëpe.  Tongaso, Josué atene na azo ti Israël, atene: “Ala yeke ku juska lawa ti gue ti mû sese so Jéhovah Nzapa ti kotara ti ala amû na ala so?”+  Ala soro akoli ota na yâ ti amara oko oko ti tene mbi tokua ala. Ala yeke gue ti tambela na yâ ti ando ni nga ti kangbi yâ ti sese ni alingbi na héritage ti mara ti ala oko oko kue. Na pekoni, a lingbi ala kiri na mbage ti mbi.  Fade ala kangbi yâ ti ando ni na ambage mbasambala.+ Azo ti Juda ayeke ngbâ na ndö ti sese ti ala na mbage ti sud,+ na ahale ti Joseph ayeke ngbâ na ndö ti sese ti ala na mbage ti nord.+  Âdu ti ala, ala kangbi yâ ti sese ni na ambage mbasambala na ala ga na ni na mbi, fade na gbele Jéhovah Nzapa ti e, mbi yeke bi mbeni ye so ayeke mû lege ti fa sese+ so a lingbi a mû na ala.  Me azo ti mara ti Lévi ayeke wara héritage na popo ti ala pëpe,+ ngbanga ti so sarango kua ti prêtre na Jéhovah si ayeke héritage ti ala.+ Ti ahale ti Gad na ti Ruben nga na ti ndambo ti mara ti Manassé,+ ala wara lani héritage ti ala na mbage ti est ti Ngu ti Jourdain awe, Moïse, wakua ti Jéhovah, la amû ni lani na ala.”  Akoli ni so aleke terê ti ala ti gue, na Josué amû yanga na ala so ayeke kangbi yâ ti sese ni so, lo tene: “Ala gue ala tambela na yâ ti ando ni kue na ala kangbi yâ ti sese ni na ala kiri na mbage ti mbi ge, na gbele Jéhovah Nzapa ti e na Shilo+ ande, mbi yeke bi mbeni ye so ayeke mû lege ti fa sese so a lingbi a mû na ala.”  Tongaso, akoli so ague, ala tambela na yâ ti ando ni kue, ala kangbi yâ ti sese ni na ambage mbasambala, ala sû iri ti agbata ni oko oko kue na yâ ti mbeni mbeti. Na pekoni ala kiri awara Josué na camp na Shilo. 10  Na pekoni, na gbele Jéhovah+ Nzapa, na Shilo, Josué abi mbeni ye so amû lege ti fa sese so a lingbi lo mû ni na ala. Na ndo so la si Josué akangbi yâ ti sese ni na azo ti Israël mara oko oko na part ti lo.+ 11  Na lege ti ye so a bi ti fa sese so a lingbi a mû na ala, mbeni sese ni atï na mbage ti Benjamin na asewa ti lo, sese ti ala ayeke na popo ti azo ti Juda+ na ti Joseph.+ 12  Na mbage ti nord, yanga ti sese ti ala alondo na Ngu ti Jourdain amonté juska na ando so ayeke na terê ti kete hoto ti Jéricho+ na mbage ti nord, a hon na yâ ti hoto so ayeke na mbage ti ouest na ague juska na désert ti Beth-Aven.+ 13  Yanga ti sese ni alondo kâ asi na Luz, na terê ti kete hoto ti Luz so ayeke na mbage ti sud, so ti tene Béthel.+ Yanga ti sese ni adescend na Ataroth-Addar+ na ndö ti hoto ni so ayeke na mbage ti sud ti Beth-Horon ti gbe ni.+ 14  Yanga ti sese ni asi na mbage ti ouest, na angoro juska nduru na mbage ti nord na hoto so abâ ndo lê na lê na Beth-Horon ti gue na mbage ti sud. A hunzi na Kiriath-Baal, so ti tene Kiriath-Jéarim,+ gbata ti mara ti Juda. So yanga ti sese ni na mbage ti ouest la. 15  Yanga ti sese ni na mbage ti sud alondo na Kiriath-Jéarim, ague na mbage ti ouest, a si na li ti Ngu ti Nephtoah.+ 16  Yanga ti sese ni adescend na gbe ti hoto so abâ ndo lê na lê na Popo-hoto ti Molenge ti Hinnom,+ so ayeke na yâ ti Popo-hoto* ti Réphaïm+ na mbage ti nord, na adescend na yâ ti Popo-Hoto ti Hinnom ni juska na kete hoto ti azo ti mara ti Jébus+ na mbage ti sud si a descend na En-Roguel.+ 17  Yanga ti sese ni asi na mbage ti nord na ague juska na En-Shémesh ti si na Guéliloth, so abâ ndo lê na lê na ndo so amonté ti gue na Adoummim+ na pekoni a descend na tênë+ ti Bohan,+ molenge ti Ruben. 18  A gue juska na kete hoto so ayeke na mbage ti nord so abâ ndo lê na lê na Arabah na pekoni a descend na Arabah. 19  Yanga ti sese ni angbâ ti gue juska na kete hoto so ayeke na nord ti Beth-Hoglah+ na ahunzi na nord ti yanga ti Kota ngu ti gbâ ti ingo,+ na yanga ti Ngu ti Jourdain na mbage ti sud. So yanga ti sese ni na mbage ti sud la. 20  Ngu ti Jourdain la ayeke yanga ti sese ni na mbage ti est. So sese ti ahale ti Benjamin alingbi na asewa ti ala oko oko kue, a lingbi na ayanga ti sese ti asese ti ala na ambage kue. 21  Agbata ti mara ti Benjamin alingbi na asewa ti ala oko oko kue, a yeke agbata tongana: Jéricho, Beth-Hoglah, Émec-Kéziz, 22  Beth-Arabah,+ Zamaraïm, Béthel,+ 23  Avvim, Parah, Ophrah, 24  Képhar-Ammoni, Ophni na Guéba;+ agbata 12 na akete kodro ni. 25  Gabaon,+ Ramah, Béeroth, 26  Mizpéh, Képhirah, Mozah, 27  Rékem, Irpéel, Taralah, 28  Zélah,+ Haéleph, Jébus, so ti tene Jérusalem,+ Guibéah+ na Kiriath; agbata 14 na akete kodro ni. So héritage ti ahale ti Benjamin, a lingbi na asewa ti ala oko oko kue la.

Kete tënë

Wala “Kpangbala ndo.”