Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 8:1-22

LI TI ATËNË NI

  • Juda asoro ti sara ye so azo kue ayeke sara (1-7)

  • Sân tënë ti yanga ti Jéhovah, ndara ayeke dä? (8-17)

  • Jérémie atoto ndali ti futingo ti Juda (18-22)

    • “Baume ayeke na kodro ti Galaad pëpe?” (22)

8  Jéhovah atene: “Na ngoi ni so, abio ti agbia ti Juda, abio ti amokonzi ni, abio ti aprêtre ni, abio ti aprophète ni na abio ti azo ti kodro ti Jérusalem, fade azo ahasa ni na yâ ti adû ti kuâ ti ala ti sigi na ni.  A yeke tanda abio ti ala ni na lê ti lâ, na lê ti nze, na lê ti gbâ ti aye kue so ayeke na yayu, aye so ala ndoye ni lani, so ala sara kua na ni, so ala mû peko ni, so ala gi ni gingo nga so ala voro ni.+ A yeke ro ande abio ti ala pëpe nga a yeke lu ni pëpe. Ala yeke ga tongana puru ti anyama na lê ti sese ni.”+  “Na ando kue so mbi yeke kangbi ala dä, fade tanga ti azo ti sioni mara ni so asö kuâ so ayeke soro ti kui ahon ti tene ala ngbâ na fini,” tënë ti yanga ti Jéhovah ti aturugu la.  “Fade mo tene na ala: ‘Bâ tënë so Jéhovah atene la: “Tongana ala tï, ala yeke kiri ande ti londo ape? Tongana mbeni zo achangé lege ti lo, fade mba ti lo nga achangé ape?   Ngbanga ti nyen la si azo ti Jérusalem so ake yanga aye lakue ti ngbâ ti ke yanga ti gue na ni? Ala gbu tënë ti handango zo ngangu; Ala ke ti kiri na mbi.+   Mbi dengi mê ti mbi, mbi ngbâ ti mä ala, me fason so ala yeke sara na tënë ayeke na lege ni pëpe. Zo oko achangé bê ti lo pëpe ndali ti sioni so lo sara, wala lo hunda ndo pëpe, lo tene: ‘Nyen la mbi yeke sara so?’+ Azo oko oko kue angbâ ti sara aye so azo kue ayeke sara, legeoko tongana mbarata so akpe hio ti lï na yâ ti bira.   Même cigogne* so ayeke huru na nduzu, lo hinga ngoi so lo yeke londo ti gue na mbeni ndo nde. Kolokoto na hirondelle nga na ndeke so a iri lo grive* ahinga ngoi ti kiringo ti ala. Me azo ti mbi ahinga ngoi ti fango ngbanga ti Jéhovah pëpe.”’+   ‘A sara tongana nyen si ala tene: “E yeke na ndara mingi, e yeke na ndia* ti Jéhovah”? Ndali ti so a mû keke-mbeti+ ti mvene ti awakuasu a sû gï na atënë ti mvene.   A bi kamene na lê ti zo ti ndara.+ Mbeto ahon ndö ti ala na fade a gbu ala. Bâ! Ala ke tënë ti Jéhovah awe, ndara ti nyen la ala yeke na ni nyen? 10  Ni la mbi yeke mû awali ti ala ti mû na ambeni koli nde, ayaka ti ala nga kue ayeke ga ti ambeni zo nde.+ Ngbanga ti so ti londo na asenge zo ti si na akota zo, zo oko oko kue ayeke wara ye na lege ti likisi.+ Ti londo na aprophète ti si na aprêtre, zo oko oko kue ayeke sara ye ti nzi.+ 11  Ala tara ti kaï vundu* ti molenge-wali ti azo ti mbi gï kete, ala yeke tene: “Siriri ayeke dä! Siriri ayeke dä!” Andâ siriri oko ayeke dä pëpe.+ 12  Aye ti sioni so ala sara so, eskê kamene asara ala la? Kamene oko asara ala pëpe! Ala hinga nga pëpe wala kamene ni ayeke sara ka zo tongana nyen!+ Ni la ala yeke tï ande na popo ti azo so atï ti ala awe. Na ngoi so mbi yeke ga ti punir ala, ala yeke pika gere ti ala,’+ tënë ti yanga ti Jéhovah la. 13  ‘Tongana mbi bungbi ala, fade mbi yeke futi ala kue,’ tënë ti yanga ti Jéhovah la. ‘Mbeni lê ti vigne ayeke ngbâ ande na yâ ti keke ti vigne pëpe, lê ti figue nga ayeke ngbâ na yâ ti keke ni pëpe, fade akugbe ni ahule. Ye so mbi mû lani na ala so, a yeke hon na maboko ti ala.’” 14  “E yeke duti ge ngbanga ti nyen? Zia e bungbi terê ti e na e lï na yâ ti agbata so angangu gbagba ayeke na terê ni+ na e kui kâ. Ndali ti so Jéhovah Nzapa ti e ayeke fâ e, lo yeke mû na e ngu so a zia sioni yorö dä ti tene e nyon ni,+ ngbanga ti so e sara siokpari na terê ti Jéhovah. 15  E yeke ku siriri ti tene aga, me ye ti nzoni oko tongaso aga pëpe, e yeke ku ngoi ti tene a sava e, me gï kota mbeto la ayeke dä.+ 16  A mä toto ti ambarata ti lo na mbage ti Dan. So akoli-mbarata ti lo ayeke dekongo, sese kue ayengi. Ala yeke ga ti futi kodro ni nga na aye kue so ayeke na yâ ni, gbata ni nga na azo so alango na yâ ti gbata ni.” 17  “Bâ, mbi yeke tokua angbo na popo ti ala. Asioni ngbo so zo alingbi ti handa ala pëpe. Ti tâ tënë ni angbo ni so ayeke dë ala,” tënë ti yanga ti Jéhovah la. 18  Zo alingbi ti kaï vundu ti mbi pëpe; bê ti mbi ayeke na kobela. 19  Mbi mä toto ti mbeni zo so ahunda ti tene a mû maboko na lo, mbi mä toto ti molenge-wali ti azo ti mbi: “Jéhovah ayeke na Sion ape? Wala gbia ti Sion ayeke na yâ ti kodro ti Sion ape?” “Ngbanga ti nyen la ala sara si bê ti mbi ason ndali ti ayanda so ala leke ni na kode? Ala sara si bê ti mbi ason ndali ti asenge senge nzapa ti awande ngbanga ti nyen?” 20  “Ngoi ti kongo alê ti kobe ahon awe, ngoi ti maïngo ti akobe ti yaka ahunzi awe, me ade a sö e pëpe.” 21  Vundu so asi na molenge-wali ti azo ti mbi so ason bê ti mbi mingi,+ vundu ahon ndö ti mbi. Mbeto agbu mbi. 22  Baume* ayeke na kodro ti Galaad ape?+ Mbeni zo ti kaïngo kobela* ayeke kâ ape?+ Terê ti molenge-wali ti azo ti mbi akaï pëpe ngbanga ti nyen?+

Kete tënë

A yeke mbeni ndeke so lo kono, gere ti lo ayo nga lo ye mingi ti tambela na yâ ti popoto na terê ti ngu.
A lingbi nga ti tene “grue,” mbeni kota ndeke so gere ti lo ayo mingi.
Wala “fango ye.”
Wala “bio ti terê so akungbi.”
Wala “Baume so asara si songo ti ye adë.”
wala “wanganga.”