Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 5:1-31

LI TI ATËNË NI

  • Azo ake sengo ndo ti Jéhovah (1-13)

  • A yeke futi ala, me a yeke hunzi ala kue kue kue ape (14-19)

  • Jéhovah ahunda azo ni ndali ti aye so ala sara so (20-31)

5  Ala tambela na ndö ti alege ti Jérusalem. Ala bâ ndo, ala hunda azo ala bâ. Ala gi ndo na yâ ti ando so azo ayeke gue ka dä mingi, wala ala yeke wara mbeni zo so ayeke sara ye ti mbilimbili,+ mbeni zo so ayeke sara ye na lege ni, tongana ala wara mbeni zo tongaso, mbi yeke pardonné gbata ni.   Même tongana ala tene: “Ti tâ tënë ni so Jéhovah ayeke na fini!” andâ a yeke gï dengo bä ti mvene.+   Jéhovah, ye so mo yeke gi na mbage ti zo a yeke ti tene zo asara ye lakue na lege ni, ni la ape?+ Mo pika ala, me a sara ye oko na ala pëpe.* Mo ye ti hunzi ala kue kue kue, me ala ke ti yeda na wango ti mo.+ Ala sara si li ti ala akpengba ahon tênë,+ na ala ke ti kiri na mbage ti mo.+   Me mbi tene na bê ti mbi, mbi tene: “Ti tâ tënë ni, azo so ayeke asenge zo. Ala sara ye ti buba, ndali ti so ala hinga pëpe ye so Jéhovah aye, ala hinga tënë ti ndia ti Nzapa ti ala pëpe.   Mbi yeke gue ande na mbage ti akota zo ni na mbi yeke sara tënë na ala ndali ti so ala la adoit fade ti hinga ye so Jéhovah aye, ala hinga andia ti Nzapa ti ala.+ Me ala nga kue, ala fâ yâ ti joug ti ala ni, ala fâ yâ ti kamba so abungbi ala na Nzapa.”   Ndani la si bamara ti gbako agbu ala, mbo ti kpangbala ndo ti désert angbâ ti futi ala, zen ayeke lango na sese ti ku ala na terê ti agbata ti ala. azo kue so alondo na yâ ti agbata ni ti sigi, a yeke suru yâ ti ala kete kete. Ndali ti so akengo ndia ti ala ayeke mingi; aye so ala sara ti ke Nzapa ayeke gbani gbani.+   Mbi yeke pardonné ti so ni so tongana nyen? Amolenge ti ala ake mbi awe, ala deba na iri ti ye so ayeke nga Nzapa pëpe.+ Mbi mû lani na ala aye so kue ala yeke na bezoin ni, me ala ngbâ lakue ti gi awali nde, ala kungbi ti gue na da ti wali-ndumba.   Ala yeke tongana akoli-mbarata so nzara ti wali ahon ndö ti ala. Ala oko oko kue ayeke dekongo na peko ti awali ti amba ti ala.+   Jéhovah atene: “Mbi yeke hunda ande ala ndali ti aye so ala sara so ape? Mbi wani mbi yeke kiri ande peko ti sioni na mara tongaso ape?”+ 10  “Ala monté ala buba ayaka ti vigne ti lo so ayeke na terê ti ahoto, me ala buba ni kue kue kue pëpe.+ Ala fâ akete maboko ti keke ti vigne ti lo so angbâ ti sigi, ndali ti so a yeke ti Jéhovah pëpe. 11  Azo ti mara ti Israël na azo ti mara ti Juda ahanda tâ mbi,” tënë ti yanga ti Jéhovah la.+ 12  “Ala tene so ala hinga Jéhovah pëpe, na ala yeke tene: ‘Lo yeke sara ande ye oko pëpe.*+ Ye ti sioni oko ayeke si na e pëpe, bira wala nzara ayeke si ande na e pëpe.’+ 13  Aprophète ayeke tene gï asenge tënë,* tënë ti Nzapa ayeke na ala pëpe. Zia si ye tongaso asi na ala!” 14  Bâ tënë so Jéhovah, Nzapa ti aturugu, atene la: “Ngbanga ti tënë so azo so atene, bâ, mbi yeke sara si tënë ti mbi aga tongana wâ na yanga ti mo,+ nga azo so ayeke tongana keke, na wâ ni ayeke gbi ala.”+ 15  Jéhovah atene: “Bâ, mbi yeke mû mbeni mara so alondo na yongoro ndo ti ga na lo na ndö ti ala, azo ti Israël.+ A yeke mbeni mara so aninga awe. A yeke mbeni ngbene mara, mbeni mara so ala azo ti Israël ahinga yanga ti kodro ti azo ni pëpe, mbeni mara so ala lingbi ti mä yâ ti atënë so azo ni ayeke tene pëpe.+ 16  Bozo ti kokora ti azo ti mara so ayeke tongana dû ti kuâ so yanga ni akanga pëpe. Ala kue ayeke azo ti tiringo bira. 17  Ala yeke te alê ti kobe ti mo na mapa* ti mo kue ahunzi.+ Ala yeke fâ amolenge ti mo ti koli na amolenge ti mo ti wali kue ahunzi. Ala yeke te ataba ti mo nga na abagara ti mo kue ahunzi. Ala yeke te alê ti keke ti vigne ti mo nga na alê ti keke ti figue ti mo kue ahunzi. Agbata ti mo so angangu gbagba ayeke na terê ni, agbata so mo zia bê ti mo kue na ndö ni so, ala yeke futi ni na épée.” 18  Jéhovah atene: “Même na angoi ni so, mbi yeke fâ ala kue kue kue pëpe.+ 19  Tongana ala hunda ndo, atene: ‘Jéhovah Nzapa ti e asara aye so kue so na e ngbanga ti nyen?’ Mo kiri tënë na ala, mo tene: ‘A yeke ndali ti so ala dö mbi azia ti voro mbeni nzapa nde na yâ ti kodro ti ala, ndani la ala nga ala yeke gue ti sara kua na awande na yâ ti mbeni kodro so ayeke ti ala pëpe.’”+ 20  Fa tënë so na azo ti mara ti Jacob, to mbela na ni na yâ ti Juda, mo tene: 21  “Ala abuba zo so, ala so li ti ala ayeke dä pëpe so,* ala mä tënë so si:+ Ala yeke na lê me ala lingbi ti bâ ndo pëpe;+ Ala yeke na mê me ala lingbi ti mä ndo pëpe.+ 22  Jéhovah atene: ‘Ala sara mbeto ti mbi pëpe? Ala dö na mbeto na devant ti mbi pëpe? A yeke mbi la mbi zia mbutu tongana katikati so akanga lege na ngu-ingo, ndia ni so ayeke ngbâ lakue, na ngu-ingo alingbi ti hon nde na ni pëpe. Même amapo ni alondo na nduzu tongana nyen, a lingbi ti hon katikati so pëpe; atâa amapo ni adekongo ngangu tongana nyen, kue gbä a lingbi ti hon na ndö ni pëpe.+ 23  Me li ti azo so akpengba, nga bê ti ala aye ti mä tënë pëpe; ala gboto terê ti ala na ala hon.+ 24  Na yâ ti bê ti ala kâ ala tene pëpe: “Ti fadeso zia e sara mbeto ti Jéhovah Nzapa ti e, Lo so Lo mû na e ngu-nzapa tâ na ngoi ni, akozo ngu-nzapa nga na atanga ti ngu-nzapa, Lo so Lo sara kue si e yeke na angoi* ti kongo alê ti kobe ti yaka.”+ 25  Sioni ti ala wani la akanga lege ti aye so kue; siokpari ti ala wani la asara si ala wara aye ti nzoni pëpe.+ 26  Ndali ti so azo ti sioni ayeke na popo ti azo ti mbi. Ala yeke gi ye lakue, tongana ti zo ti gbungo andeke so alango na sese ti ku andeke ni. Ala leke akûkû ti sara na sioni. Na a yeke azo la ala gbu na kûkû ni. 27  Legeoko tongana sakpa so andeke asi singo na yâ ni, da ti ala asi singo na tënë ti handango zo.+ Ndani la ala ga azo ti ngangu nga azo ti mosoro. 28  Ala kono ngangu, na poro ti terê ti ala aza pendere; Sarango ye ti sioni ahon ndö ti ala. Molenge so babâ ti lo ayeke dä pëpe, ala fâ ngbanga ti lo na lege ni pëpe,+ si ala lingbi ti bâ nzoni na pekoni. Ala ke ti fâ ngbanga ti wayere na lege ti mbilimbili.’”+ 29  Jéhovah atene: “Mbi yeke hunda ande ala ndali ti aye so ala sara so ape? Mbi wani mbi yeke kiri ande peko ti sioni na mara tongaso ape?” 30  Mbeni ye so asara si bê ti zo adö nga so ayeke sioni mingi asi na yâ ti kodro ni: 31  Aprophète ayeke tene aprophétie ti mvene,+ aprêtre amû komandema ti ala ti sara na mokonzi na ndö ti azo. Azo ti mbi aye asarango ye ni so mingi.+ Me ala yeke sara ande nyen na ngoi so nda ni ayeke si?”

Kete tënë

Na Hébreu: “ala woko oko pëpe.”
A lingbi nga ti tene “Lo yeke dä pëpe.”
Na Hébreu: “Pupu asi yâ ti ala.”
“Ngoi na ngoi tongana Bible ayeke sara tënë ti mapa andâ a ye ti sara tënë ti kobe.”
Na Hébreu: “ala abuba zo so ala yeke na bê pëpe so.”
Na Hébreu: “Lo so Lo fa ayenga.”