Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Josué 17:1-18

LI TI ATËNË NI

  • Héritage ti Manassé na mbage ti ouest (1-13)

  • Ahale ti Joseph akiri awara ambeni sese na héritage (14-18)

17  Tongaso, na lege ti ye so ala bi ti mû lege na ala ti kangbi sese ni+ na azo ni, mbeni sese ni atï na mbage ti mara ti Manassé+ teti so lo yeke kozo molenge ti Joseph.+ Teti so Makir,+ kozo molenge ti Manassé, babâ ti Galaad, ayeke zo ti tiringo bira, a mû na lo Galaad na Basan.+  Ye so ala bi so asara si mbeni sese ni atï nga ndali ti tanga ti a-hale ti Manassé alingbi na asewa ti ala oko oko kue, sese ndali ti amolenge ti Abiézer,+ ti amolenge ti Hélec, ti amolenge ti Asriel, ti amolenge ti Sichem ti amolenge ti Hépher, ti amolenge ti Shémida. So ayeke ahale ti Manassé, molenge ti Joseph, amolenge ni ti koli na asewa ti ala oko oko kue la.+  Zélophéhad+ ayeke molenge ti Hépher, Hépher ayeke molenge ti Galaad, Galaad ayeke molenge ti Makir na Makir ayeke molenge ti Manassé. Me Zélophéhad adü amolenge ti koli pëpe, lo dü gi amolenge ti wali; iri ti ala ayeke: Mahlah, Noah, Hoglah, Milcah na Tirzah.  Tongaso, ala ga na gbele prêtre Éléazar,+ Josué, molenge ti Nun, nga na amokonzi, ala tene: “A yeke Jéhovah la si amû yanga lani na Moïse ti mû na e mbeni héritage na popo ti aita ti e ti koli.”+ Ni la, ti sara ye alingbi na yanga so Jéhovah amû, lo mû na ala mbeni héritage na popo ti aita ti babâ ti ala.+  Na lege ti ye so ala bi ti mû sese ni na azo ni, sese bale-oko atï na mbage ti mara ti Manassé alondo na sese ti Galaad na Basan so ayeke na mbage* ti Ngu ti Jourdain,+  ngbanga ti so amolenge ti Manassé ti wali awara lani héritage legeoko na amolenge ti lo ti koli. Sese ti Galaad ayeke ti tanga ti ahale ti Manassé.  Yanga ti sese ti mara ti Manassé akomanse na Aser ti si na Micméthath+ so abâ ndo lê na lê na Sichem+ na ahon na mbage ti sud* ti sese ti azo ti kodro ti En-Tappuah.  Sese ti Tappuah+ aga ti ahale ti Manassé, me gbata ti Tappuah so ayeke na yanga ti sese ti azo ti mara ti Manassé ayeke ti ahale ti Éphraïm.  Yanga ti sese ni adescend na Popo-hoto ti Canah, na mbage ti sud ti popo-hoto ni. Agbata ti azo ti mara ti Éphraïm ayeke na popo ti agbata ti azo ti Manassé,+ me yanga ti sese ti azo ti mara ti Manassé ayeke na mbage ti nord ti popo-hoto ni na ahunzi na ngu-ingo.+ 10  Ti gue na mbage ti sud, sese ni ayeke ti Éphraïm na ti gue na mbage ti nord, sese ni ayeke ti Manassé, na yanga ti sese ti ala ayeke ngu-ingo;+ na mbage ti nord, sese ti azo ti Manassé ague asi na Aser, na mbage ti est, sese ni ague juska na sese ti azo ti Issacar. 11  Na yâ ti sese ti Issacar na Aser, a mû na Manassé Beth-Shéan nga na agbata so ayeke na gbe ti Beth-Shéan,* Ibléam+ na agbata so ayeke na gbe ti Ibléam, azo ti Dor+ na agbata so ayeke na gbe ti Dor, azo ti En-Dor+ na agbata so ayeke na gbe ti En-Dor, azo ti Taanak+ na agbata so ayeke na gbe ti Taanak, azo ti Méguiddo na agbata so ayeke na gbe ti Méguiddo, ota ayeke ando so ayeke na ndö ti akete hoto. 12  Me ahale ti Manassé awara lege pëpe ti mû agbata ni so ti ga ti ala; azo ti Canaan angbâ gï ti sara kodro na ndö ti sese ni.+ 13  Na ngoi so azo ti Israël aga ngangu, ala gbu azo ti Canaan ti sara akua ti ngangu,+ me azo ti Israël atomba ala kue na ndö ti sese ni pëpe.+ 14  Ahale ti Joseph aga atene na Josué, atene: “Na lege ti ye so ala bi ti mû héritage na e, ngbanga ti nyen a tï gï na ndö ti sese oko+ nga ala mû na e gï mbage ti sese oko? Li ti e ayeke mingi, ngbanga ti so Jéhovah airi tënë nzoni na ndö ti e juska fadeso.”+ 15  Josué akiri tënë na ala, atene: “Tongana ala yeke mingi tongaso, ala monté na yâ ti gbako na sese ti azo ti Périzzi+ na ti azo ti Rapha,+ ala dë gbako ni ndali ti ala, teti so ando so ahoto ayeke dä na sese ti Éphraïm+ akono alingbi na ala pëpe.” 16  Tongaso, ahale ti Joseph atene na lo, atene: “Ando so ahoto ayeke dä so akono alingbi na e pëpe, nga azo ti Canaan so asara kodro na yâ ti popo-hoto* ni ayeke na apuse ti mbarata ti bira+ so a-épée ayeke na terê ti aroue ni, azo ti Beth-Shéan+ na agbata so ayeke na gbe ti Beth-Shéan* nga na azo so ayeke na Popo-hoto* ti Jizréel,+ ala kue ayeke na apuse ni so.” 17  Josué atene na ahale ti Joseph, so ti tene ahale ti Éphraïm na ti Manassé, atene: “Ala yeke mingi nga ala yeke azo ti ngangu mingi. Ala yeke wara gï sese oko pëpe,+ 18  me ando so ahoto ayeke dä so ayeke ga ti ala nga.+ Atâa so a yeke gbako, ala yeke dë ni ande, na a yeke ga yanga ti sese ti ala. Ala yeke tomba ande azo ti Canaan so ayeke kâ, atâa so ala yeke na apuse ti mbarata ti bira so a-épée ayeke na terê ti aroue ni.”+

Kete tënë

So ti tene na mbage ti est.
Na Hébreu: “na mbage ti koli.”
Wala “so angoro Beth-Shéan.”
Wala “kpangbala ndo.”
Wala “so angoro Beth-Shéan.”
Wala “Kpangbala ndo.”