Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Josué 1:1-18

LI TI ATËNË NI

  • Jéhovah akpengba Josué (1-9)

    • Diko Ndia ni na gbe ti go (8)

  • Israël aleke terê ti fâ Ngu ti Jourdain (10-18)

1  Na peko ti kuâ ti Moïse wakua ti Jéhovah, Jéhovah atene na Josué,*+ molenge ti Nun, wakua+ ti Moïse, lo tene:  “Wakua ti mbi Moïse akui awe,+ londo fadeso mo fâ Ngu ti Jourdain, mo na azo so kue, na ala gue na kodro so mbi yeke mû na ala, azo ti Israël.+  Fade mbi mû na ala ando kue so ala yeke zia gere ti ala dä, tongana ti so mbi mû zendo ni lani na Moïse.+  Sese ti ala ayeke londo na benyama ti si na Liban juska na kota Ngu ti Euphrate (sese kue so ayeke ti azo ti mara ti Heth)+ ti si na Kota Ngu-ingo* so ayeke na mbage ti ouest.*+  Na ngoi kue so mo ngbâ na fini, mbeni zo ayeke gbu ande lê ni na mo pëpe.+ Mbi yeke na mo ande gï tongana ti so mbi yeke lani na Moïse.+ Mbi yeke dö mo ti zia pëpe wala mbi yeke zia mo oko pëpe.+  Sara ye na mbeto pëpe, luti tongana koli,+ ndali ti so mo la mo yeke gue na azo so ti mû kodro ni ti tene aga héritage ti ala, tongana ti so mbi deba yanga ti mbi lani na akotara ti ala ti mû ni na ala.+  “Sara ye na mbeto pëpe, luti biani tongana koli, zia lê ti mo akpengba ti sara ye alingbi na andia kue so wakua ti mbi Moïse afa lani na mo. Mo hon nde na ni pëpe, atâa na mbage ti koli wala na mbage ti wali,+ tongaso si mo sara ye na ndara na ndo kue so mo yeke gue dä.+  A yeke nzoni mbeti ti Ndia so ahon yongoro na yanga ti mo pëpe,+ a lingbi mo diko ni bï na lâ na gbe ti go,* zia si lê ti mo akpengba ti sara ye alingbi na atënë kue so a sû na yâ ni;+ na sarango tongaso fade lege ti mo ayeke ga nzoni na mo yeke sara ye na ndara.+  Mbi londo ti mû yanga na mo ape? Sara ye na mbeto pëpe, luti tongana koli. Zia mbeto asara mo pëpe nga zia si terê ti mo adö pëpe, ndali ti so mbi, Jéhovah Nzapa ti mo, mbi yeke na mo na ndo kue so mo yeke gue dä.”+ 10  Na pekoni, Josué amû yanga na amokonzi ti aturugu ni, lo tene: 11  “Ala hon na yâ ti camp ni ala mû yanga na azo ni, ala tene: ‘Ala leke akobe ti ala ti lege biani, ndali ti so na yâ ti lango ota ala yeke fâ Ngu ti Jourdain ti gue ti mû kodro so Jéhovah Nzapa ti ala amû na ala ti ga ti ala.’”+ 12  Josué atene na azo ti mara ti Ruben, ti Gad nga na ndambo ti mara ti Manassé, atene: 13  “Ala dabe ti ala na yanga so Moïse, wakua ti Jéhovah, amû lani na ala,+ atene: ‘Jéhovah Nzapa ayeke mû na ala lege ti wu terê ti ala, nga lo mû sese so na ala awe. 14  Fade awali ti ala, amolenge ti ala na anyama ti ala ayeke sara kodro na ndö ti sese so Moïse amû ni lani na ala na mbage* ti Ngu ti Jourdain ge.+ Me ti ala kue so ayeke angangu turugu,+ fade ala fâ ngu ni ala hon kozo na aita ti ala, ala leke terê ti ala ti sara bira.+ A yeke nzoni ala mû maboko na ala 15  juska Jéhovah amû lege na aita ti ala ti wu terê tongana ti so lo sara na ala so, si aita ti ala awara nga sese so Jéhovah Nzapa ti ala ayeke mû ni ande na ala. Na pekoni, fade ala kiri na ndö ti sese so a mû na ala, sese so Moïse, wakua ti Jéhovah, amû lani na ala na mbage ti est ti Ngu ti Jourdain.’”+ 16  Ala tene na Josué, atene: “E yeke sara aye kue so mo mû yanga na e ti sara, nga e yeke gue na ando kue so mo tokua e dä.+ 17  Tongana ti so e mä lani yanga ti Moïse na yâ ti aye kue, fade e yeke mä yanga ti mo nga. Zia si Jéhovah Nzapa ti mo aduti na mo tongana ti so lo duti lani na Moïse.+ 18  Me zo kue so asara kpengba-li na mo na lo mä yanga ti mo pëpe, a yeke fâ ande lo.+ Ye oko, sara mbeto pëpe, luti tongana koli.”+

Kete tënë

Nda ti iri ni aye ti tene “Jéhovah ayeke salut.”
So ti tene Méditerranée.
Na Hébreu: “na mbage so lâ alinda dä.”
Wala “mo gbu li ti mo dä.”
So ti tene na mbage ti est.