Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 7:1-34

LI TI ATËNË NI

  • Confiance ti mvene na yâ ti temple ti Jéhovah (1-11)

  • Temple ni ayeke ga tongana Shilo (12-15)

  • Nzapa ake vorongo lo so azo avoro lo gï tongaso (16-34)

    • A voro “Gbia-wali ti yayu” (18)

    • A mû amolenge na sandaga na Hinnom (31)

7  Bâ tënë so Jéhovah atene na Jérémie la, lo tene:  “Mo luti na yanga ti gbagba ti da ti Jéhovah na mo to mbela na tënë so, mo tene: ‘Ala azo ti Juda kue so ayeke lï na yanga ti gbagba so ti kuku na gbe ti Jéhovah, ala mä tënë ti yanga ti Jéhovah.  Jéhovah ti aturugu, Nzapa ti Israël, atene: “Ala changé sarango ye ti terê ti ala nga na aye so ala yeke sara so, na mbi yeke zia ala ti ngbâ ti duti na ndo so.+  Ala zia bê ti ala pëpe na ndö ti atënë ti handa so atene: ‘So* temple ti Jéhovah la, temple ti Jéhovah la, temple ti Jéhovah la!’+  Tongana biani ala changé sarango ye ti terê ti ala nga na aye so ala yeke sara; tongana tënë ayeke na popo ti azo use na ala fâ ngbanga ti ala mbilimbili;+  tongana ala sara pasi pëpe na awande, na anyindu,* na awali-mua;+ tongana ala tuku na ndo so pëpe mênë ti zo so tënë ayeke na li ti lo pëpe; nga tongana ala mû peko ti ambeni nzapa nde pëpe, ti tene ala wara sioni na pekoni;+  tongaso, mbi yeke zia si ala ngbâ ti duti na ndo so, na kodro so mbi mû ni lani na akotara ti ala kpu na kpu.”’”*  “Me ala zia bê ti ala na ndö ti atënë ti handa,+ na a yeke ga na ala ye ti nzoni oko pëpe.  Ala lingbi ti gue ti nzi,+ ti fâ zo, ti gi wali wala koli nde, ti deba yanga ti ala na tënë ti wataka,+ ti mû asandaga* na Baal+ nga ti gue na peko ti anzapa so ala hinga ni kozo pëpe, 10  si na pekoni awe ala ga ti luti na devant ti mbi na yâ ti da so iri ti mbi ayeke na ndö ni so? na ala tene: ‘A yeke sö e ande’ atâa aye kue ti sioni so ala sara so? 11  Da so iri ti mbi ayeke na ndö ni so, ala bâ ni tongana kota dû ti azo ti gbungo aye ti azo na ngangu?+ Mbi wani mbi bâ ni awe,” tënë ti yanga ti Jéhovah la. 12  “‘Ye oko, ala gue fadeso na Shilo,+ ndo so mbi zia lani iri ti mbi na ndö ni kozo so,+ na ala bâ ye so lani mbi sara na ni ndali ti ye ti sioni so azo ti mbi Israël asara.+ 13  Me ala ngbâ ti sara aye ti sioni so kue atâa so mbi sara tënë na ala fani mingi,* na ala mä mbi pëpe.+ Mbi ngbâ lakue ti iri ala, me ala kiri tënë na mbi pëpe,’ tënë ti yanga ti Jéhovah la.+ 14  ‘Tongaso, oko ye so mbi sara lani na Shilo+ la mbi yeke sara na da so iri ti mbi+ ayeke na ndö ni so, da so ala yeke zia bê ti ala kue na ndö ni;+ mbi yeke sara tongaso nga na ndo so mbi mû ni lani na ala nga na akotara ti ala. 15  Mbi yeke tomba ala ande na lê ti mbi legeoko tongana ti so mbi tomba lani aita ti ala, ahale ti Éphraïm kue.’+ 16  “Ti mo, mbi ye ti tene mo sambela ngbanga ti azo so pëpe. Mo toto, mo sambela wala mo voro terê ti mo na mbi ndali ti ala pëpe,+ ngbanga ti so mbi yeke mä mo ande pëpe.+ 17  Ye so ala yeke sara na yâ ti agbata ti Juda nga na ndö ti alege ti Jérusalem so, mo bâ ni ape? 18  Amolenge ni aro keke, ababâ ni atingo wâ, amama ni amë farine ti tene a sara na gâteau ti mû na Gbia-wali ti yayu,*+ na ala yeke tuku sämba na sandaga na ambeni nzapa nde, ala sara tongaso ti son bê ti mbi.+ 19  ‘Me mbi la ala yeke sara sioni na mbi so?* Ên-ën, ala yeke sara sioni gï na ala wani, ti bi kamene na lê ti ala, ni la ape?’ Tënë ti yanga ti Jéhovah la.+ 20  Tongaso, Jéhovah, Seigneur ti dunia kue, atene: ‘Bâ! Mbi yeke tuku ande ngonzo ti mbi na ndo so,+ na ndö ti azo, anyama, akeke ti yaka nga na alê ti kobe ti sese. Ngonzo ti mbi ayeke gbi ye tongana wâ na ayeke mingo pëpe.’+ 21  “Bâ tënë so Jéhovah ti aturugu, Nzapa ti Israël, atene la: ‘Ala gue amû anyama ti asandaga ti ala so a zö ni agbi kue so ala bungbi ni na ambeni sandaga ti ala ni, na ala wani ala te anyama ni.+ 22  Ngbanga ti so na lango so mbi sigi lani na akotara ti ala na kodro ti Égypte, mbi sara tënë lani na ala pëpe, wala mbi mû yanga lani na ala pëpe na ndö ti tënë ti sandaga ti anyama so a zö ni agbi kue nga na ambeni sandaga.+ 23  Me yanga so mbi mû lani na ala ayeke so: “Ala mä yanga ti mbi, mbi yeke ga Nzapa ti ala, na ala yeke ga azo ti mbi.+ Ala doit ti sara ye kue alingbi na yanga so mbi mû na ala so, si ye aga nzoni na ala.”’+ 24  Me ala mä mbi lani pëpe wala ala dengi mê na tënë ti mbi pëpe.+ Ahon ti tene ala mä mbi, ala sara gï ye ti li* ti ala wani, li ti ala akpengba ti mû peko ti asioni ye so ayeke na yâ ti bê ti ala,+ ala tourné peko ti ala na mbi, me lê ti ala pëpe, 25  ti londo na lango so akotara ti ala asigi na kodro ti Égypte juska laso.+ Mbi ngbâ ti tokua awakua ti mbi aprophète na mbage ti ala, mbi tokua ala lango oko oko, fani mingi.*+ 26  Me ala ke ti mä mbi, ala ye ti dengi mê ti ala na tënë ti mbi pëpe.+ Ahon ti dengi mê ti ala na tënë ti mbi, li ti ala akpengba na ala sara sioni mingi ahon akotara ti ala. 27  “Mo yeke sara tënë so kue na ala,+ me ala yeke mä mo pëpe. Mo yeke iri ala, me ala yeke yeda ande pëpe. 28  Mo yeke tene ande na ala mo tene: ‘Ala yeke mara so amä yanga ti Jéhovah Nzapa ti ala pëpe, ala ke ti tene a fa lege na ala. Sarango ye na lege ni akui ti lo awe, a di même iri ni nga na popo ti ala pëpe.’+ 29  “Kpaka yongoro kuä ti li ti mo so na mo bi ni ayo; nga na ndö ti akete hoto so li ni ayeke senge senge mo he bia ti vundu,* ndali ti so Jéhovah ake azo ti ngoi ni so, so ason bê ti lo so awe, lo yeke dö ala lo zia. 30  ‘Azo ti Juda asara ye so ayeke sioni na lê ti mbi, ala zia afungo yanda ti ala na yâ ti da so iri ti mbi ayeke na ndö ni so, ala sara si da ni aga sioni,’ tënë ti yanga ti Jéhovah la.+ 31  ‘Ala leke ambeni ndo na li ti hoto ti Topheth so ayeke na yâ ti Popo-hoto ti Molenge ti Hinnom,+ ti gbi amolenge ti ala ti koli na ti wali dä,+ mbeni ye so mbi mû yanga na ala ti sara ni pëpe nga bê ti mbi atï même na ndö ti ye tongaso lâ oko pëpe.’+ 32  “Jéhovah atene: ‘Ndali ti tënë so, bâ, ngoi ayeke ga, so a yeke iri ande ndo so Topheth encore ape wala Popo-hoto ti Molenge ti Hinnom* encore ape me a yeke iri ni Popo-hoto ti Fango gbâ ti azo. Ala yeke lu azo ande na Topheth juska ndo ti lungo azo ayeke dä pëpe.+ 33  Kuâ ti azo ni so ayeke ga ande kobe ti andeke ti nduzu na ti anyama ti ngonda, na zo ti tomba ala na terê ni ayeke dä pëpe.+ 34  Mbi yeke sara si dekongo ti ngia nga na dekongo ti nzerengo terê ahunzi, a yeke mä pëpe go ti koli so amû wali fini fini wala go ti wali so amû koli fini fini,+ na yâ ti agbata ti Juda nga na ndö ti alege ti Jérusalem, ndali ti so a yeke futi kodro ni kue.’”+

Kete tënë

Na Hébreu: “Ala yeke,” a ye ti sara tënë ti ada ni kue so ayeke na yâ ti gbagba ni.
Wala “amolenge so babâ ti ala ayeke dä pëpe.”
Wala “lakue lakue.”
Wala “asandaga so a zö ni si guru ni amonté na nduzu.”
Na Hébreu: “mbi londo hio ti sara tënë na ala.”
Iri so a mû na mbeni nzapa-wali so azo ti Israël so ake Nzapa awe ayeke voro lo lani. Âmanke mbeni nzapa so azo abâ lo atene lo yeke nzapa so ayeke sara si azo adü gbani.
Wala “son bê ti mbi so; zia ngonzo na bê ti mbi so.”
Wala “ala mû peko ti wango.”
Na Hébreu: “lango oko oko mbi londo hio na ndapre, mbi yeke tokua ala.”
Wala “bia ti totongo kuâ.”