Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 3:1-25

LI TI ATËNË NI

  • Israël atï tâ ngangu na yâ ti sarango ye ti a-apostat (1-5)

  • Israël na Juda asara ndumba (6-11)

  • A hunda ti tene ala changé bê ti ala (12-25)

3  Azo ayeke hunda ka, atene: “Tongana mbeni koli atomba wali ti lo si wali ni ague amû mbeni koli nde, lo yeke kiri ti mû wali ni so?” Kodro ni so aga sioni mingi awe ape?+ “Na yâ ti sarango ndumba ti mo, mo gi akoli mingi,+ so kue mo ye ti kiri na da ti mbi?” Tënë ti yanga ti Jéhovah la.   “Bâ ndo na nduzu na li ti ahoto so ndö ni ayeke senge senge, mo bâ. Ndo wa la si akoli agbu mo na ngangu si alango na mo dä pëpe? Mo duti na terê ti lege ti ku ala, tongana ti zo so aduti ndo oko ape,* so lo yeke na yâ ti benyama. Mo ngbâ ti sara si kodro ni aga sioni, ndali ti sarango ndumba ti mo nga ndali ti aye ti sioni so mo yeke sara.+   Ndani la si lege ti ngu-nzapa akanga,+ tanga ti ngu-nzapa ake ti pika. * ti mo aza tongana ti wali-ndumba, kamene agbu lê ti mo oko pëpe.+   Me ti fadeso mo dekongo na mbi, mo tene: ‘Babâ ti mbi, na ngoi so mbi de maseka, mo la mo yeke kota kamarade ti mbi.+   Mbeni zo ayeke ngbâ ti bata tënë na bê ti lo kpu na kpu? Wala bê ti lo ayeke son gï lakue?’ Bâ tënë so mo tene la, me mo ngbâ lakue ti sara aye ti sioni kue so mo lingbi ti sara ni.”+  Na ngoi ti Gbia Josias,+ Jéhovah atene na mbi: “‘Mo bâ aye ti sioni so Israël so ayeke be-ta-zo ape so asara? Lo monté na ndö ti ayongoro hoto nga lo gue na gbe ti akeke kue so kugbe ni ayeke mingi, ti sara ndumba.+  Na peko ti aye kue so lo sara so, lakue mbi ngbâ ti tene na lo ti kiri na mbi,+ me lo kiri pëpe. Ti Juda, lo yeke bâ gï ye so ita ti lo ni ayeke sara so na lê; ita ti lo ti wali so ayeke sara ye na handa.+  Na ngoi so mbi bâ aye so Israël asara, so lo yeke bata terê ti lo ndali ti koli ti lo pëpe, mbi tomba Israël na mbi mû na lo mbeti ti divorce,+ ndali ti so lo gi ambeni koli nde.+ Me Juda, ita ti lo ti wali so ayeke sara ye na handa so, asara mbeto pëpe. Lo nga kue lo gue lo sara ndumba.+  Lo* bâ sarango ndumba ti lo ni tongana kete ye, na lo ngbâ ti sara si kodro ni aga sioni na lege so lo yeke sara lango-sioni na atênë nga na akeke.+ 10  Atâa so kue, Juda, ita ti lo ti wali so ayeke sara ye na handa, akiri na mbi na bê ti lo kue pëpe, me na bê use,’ tënë ti yanga ti Jéhovah la.” 11  Tongaso, Jéhovah atene na mbi: “Israël, lo so lo yeke gi koli nde so, abâ terê ti lo* so lo yeke nzoni mingi ahon Juda so ayeke sara ye na handa.+ 12  Mo gue mo to mbela na mbage ti nord, mo tene:+ ‘Jéhovah atene:+ “Israël zo ti kpengba-li, mo kiri na mbi, mbi yeke bâ mo ande na ngonzo pëpe*+ ndali ti so mbi yeke be-ta-zo, mbi yeke bata tënë na bê ti mbi lakue lakue pëpe,” tënë ti yanga ti Jéhovah la. 13  “Gï ye oko so mbi hunda na mo, yeda na siokpari so mo sara, ndali ti so mo sara kpengba-li na Jéhovah Nzapa ti mo. Mo ngbâ lakue ti kpe na ando nde nde na peko ti awande* na gbe ti akeke kue so kugbe ni ayeke mingi, na mo yeke mä yanga ti mbi pëpe,” tënë ti yanga ti Jéhovah la.’ 14  Jéhovah atene: “Ala amolenge ti kpengba-li so, ala kiri na mbi ma! Mbi la mbi yeke biani wa ti ala. Mbi yeke mû ala, zo oko na yâ ti gbata oko nga zo use na yâ ti mara oko, na mbi yeke ga na ala na Sion.+ 15  Mbi yeke mû na ala aberger.+ Aberger ni ayeke bata ala na lege ti hingango ndo nga na ndara.” 16  Jéhovah atene: “Na ngoi ni so ala yeke ga gbani gbani na ala yeke dü mingi na yâ ti kodro ni.+ Ala yeke tene ande encore ape, atene: ‘Aï! Sanduku ti mbele ti Jéhovah!’ Bê ti zo ayeke tï na ndö ni pëpe, ala yeke dabe ti ala na ni pëpe wala ala yeke sara vundu ndali ni pëpe nga ala yeke kiri ti leke ni encore ape. 17  Na ngoi ni so, ala yeke iri Jérusalem, atene, ‘trône ti Jéhovah’.+ Amara nde nde kue ayeke ga ti bungbi terê ti ala na Jérusalem ti sepela iri ti Jéhovah,+ na ala yeke zia ti sara ye kue so bê ti ala so ayeke sioni apusu ala ti sara.” 18  “Na angoi ni so, ala yeke tambela legeoko, azo ti mara ti Juda na terê ti azo ti mara ti Israël,+ ala kue ayeke londo na kodro so ayeke na mbage ti nord ti ga na sese so mbi mû lani na akotara ti ala tongana héritage.+ 19  Na bê ti mbi, mbi tene: ‘Aï! A nzere tâ na mbi ti zia mo na popo ti amolenge ti mbi si mbi mû na mo pendere kodro, so ayeke tâ nzoni mingi ahon akodro kue na popo ti amara!’*+ Mbi tene nga na bê ti mbi, mbi tene mo yeke iri mbi mo tene: ‘Babâ ti mbi!’ na mo yeke tourné peko ti mo na mbi pëpe. 20  ‘Ti tâ tënë ni, legeoko tongana ti wali so asara ye na handa si lo zia koli ti lo ti gue na peko ti mbeni koli nde, ala nga kue, azo ti Israël, ala sara ye na handa na mbage ti mbi,’+ tënë ti yanga ti Jéhovah la.” 21  A mä go ti azo na ndö ti ahoto so li ni ayeke senge senge, azo ti Israël la ayeke toto nga ala yeke dema terê ti ala so, ndali ti so ala sara si lege ti ala abuba awe. Ala girisa Jéhovah Nzapa ti ala awe.+ 22  “Ala amolenge ti kpengba-li so, ala kiri na mbi ma! Mbi yeke sara si kpengba-li ti ala ni ahunzi.”+ “Bâ e la! E yeke kiri na mbage ti mo, ngbanga ti so mo Jéhovah, mo yeke Nzapa ti e.+ 23  Biani, e handa terê ti e tongana e sara wusuwusu na li ti akete hoto nga na ahoto so li ni ayeke senge senge.+ Ti tâ tënë ni, salut ti Israël ayeke na maboko ti Jéhovah Nzapa ti e.+ 24  Me mbumbuse nzapa so ate aye ti peko ti ngangu kua so akotara ti e asara ti londo na ngoi so e de maseka ti ga na ni,+ lo te ataba ti akotara ti e nga na abagara ti ala, amolenge ti ala ti koli na amolenge ti ala ti wali. 25  Zia e lango na yâ ti kamene ti e, zia kamene ti e ahon ndö ti e kue, ndali ti so e sara siokpari na terê ti Jéhovah Nzapa ti e,+ e na ababâ ti e, ti londo na ngoi so e de maseka juska laso,+ na e ke ti mä yanga ti Jéhovah Nzapa ti e.”

Kete tënë

Na Hébreu: “ti zo ti Arabie.”
Na Hébreu: “Ndö ti lê.”
Âmanke a ye ti sara tënë ti Israël.
Wala “âme ti lo.”
Na Hébreu: “bâ ndo na sese.”
Wala “ambeni nzapa nde.”
Na Hébreu: “ti aturugu ti amara.”