Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 50:1-46

LI TI ATËNË NI

  • Prophétie na terê ti Babylone (1-46)

    • Sigi na yâ ti Babylone (8)

    • A yeke kiri na Israël na kodro ti lo (17-19)

    • A yeke hule ngu ti Babylone ande (38)

    • A yeke sara kodro na yâ ti Babylone encore ape (39, 40)

50  Tënë so Jéhovah atene na ndö ti Babylone,+ na ndö ti kodro ti azo ti Chaldée na lege ti prophète Jérémie, ayeke so:   “Ala fa tënë so na popo ti amara nga ala to mbela na ni. Ala lu mbeni yongoro keke ti fa lege ni na azo, nga ala to mbela na ni. Ala honde mbeni ye oko pëpe. Ala tene: ‘A mû Babylone awe.+ A bi kamene na lê ti Bel* awe.+ Mbeto ahon ndö ti Mérodak. A bi kamene na lê ti ayanda ti Babylone awe. Mbeto ahon ndö ti afungo yanda* ti lo awe.’   Ngbanga ti so mbeni mara alondo na mbage ti nord aga na ndö ti lo.+ Mara ni so asara si kodro ti lo aga mbeni ye so amû mbeto na zo. Zo oko ayeke sara kodro dä pëpe. Azo na anyama kue akpe; ala kpe ahon awe.”  Jéhovah atene: “Na alango ni so, nga na ngoi ni so, azo ti Israël nga na azo ti Juda ayeke ga ande legeoko.+ Ala yeke tambela na toto na yanga ti ala,+ na ala yeke bungbi oko ti gi Jéhovah Nzapa ti ala.+  Ala yeke hunda lege ti guengo na Sion, na lê ti ala ayeke bâ ndo gï na mbage ti Sion,+ ala tene: ‘Ala ga, zia e na ala kue e bungbi oko na Jéhovah na yâ ti mbele so ayeke ngbâ lakue lakue so a yeke girisa ni ande pëpe.’+  Azo ti mbi aga tongana gbâ ti ataba so agirisa.+ Aberger ti ala wani la asara si ala girisa lege so.+ Ala hon na ala kirikiri na ndö ti ahoto, ala londo na li ti akota hoto ala si na li ti akete hoto. Ala girisa ndo so ala yeke lango dä.  Azo kue so awara ala ate ala,+ na awato ti ala atene: ‘Tënë oko ayeke na li ti e pëpe ngbanga ti so ala sara siokpari ti ke Jéhovah, ti ke lo so ayeke ndo ti duti ti mbilimbili nga lo so lo yeke beku ti akotara ti ala, so ti tene Jéhovah.’”   “Ala kpe ala sigi na yâ ti Babylone, ala sigi na kodro ti azo ti Chaldée,+ ala ga tongana akoli-taba so ayeke tambela na li ti kundu ti anyama ni.   Ndali ti so mbi yeke sara si ambeni mara alondo aga na terê ti Babylone, mbeni bungbi ti amara so ayeke ngangu mingi ayeke londo na mbage ti nord ti ga.+ Ala yeke ga na terê ti Babylone ti sara bira na lo; Kâ la si a yeke mû ande Babylone. Alê ti kokora ti ala ayeke tongana alê ti kokora ti mbeni zo ti bira, na a yeke fâ amolenge na maboko ti ababâ na amama ti ala;+ alê ti kokora ni ayeke kiri senge pëpe. 10  Kodro ti Chaldée ayeke ga ande tongana ye so a gbu na peko ti bira.+ Azo so kue ayeke mû aye ni na yâ ni, ala yeke wara ye alingbi na ala,”+ tënë ti yanga ti Jéhovah la. 11  “Ngbanga ti so terê ti ala angbâ ti nzere,+ ala ngbâ ti duti na ngia na ngoi so ala yeke mû aye na yâ ti kodro so ayeke héritage ti mbi so.+ Ndali ti so ala ngbâ ti huru* tongana kete wali-bagara na yâ ti pere, nga ala ngbâ ti dekongo tongana akoli-mbarata. 12  A bi kamene na lê ti mama ti ala awe.+ Vundu ahon ndö ti wali so adü ala. Bâ, lo la lo yeke kete mingi na popo ti amara kue, lo yeke tongana mbeni benyama so ngu ayeke dä pëpe nga mbeni désert.+ 13  Ndali ti so bê ti Jéhovah ason, zo ayeke lango na yâ ti kodro ni pëpe;+ lo yeke ga ande mbeni kodro so abuba kue awe.+ Azo kue so ayeke hon na terê ti Babylone, mbeto ayeke sara ala mingi na bango kodro ni, ala yeke hûru yanga ti ala ngbanga ti aye ti ngangu kue so asi na lo so.+ 14  Ala, azo kue so ahinga ti gboto kokora, ala ga na terê ti Babylone ti sara bira na lo mbage na mbage kue. Ala pika lo na kokora, ala zia mbeni lê ti kokora ni angbâ pëpe,+ ndali ti so lo sara siokpari ti ke Jéhovah awe.+ 15  Ala dekongo ti bira na ndö ti lo mbage na mbage kue. Lo yôro maboko ti lo na nduzu ti zia terê ti lo na tïtî wato. Apilier ti lo atï nga agbagba ni atuku na sese awe.+ Ndali ti so a yeke Jéhovah la si ayeke kiri na lo peko ti sioni so lo sara.+ Ala kiri na lo peko ti sioni so lo sara so. Ala sara na lo gï oko ye so lo sara lani.+ 16  Ala zi na kodro ti Babylone zo kue so ayeke lu alê ti kobe. Ala zi nga zo so ayeke fâ lê ti kobe na zembe na ngoi ti kongo alê ti kobe.+ Ngbanga ti sioni épée, zo oko oko ayeke kiri na popo ti azo ti kodro ti lo. Zo oko oko ayeke kpe ti kiri na kodro ti lo wani.+ 17  “Azo ti Israël ayeke tongana ataba so agirisa awe.+ Abamara akangbi ala kirikiri.+ Kozoni gbia ti Assyrie la ate ala,+ na pekoni, Nébucadnezzar, gbia ti Babylone, akungbi yâ ti abio ti ala na pembe ti lo.+ 18  Tongaso, Jéhovah ti aturugu, Nzapa ti Israël, atene: ‘Bâ mbi yeke sara na gbia ti Babylone nga na kodro ti lo gï oko ye so mbi sara lani na gbia ti Assyrie.+ 19  Na mbi yeke mû Israël ande ti kiri na lo na ndo ti tengo pere ti lo,+ na lo yeke te pere na ndö ti Hoto ti Carmel na ti Basan,+ na ndö ti ahoto ti Éphraïm+ na Galaad+ juska yâ ti lo asi.’” 20  Jéhovah atene: “Na alango ni so, na ngoi ni kâ, a yeke gi peko ti sioni so Israël asara, me a yeke wara mbeni oko tongaso pëpe, nga a yeke wara siokpari ti Juda pëpe, ndali ti so mbi yeke pardonné ala so mbi zia si ala ngbâ so.”+ 21  “Mo monté na terê ti kodro ti Mérathaïm nga na terê ti azo ti kodro ti Pécod.+ Mo fâ azo gbani gbani na mo hunzi ala kue,” tënë ti yanga ti Jéhovah la. “Ye kue so mbi mû yanga na mo ti sara, mo sara ni. 22  A mä dekongo ti azo so ayeke sara bira na yâ ti kodro ni, mbeni kota futingo ye. 23  Marteau so ayeke neka amara kue ti sese, bâ tongana nyen la a kungbi yâ ti lo nga a neka lo!+ Bâ tongana nyen la Babylone aga mbeni ye so amû mbeto na azo na popo ti amara!+ 24  Mo Babylone, mbi leke mbeni kûkû ndali ti mo, na kûkû ni agbu mo awe, na mo hinga lani ye oko dä pëpe. A wara mo awe nga a gbu mo awe,+ ndali ti so a yeke Jéhovah la mo sara kpengba-li na lo. 25  Jéhovah azi yanga ti da so lo bata aye ti bira ti lo dä, lo mû aye ti bira ti ngonzo ti lo lo sigi na ni.+ Ndali ti so, Seigneur ti dunia kue, Jéhovah ti aturugu, ayeke na mbeni kua ti sara na sese ti azo ti Chaldée. 26  Ala so ayeke na ando so ayeke yongoro, ala ga na terê ti lo.+ Ala zi yanga ti agogoro ti lo.+ Ala bungbi aye ti lo na ndö ti terê tongana gbâ ti alê ti kobe la a bungbi ni. Ala futi lo biani biani.+ Zia mbeni zo ti lo oko angbâ pëpe. 27  Ala fâ akoli-bagara ti lo kue so akono awe.+ Zia a gue na ala na ndo ti fango ala. Mawa na ala, ndali ti so lango ti ala asi awe, ngoi ti tene a punir ala. 28  A mä go ti ala so ayeke kpe, ala so alondo na kodro ti Babylone si ayeke kpe ti gue ti fa na Sion so Jéhovah Nzapa ti e akiri na azo ti Babylone peko ti sioni so ala sara lani, lo kiri na ala peko ti sioni so ala sara na temple ti lo.+ 29  Ala iri azo ti pikango kokora ti ga na terê ti Babylone, ala so ahinga ti gboto kokora.+ Ala ga ala ngoro gbata ni kue, ala zia zo oko akpe pëpe. Ala kiri na lo peko ti aye so lo sara.+ Ala sara na lo gï oko ye so lo sara lani.+ Ndali ti so lo sara ye na fandara ti ke Jéhovah, ti ke Nzapa ti Israël so ayeke nzoni-kue.+ 30  Ni la, amaseka-koli ti lo ayeke tï ti kui na akota place ti yâ ti gbata ni,+ aturugu ni kue ayeke kui na lango ni so,” tënë ti yanga ti Jéhovah la. 31  “Mo so, mo zo ti kpengba-li so,+ bâ, mbi yeke ga na terê ti mo,”+ tënë ti yanga ti Jéhovah ti aturugu, Seigneur ti dunia kue, la, “ndali ti so lango ti mo ayeke ga ande, ngoi so mbi yeke punir ande mo, 32  mo zo ti kpengba-li so, mo yeke pika gere ti mo ande na mo yeke tï, zo ti yô mo na nduzu ayeke duti dä pëpe.+ Mbi yeke bi ande wâ na terê ti agbata ti mo, na wâ ni ayeke gbi aye kue so ayeke na terê ti mo.” 33  Bâ tënë so Jéhovah ti aturugu atene la: “A sara pasi na azo ti Israël nga na azo ti Juda, azo kue so agbu ala na ngbâa angbâ ti bata ala.+ Ala ke ti zi ala ti tene ala gue.+ 34  Me Lo so lo yeke na droit ti futa ye ti zi ala so, lo yeke ngangu mingi.+ Iri ti lo ayeke Jéhovah ti aturugu.+ Lo yeke bâ si a fâ ngbanga ti ala na lege ni,+ ti sara si sese ni awu terê ti lo,+ nga si azo ti Babylone aduti kpô pëpe.”+ 35  “Épée ayeke ga na terê ti azo ti Chaldée,” tënë ti yanga ti Jéhovah la, “épée ni ayeke ga na terê ti azo ti Babylone, na terê ti amokonzi ni nga na terê ti awandara ti kodro ni.+ 36  Épée ayeke ga na terê ti azo so ayeke diko tënë senge senge* na ala yeke sara ande ye ti buba. Épée ayeke ga na terê ti angangu zo ti bira ti lo, na mbeto ayeke hon ndö ti ala.+ 37  Épée ayeke ga na terê ti ambarata ti ala nga na terê ti apuse ti mbarata ti ala ti bira, a yeke ga na terê ti amara nde nde kue so ayeke na popo ti azo ti lo, na ala yeke ga tongana awali.+ Épée ayeke ga na terê ti amosoro ti lo na a yeke mû ni ande ti hon na ni.+ 38  Ye ti ngangu ayeke ga na ndö ti angu ti gbata ni, na a yeke hule ande,+ ndali ti so kodro ni ayeke kodro ti ayanda so a leke ni na kode;+ nga ndali ti avision ti ala ni so amû mbeto na zo, ala ngbâ ti sara ye mo bâ mo tene azo so ye asara li ti ala. 39  Tongaso, anyama ti désert ayeke sara kodro dä legeoko na anyama so aye ti dekongo mingi, a-autruche* nga ayeke sara kodro kâ.+ Azo ayeke sara kodro na yâ ti Babylone encore ape, na yâ ti angoi nde nde kue, zo ayeke sara kodro dä pëpe.”+ 40  “Gï tongana ti so a futi lani Sodome na Gomorrhe+ nga na akete gbata so ayeke na terê ni,”+ Jéhovah atene: “Zo oko ayeke sara ande kodro kâ pëpe, nga zo oko ayeke duti ande kâ pëpe.+ 41  Bâ, ambeni zo alondo na mbage ti nord ayeke ga; mbeni kota mara nga na akota gbia+ ayeke londo na ambage ti sese so ayeke yongoro kâ, ti ga.+ 42  Ala gbu kokora nga na likongo.+ Ala yeke sioni mingi, ala yeke sara ande nzoni bê na zo pëpe.+ Na ngoi so ala yeke kpe na ambarata ti ala, go ni ayeke toto tongana totongo ti ngu-ingo,+ ala leke terê ti ala tongana zo oko, ti sara bira na mo, molenge-wali ti Babylone.+ 43  Tongana gbia ti Babylone amä sango ti ala,+ ngangu ti lo kue ahunzi.+ Vundu agbu lo na lo bâ pasi tongana pasi ti mbeni wali so angbâ ti dü molenge. 44  “Bâ, legeoko tongana mbeni bamara so asigi na yâ ti gbako so aserré si ayeke na terê ti Ngu ti Jourdain, mbeni zo ayeke londo ande ti ga na terê ti ando ti tengo pere ti anyama so a bata ni nzoni, me mbi yeke sara si ala kpe yongoro na sese ti lo. Mbi yeke soro mbeni zo ti zia lo na ndö ti lo.+ Ngbanga ti so zo wa la ayeke tongana mbi zo wa? Zo wa la alingbi ti gue na mbi na devant ti ngbanga zo wa? Berger wa la alingbi ti luti na devant ti mbi?+ 45  Tongaso, azo, ala mä tënë ti ye so Jéhovah apensé ti sara na terê ti Babylone+ nga tënë ti ye so lo bi bê ti lo ti sara na terê ti kodro ti azo ti Chaldée: Ti tâ tënë ni, a yeke gbu ande akete taba ti kundu ni ti hon na ni. Ngbanga ti azo ti kodro so, lo yeke sara si ndo so akete taba so asara kodro dä aga mbeni ndo so abuba kue awe.+ 46  Na mango bruit ti mungo Babylone, sese ayeke yengi, na a yeke mä ande mbeni dekongo na popo ti amara.”+

Kete tënë

Mbeni nzapa ti azo ti Babylone.
Tënë ti Hébreu ni ge aye peut-être ti gue oko na mbeni tënë so aye ti tene “puru.” Zo ayeke tene tënë ni so na terê ti mbeni ye ti fa so lo ke ye ni bê oko.
Wala “ti pika li ti gere ti ala na sese.”
Wala “aprophète ti wataka.”
Wala “anaamo,” mbeni kota ndeke.