Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 31:1-40

LI TI ATËNË NI

  • Tanga ti Israël so angbâ ayeke kiri ti sara kodro na Israël (1-30)

    • Rachel atoto ndali ti amolenge ti lo (15)

  • Fini mbele (31-40)

31  Jéhovah atene: “Na ngoi ni so, mbi yeke ga ande Nzapa ti amara kue ti Israël, na ala yeke ga azo ti mbi.”+   Bâ tënë so Jéhovah atene la: “Na yâ ti benyama, Nzapa asara nzoni bê na azo so asö kuâ na lê ti épée, na ngoi so azo ti Israël ayeke tambela lani ti gue na ndo ti wungo terê ti ala.”   Jéhovah asi na mbi na ndo so ayeke yongoro kâ na lo tene na mbi, lo tene: “Mbi ndoye mo na mbeni ndoye so angbâ lakue lakue. Ndani la, tâ ndoye apusu mbi ti gboto mo na mbage ti mbi.+   Mbi yeke kiri ti leke mo na nduzu, a yeke kiri ti leke mo na nduzu.+ Israël, mo so mo yeke tongana maseka-wali so ade ti hinga koli pëpe, mo yeke kiri ti mû tambourin ti mo ti gue ti dodo na ngia.*+   Mo yeke kiri ande ti lu avigne na li ti ahoto ti Samarie.+ Azo ti lungo avigne ni ayeke te lengo ni.+   Ngbanga ti so ngoi ayeke ga so asinziri so ayeke na li ti ahoto ti Éphraïm ayeke dekongo, atene: ‘Ala londo, zia e monté na Sion, kâ na Jéhovah Nzapa ti e.’”+   Ndali ti so Jéhovah atene: “Na ngia, ala dekongo na Jacob. Ala dekongo na ngia ngbanga ti so ala yeke na ndö ti amara.+ Ala to mbela na ni, ala sepela Nzapa ala tene: ‘Jéhovah, mo sö azo ti mo, tanga ti azo ti Israël so angbâ.’+   Mbi yeke mû ala na yâ ti kodro so ayeke na mbage ti nord ti kiri na ala.+ Mbi yeke mû ala na ando so ayeke na ambage ti sese so ayeke yongoro kâ ti bungbi ala.+ Na popo ti ala, a yeke wara ande azo so lê ti ala abuba nga na ala so gere ti ala abuba,+ mama ti ngo nga na wali so angbâ ti dü, mbi yeke bungbi ala kue oko. Ala kue ayeke kiri na ndo so ge tongana mbeni kota congrégation.+   Ala yeke ga ande na toto na yanga ti ala.+ Mbi yeke fa lege na ala na ngoi so ala yeke voro yanga na mbi ti tene mbi sara nzoni bê na ala. Mbi yeke fa lege na ala ti gue na ala na terê ti ngu so angbâ ti sua,+ na mbeni kpangbala ndo so ala lingbi ti pika gere ti ala na ye oko pëpe. Ngbanga ti so mbi yeke Babâ ti Israël, na Éphraïm ayeke kozo molenge ti mbi.”+ 10  Ala, azo ti amara nde, ala mä tënë ti Jéhovah, ala to mbela na ni na yâ ti azoa* so ayeke yongoro kâ,+ ala tene: “Lo so akangbi azo ti Israël lani kirikiri so, lo yeke bungbi ala ande ndo oko. Lo yeke bâ ndo ande na ndö ti ala, tongana ti so mbeni berger abâ ndo na ndö ti ataba ti lo.+ 11  Ndali ti so Jéhovah ayeke futa ande mbeni ye ti zi na Jacob,+ lo zi Jacob na maboko ti zo so ayeke ngangu mingi ahon Jacob.+ 12  Ala yeke ga ande, na ala yeke dekongo na ngia na ndö ti Hoto ti Sion.+ Lê ti ala ayeke duti na ngia ndali ti nzoni bê ti Jéhovah, ndali ti alê ti kobe, ndali ti fini vin+ nga ndali ti mafuta, ndali ti akete taba, angasa nga na abagara ti ala.+ Ala yeke ga ande tongana mbeni yaka so ngu apika dä nzoni,+ ala yeke kiri ti bâ pasi encore ape.”+ 13  “Na ngoi ni so, maseka-wali so ade ti hinga koli pëpe ayeke dodo na ngia, legeoko na amaseka-koli nga na ambakoro.+ Mbi yeke sara si vundu ti ala achangé aga ngia.+ Mbi yeke dë bê ti ala, na mbi yeke sara si ala duti na ngia me na vundu pëpe.+ 14  Mbi yeke sara ande si aprêtre* awara gbâ ti ye* alingbi na ala, mbi yeke sara nzoni bê mingi na azo ti mbi,”+ tënë ti yanga ti Jéhovah la. 15  “Bâ tënë so Jéhovah atene la: ‘A mä mbeni go na Ramah,+ go ti zo so ayeke toto na vundu nga so lo toto ngangu mingi: Rachel la ayeke toto ndali ti amolenge ti lo so.+ Lo ke ti tene a dë bê ti lo ndali ti amolenge ti lo ni, ngbanga ti so ala yeke dä encore ape.’”+ 16  Bâ tënë so Jéhovah atene la: “‘Mo kaï toto ni na zia ngu ti lê ayuru na lê ti mo pëpe, ngbanga ti so mo yeke wara futa ndali ti kua so mo sara,’ tënë ti yanga ti Jéhovah la. ‘Ala yeke londo ande na kodro ti awato ti ala ti kiri.’+ 17  Jéhovah atene: ‘Mbeni ye ti nzoni ndali ti gigi ti mo ti kekereke ayeke dä,+ amolenge ti mo ayeke kiri ande na ndö ti sese ti ala wani.’”+ 18  “Biani, mbi mä dema ti Éphraïm so lo tene: ‘Mo kiri na mbi na nzoni lege, si mbi kiri na nzoni lege, legeoko tongana kete bagara so ade a fa na lo pëpe ti yô joug. Kiri na mbi na mbage ti mo, na mbi yeke duti ande nduru ti kiri, ndali ti so mo yeke Jéhovah Nzapa ti mbi. 19  Ndali ti so na peko ti so mbi kiri na mo awe, mbi ke siokpari ti mbi.+ Na peko ti so mo sara si li ti mbi aga dä, mbi pika ndö ti cuisse ti mbi ti fa vundu ti mbi. Kamene agbu lê ti mbi nga li ti mbi ane+ ndali ti aye so mbi sara lani na ngoi so mbi de maseka.’” 20  “Eskê mbi bâ Éphraïm na nene ni ape? lo yeke molenge so mbi ye lo mingi ape?+ Atâa so fani mingi mbi sara tënë na terê ti lo, mbi yeke dabe ti mbi lakue na lo. Ndani la mbi ngbâ ti ye lo mingi na yâ ti bê ti mbi kâ.+ Biani, mbi yeke bâ ande mawa ti lo,” tënë ti yanga ti Jéhovah la.+ 21  “Mo zia ambeni pilier ti tênë na terê ti lege ndali ti mo, mo lu ayongoro keke ti fa lege na mo.+ Mo bâ kota lege ni nzoni si, lege so mo yeke gue dä.+ Mo Israël, so mo yeke tongana molenge-wali so ade ti hinga koli pëpe, mo kiri na yâ ti agbata ti mo. 22  Mo molenge-wali ti Sion so mo yeke be-ta-zo ape so, mo yeke fono ande kirikiri juska lawa? Ndali ti so Jéhovah asara mbeni fini ye na ndö ti sese: Mbeni wali la ayeke dö terê ti kpe na peko ti mbeni koli.” 23  Bâ tënë so Jéhovah ti aturugu, Nzapa ti Israël, atene la: “Na ngoi so mbi yeke bungbi azo ti ala so ayeke angbâa ti kiri na ala na ndo so, azo ti sese ti Juda nga na azo ti agbata ni ayeke kiri ti tene tënë so: ‘Mo, ndo ti duti so ayeke mbilimbili,+ mo, hoto so ayeke nzoni-kue,+ zia Jéhovah airi tënë nzoni na ndö ti mo.’ 24  Azo ayeke sara ande kodro na yâ ti Juda nga na yâ ti agbata ni kue, azo ti fango yaka nga na aberger so ayeke fa lege na ataba ayeke sara ande kodro ndo oko.+ 25  Ndali ti so mbi yeke mû ngangu na zo* so afatigué awe, na mbi yeke sara si azo* kue so abâ pasi awara ngia.”+ 26  Na ndö ti tënë so, mbi londo, mbi zi lê ti mbi me lango ti mbi ni anzere fade na mbi mingi. 27  Jéhovah atene: “Bâ, angoi ayeke ga so mbi yeke sara si azo ti mara ti Israël na azo ti mara ti Juda awu mingi. Mbi yeke sara nga si anyama ti ala awu mingi.”+ 28  “Legeoko tongana ti so mbi bâ ndo lani na ndö ti ala si mbi gboto gunda ti ala, mbi kungbi ala na sese, mbi dë ala na sese, mbi futi ala nga mbi sara sioni na ala so,+ mbi yeke bâ ndo na ndö ti ala ti leke ala na nduzu nga ti lu ala tongana keke,”+ tënë ti yanga ti Jéhovah la. 29  “Na alango ni so, ala yeke tene encore ape, atene: ‘Ababâ ni ate akpikpii lê ti vigne, me pembe ti amolenge ni la akui.’+ 30  Me ti fadeso zo oko oko ayeke kui ndali ti sioni ti lo wani. Zo so ate kpikpii lê ti vigne, pembe ti lo wani la ayeke kui ande.” 31  Jéhovah atene: “Bâ, alango ayeke ga so mbi yeke te ande mbeni fini mbele+ na azo ti da ti Israël nga na azo ti da ti Juda. 32  Mbele ni so ayeke duti pëpe tongana ti so mbi te lani na akotara ti ala na lango so mbi gbu maboko ti ala ti sigi na ala na kodro ti Égypte,+ ‘mbele ti mbi so ala fâ yâ ni lani awe+ atâa so mbi la mbi yeke lani wa* ti ala,’ tënë ti yanga ti Jéhovah la.” 33  Jéhovah atene: “Mbele so mbi yeke te ande na azo ti Israël na peko ti alango ni so ayeke duti tongaso: Mbi yeke zia ndia ti mbi tâ na yâ ti ala,+ nga mbi yeke sû ni na ndö ti bê ti ala.+ Mbi yeke ga Nzapa ti ala, na ala yeke ga azo ti mbi.”+ 34  “Ala yeke fa ande ye encore ape na amba ti ala nga na aita ti ala, atene: ‘Hinga Jéhovah!’+ ndali ti so ala kue ayeke hinga ande mbi, ti londo na asenge zo ti si na akota zo na popo ti ala,”+ tënë ti yanga ti Jéhovah la. “Ngbanga ti so mbi yeke pardonné sioni ti ala nga mbi yeke dabe ti mbi na siokpari ti ala encore ape.”+ 35  Bâ tënë so Jéhovah atene la, lo so lo sara lâ ti tene atokua lumière na kota lâ, lo so lo sara ndia ndali ti nze nga ndali ti atongoro ti tene ala za lumière na bï, lo so asara si ngu-ingo alondo na nduzu nga si amapo ni atoto, lo so iri ti lo ayeke Jéhovah ti aturugu atene:+ 36  “‘A yeke gï tongana andia so atï na ngu si a lingbi ti fâ ahale ti Israël na ala ngbâ ti duti mbeni mara pëpe na gbele mbi lakue lakue,’ tënë ti yanga ti Jéhovah la.”+ 37  Bâ tënë so Jéhovah atene la: “‘Mbi lingbi ti ke ahale ti Israël kue ndali ti aye kue so ala sara gï tongana mbeni zo alingbi ti mû mesure ti yayu so ayeke na nduzu wala ti hinga ye na ndö ti gere ti sese so ayeke na gbe ni si,’ tënë ti yanga ti Jéhovah la.”+ 38  Jéhovah atene: “Bâ, alango ayeke ga so a yeke kiri ande ti leke gbata so+ na Jéhovah, a komanse na tour ti Hananel+ juska na yanga ti gbagba so a iri ni Yanga-ti-gbagba-ti-Coin.+ 39  Kamba ti mungo na mesure ni+ ayeke londo ague droit juska na kete hoto ti Gareb, na a yeke ngoro ande ti si na Goah. 40  Apopo-hoto* kue ti akuâ na ti mburu ti wâ, ayaka so ague juska na Popo-hoto ti Cédron,+ juska na coin ti Yanga-ti-gbagba-ti-ambarata+ ti gue na mbage ti est, a yeke duti ande ando so a zia ni nde ndali ti Jéhovah.+ A yeke gboto gunda ni wala a yeke kiri ti kungbi ni lâ oko pëpe.”

Kete tënë

Wala “ti gue ti dodo na popo ti azo so ayeke he ngia.”
A ye ti sara tënë ti asese so ayeke na milieu ti ngu.
Wala “âme ti aprêtre.”
Na Hébreu: “mafuta.”
Wala “âme.”
Wala “âme.”
A lingbi nga ti tene “koli.”
Wala “Akpangbala ndo.”