Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Josué 10:1-43

LI TI ATËNË NI

  • Israël atiri ndali ti Gabaon (1-7)

  • Jéhovah atiri ndali ti Israël (8-15)

    • A tokua akota glason na ndö ti awato so akpe (11)

    • Lâ aluti (12-14)

  • A fâ agbia oku so aga ti tiri na Israël (16-28)

  • A gbu agbata so ayeke na mbage ti sud (29-43)

10  Gï so Adoni-Zédec, gbia ti Jérusalem, amä so Josué amû Aï nga lo futi gbata ni kue, na lo sara na Aï nga na gbia ni+ oko ye so lo sara lani na Jéricho nga na gbia ni,+ lo mä nga tongana nyen la azo ti Gabaon aleke tënë ti siriri na Israël+ na ala ngbâ na popo ti ala,  mbeto ahon ndö ti lo+ ndali ti so Gabaon ayeke mbeni kota gbata, tongana mbeni oko ti akota gbata so gbia ayeke na li ni. Gabaon akono mingi ahon Aï+ nga azo ti kodro ni kue ayeke angangu turugu.  Tongaso, Adoni-Zédec, gbia ti Jérusalem, atokua ndo na Hoham gbia ti Hébron,+ na Piram gbia ti Jarmuth, na Japhia gbia ti Lakish nga na Debir gbia ti Églon,+ atene:  “Ala ga, ala mû maboko na mbi e sara bira na Gabaon ngbanga ti so lo leke tënë ti siriri na Josué nga na azo ti Israël.”+  Tongaso, agbia oku ti azo ti mara ti Amori,+ so ti tene gbia ti Jérusalem, gbia ti Hébron, gbia ti Jarmuth, gbia ti Lakish nga na gbia ti Églon abungbi terê ti ala legeoko na aturugu ti ala na ala gue ala sara camp na terê ti Gabaon ti sara bira na ni.  Tongaso, azo ti Gabaon atokua ndo na Josué na camp ti Guilgal,+ ala tene: “Mo zia e angbâa ti mo pëpe.+ Ga hio mo sö e, mû maboko na e! Bâ, agbia kue ti azo ti mara ti Amori so ayeke na ando so ahoto ayeke dä abungbi terê ti ala ti sara bira na e.”  Tongaso, Josué alondo na Guilgal lo gue, lo na akoli kue so ayeke tiri bira nga na angangu turugu kue.+  Jéhovah atene na Josué: “Sara mbeto pëpe,+ teti mbi zia ala na maboko ti mo awe.+ Zo oko na popo ti ala ayeke gbu lê ni na mo pëpe.”+  Na peko ti so Josué alondo na Guilgal lo tambela na bï ni kue, lo si gï gbagburu tongaso na ndö ti ala. 10  Jéhovah abi kangbi na popo ti ala na devant ti azo ti Israël,+ azo ti Israël afâ ala mingi na épée na Gabaon, ala tomba peko ti ala na alege so amonté na Beth-Horon ala fâ ala juska na Azécah nga na Makkédah. 11  Na ngoi so ala yeke kpe na devant ti azo ti Israël si ala yeke na ndö ti lege so alondo na Beth-Horon si adescend, Jéhovah asara si akota glason so alondo na yayu atï na ndö ti ala juska na Azécah na ala kue akui. Wungo ti ala so aglason ni afâ ala ayeke mingi ahon wungo ti ala so azo ti Israël afâ ala na épée. 12  A yeke na lango ni so la Jéhovah atomba azo ti mara ti Amori na devant ti azo ti Israël, tongaso, Josué asara tënë so na Jéhovah na lê ti azo ti Israël, lo tene: “Lâ, mo luti+ na ndö ti Gabaon,+ nze, mo luti na ndö ti Popo-hoto* ti Aijalon!” 13  Tongaso, lâ aluti, na nze nga aluti juska azo ti Israël akiri peko ti sioni na awato ti ala. Eskê a sû tënë so na yâ ti mbeti ti Jashar ape?+ Na lâ angbâ ti luti na lê ti nduzu, lo lï hio pëpe juska nduru na lango oko kue. 14  Mara ti lango ni so ade ti si lâ oko pëpe, kozo na ni wala na pekoni, lango so Jéhovah amä zo tongana ti so,+ teti so Jéhovah ayeke tiri ndali ti Israël.+ 15  Na pekoni, Josué na azo ti Israël kue akiri na camp na Guilgal.+ 16  Na oko ngoi ni, agbia oku so akpe ahonde terê ti ala na yâ ti mbeni kota dû na Makkédah.+ 17  Ambeni zo aga atene na Josué, atene: “A bâ agbia oku so ala honde terê ti ala na yâ ti kota dû na Makkédah.”+ 18  Josué atene: “Ala pusu akota tênë na yanga ti kota dû ti tênë ni na ala zia ambeni zo ti bâ ndo na ndö ti ala nzoni. 19  Me ti ala, atanga ti azo ni, ala luti pëpe. Ala tomba peko ti awato ti ala na ala fâ ala so ayeke na mbage ti peko.+ Ala kanga lege na awato ti ala ni ti lï na yâ ti agbata ti ala, ndali ti so Jéhovah Nzapa ti ala azia azo so na maboko ti ala awe.” 20  Na pekoni, Josué na azo ti Israël afâ ala gbani gbani juska même ti hunzi ala kue, me ambeni oko oko so asö fini ti ala akpe ahonde terê ti ala na yâ ti agbata so angangu gbagba ayeke na terê ni. 21  Tanga ti azo ni kue akiri na siriri na terê ti Josué na camp na Makkédah. Mbeni zo ti tara ti sara tënë* na terê ti azo ti Israël ayeke dä pëpe. 22  Na pekoni, Josué atene: “Ala zi yanga ti kota dû so na ala sigi na agbia oku so na mbi.” 23  Tongaso, ala mû agbia oku so na yâ ti kota dû ni, ala ga na ala na lo. Agbia ni so ayeke: Gbia ti Jérusalem, gbia ti Hébron, gbia ti Jarmuth, gbia ti Lakish na gbia ti Églon.+ 24  Tongana ala ga na agbia so na Josué awe, lo iri akoli kue ti Israël na lo tene na amokonzi ti aturugu ni so ague fade legeoko na lo, lo tene: “Ala ga ge. Ala dö peko ti go ti agbia oku so.” Tongaso, ala ga ala dö peko ti go ti agbia ni so.+ 25  Na pekoni, Josué atene na ala, lo tene: “Ala sara mbeto pëpe nga zia si mbeto ahon ndö ti ala pëpe.+ Ala sara mbeto pëpe, ala luti tongana koli, ndali ti so a yeke ye so Jéhovah ayeke sara ande na awato ti ala kue so ayeke londo ti sara bira na ala la.”+ 26  Na pekoni, Josué adë ala na épée, lo fâ ala na lo kanga kuâ ti ala na nduzu na ndö ti akeke oku, ala ngbâ na ndö ti akeke ni juska lakui. 27  Tongana lâ alinda awe, Josué amû yanga si a zi ala na ndö ti akeke ni,+ na a bi kuâ ti ala na yâ ti kota dû so ala honde fade terê ti ala dä so. Na pekoni, a mû akota tênë akanga na yanga ti dû ni, atênë ni angbâ juska laso. 28  Josué amû kodro ti Makkédah+ na lango ni so na lo fâ azo ti kodro ni na épée. Lo fâ gbia ni nga na azo ni kue,* lo zia mbeni zo oko angbâ na fini pëpe.+ Lo sara na gbia ti Makkédah+ oko ye so lo sara lani na gbia ti Jéricho. 29  Na pekoni, Josué na azo ti Israël kue alondo na Makkédah ala gue na Libnah na ala sara bira na Libnah.+ 30  Jéhovah azia Libnah nga na gbia ni+ na maboko ti azo ti Israël, na ala sara bira na kodro ni na ala fâ azo* ti yâ ni kue na épée, ala zia zo oko angbâ na fini pëpe. Ala sara na gbia ni oko ye so ala sara lani na gbia ti Jéricho.+ 31  Josué na azo ti Israël kue alondo na Libnah ala gue na Lakish,+ ala sara camp ti ala kâ na ala sara bira na azo ti Lakish. 32  Jéhovah azia Lakish na maboko ti azo ti Israël na ala mû Lakish na use lango ni. Ala fâ azo* ti yâ ti kodro ni kue na épée+ gï tongana ti so ala sara na azo ti Libnah. 33  Na pekoni, Horam, gbia ti Guézer,+ amonté ti mû maboko na Lakish, me Josué afâ lo na azo ti lo kue juska zo oko asö kuâ pëpe. 34  Josué na azo ti Israël kue alondo na Lakish ala gue na Églon,+ ala sara camp ti ala kâ na ala sara bira na Églon. 35  Ala mû Églon na lango ni so na ala fâ azo* ti kodro ni na épée. Ala fâ azo kue so ayeke na yâ ti kodro ni na lango ni so gï tongana ti so ala sara na Lakish.+ 36  Josué na azo ti Israël kue alondo na Églon ala monté na Hébron+ na ala sara bira na Hébron. 37  Ala mû kodro ni na ala fâ azo ni, gbia ni nga na azo ti yâ ti agbata kue so angoro ni. Ala fâ azo kue* so ayeke na yâ ti kodro ni na épée, ala zia zo oko asö kuâ pëpe. Gï tongana ti so lo sara na Églon, lo futi Hébron na lo fâ azo kue* so ayeke na yâ ni. 38  Na nda ni, Josué na azo ti Israël kue akiri na mbage ti Debir+ na ala sara bira na Debir. 39  Lo mû kodro ni, gbia ni nga na agbata ni kue; lo fâ azo ni na épée, lo fâ azo kue* so ayeke na yâ ni,+ lo zia zo oko asö kuâ pëpe.+ Lo sara na Debir nga na gbia ni oko ye so lo sara na Hébron, na Libnah nga na gbia ni. 40  Josué amû akodro kue so ayeke na ando so ahoto ayeke dä, lo mû Négueb, Séphélah+ na asese so ayeke na terê ti ahoto ni, agbia ni kue, lo zia zo oko asö kuâ pëpe. Lo fâ azo ni kue,+ gï tongana ti so Jéhovah Nzapa ti Israël amû yanga lani.+ 41  Josué asö benda na ndö ti ala, alondo na Cadès-Barnéa+ juska na Gaza+ nga na akodro kue ti Goshen+ juska na Gabaon.+ 42  Josué asö benda na ndö ti agbia so kue nga lo mû akodro ti ala, lo sö benda na ndö ti ala kue gï na yâ ti ngoi oko, ngbanga ti so Jéhovah Nzapa ti Israël la ayeke tiri ndali ti Israël.+ 43  Na nda ni, Josué na azo ti Israël kue akiri na camp na Guilgal.+

Kete tënë

Wala “Kpangbala ndo.”
Na Hébreu: “ti za yanga ti lo.”
Wala “a-âme.”
Wala “a-âme.”
Wala “a-âme.”
Wala “a-âme kue.”
Wala “a-âme.”
Wala “a-âme kue.”
Wala “a-âme kue.”