Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 29:1-32

LI TI ATËNË NI

  • Lettre so Jérémie atokua na azo so a gbu ala a gue na ala na Babylone (1-23)

    • Na peko ti ngu 70 awe si Israël ayeke kiri (10)

  • Mbeni tokua ndali ti Shémaïah (24-32)

29  Bâ atënë ti yâ ti lettre so prophète Jérémie angbâ lani na Jérusalem lo tokua na tanga ti a-ancien so ayeke na popo ti azo so a gbu ala a gue na ala na Babylone, na aprêtre, aprophète nga na azo ni kue; ala so Nébucadnezzar agbu ala na Jérusalem lo gue na ala na Babylone.  Lo tokua lettre so na peko ti so Gbia Jéconias,+ na mama ti gbia ni,+ na akota zo ti yangbo ti gbia, amokonzi ti Juda na ti Jérusalem, azo so ahinga ti sara kua ti maboko nzoni nga na azo ti kua ti ndao* asigi na Jérusalem awe.+  Jérémie atokua lettre ni so na Babylone na maboko ti Élasah molenge ti Shaphan+ nga na Guémariah molenge ti Hilkiah, so Sédécias+ gbia ti Juda atokua ala na Nébucadnezzar, gbia ti Babylone. Lettre ni atene:  “Bâ tënë so Jéhovah ti aturugu, Nzapa ti Israël, atene na azo kue so a gue na ala na Babylone la, ala so lo sara si a gbu ala na Jérusalem a gue na ala na Babylone:  ‘Ala leke ada si ala lango na yâ ni. Ala fâ ayaka na ala te alê ti kobe ni.  Ala mû awali na ala dü amolenge ti koli na amolenge ti wali. Ala mû awali ndali ti amolenge ti ala ti koli nga ala mû amolenge ti ala ti wali na akoli ti sara mariage na ala, tongaso si amolenge ti ala ni nga adü amolenge ti koli na amolenge ti wali. Zia ala wu mingi kâ, wungo ti ala akiri na peko pëpe.  Ala nga ala gi ti sara si siriri amaï na yâ ti gbata so mbi zia si a gbu ala a gue na ala dä so, ala sambela Jéhovah ndali ti gbata ni, ndali ti so tongana gbata ni ayeke na siriri, fade ala nga aduti na siriri.+  Ndali ti so, Jéhovah ti aturugu, Nzapa ti Israël, atene: “Ala zia pëpe si aprophète ti ala nga azo ti bango mbadi so ayeke na popo ti ala ahanda ala,+ ala yeda pëpe na abango li so azo so ayeke bâ,  ngbanga ti so ‘ala yeke fa na ala atënë ti prophétie ti mvene na iri ti mbi. Mbi la mbi tokua ala pëpe,’+ tënë ti yanga ti Jéhovah la.”’” 10  “Jéhovah atene: ‘Tongana ngu 70 so ala sara na Babylone ahunzi awe, mbi yeke bi lê ti mbi na mbage ti ala,+ na mbi yeke sara si zendo ti mbi aga tâ tënë na mbi yeke kiri na ala na ndo so ge.’+ 11  “Jéhovah atene: ‘Mbi hinga mbilimbili ye so mbi pensé ti sara ndali ti ala, mbi pensé ti mû na ala siriri, me ye ti vundu pëpe,+ ti mû na ala mbeni nzoni gigi ti kekereke nga na beku.+ 12  Ala yeke iri mbi ande nga ala yeke ga ti sambela mbi, na mbi yeke mä ala.’+ 13  “‘Ala yeke gi mbi na ala yeke wara mbi,+ ndali ti so ande ala yeke gi mbi na bê ti ala kue.+ 14  Mbi yeke zia ande si ala wara mbi,’+ tënë ti yanga ti Jéhovah la. ‘Mbi yeke bungbi azo ti ala so ayeke angbâa nga mbi yeke mû ala na popo ti amara kue nga na yâ ti ando kue so mbi kangbi ala dä lani kirikiri so,+ mbi yeke kiri na ala na ndo so mbi sara si a gbu ala dä a gue na ala na mbeni ndo nde so,’ tënë ti yanga ti Jéhovah la.+ 15  “Me ala tene: ‘Jéhovah amû na e aprophète na Babylone.’ 16  “Bâ tënë so Jéhovah atene na gbia so ayeke na ndö ti trône ti David+ nga tënë so lo tene na azo kue so ayeke sara kodro na yâ ti gbata ti Jérusalem, aita ti ala so a gbu ala pëpe ti gue na ala na mbeni ndo nde: 17  ‘Bâ tënë so Jéhovah ti aturugu, atene la: “Bâ, mbi yeke tokua épée na ndö ti ala, mbi yeke tokua kota nzara nga na sioni kobela so ayeke mû ndo,+ na mbi yeke sara si ala ga tongana afungo lê ti figue so ayeke sioni mingi si zo alingbi ti te ni ape so.”’+ 18  “‘Mbi yeke tomba ande peko ti ala na épée,+ na kota nzara na sioni kobela so amû ndo nga mbi yeke sara si ala ga mbeni ye so ayeke mû mbeto na aroyaume kue ti sese,+ mbeni ye so a deba ni awe, mbeni ye so asara si li ti zo akpe kue, mbeni ye so azo ayeke hûru yanga ti ala ndali ni+ nga mbeni ye ti kamene na popo ti amara kue so mbi kangbi ala kirikiri dä,+ 19  ngbanga ti so ala mä lani pëpe atënë ti mbi so mbi tene na ala na lege ti awakua ti mbi aprophète, so mbi tokua na mbage ti ala fani mingi,’* tënë ti yanga ti Jéhovah la.+ “‘Me ala mä mbi pëpe,’+ tënë ti yanga ti Jéhovah la. 20  “Tongaso, ala mä tënë ti Jéhovah, ala kue so a gbu ala si a hon na ala, ala so mbi mû ala na Jérusalem mbi tokua ala na Babylone. 21  Bâ tënë so mbi Jéhovah ti aturugu, Nzapa ti Israël, mbi tene na ndö ti Achab, molenge ti Colaïah, nga tënë so mbi tene na ndö ti Sédécias molenge ti Maaséïah, ala so ayeke tene na ala aprophétie ti mvene na iri ti ti mbi:+ ‘Bâ, mbi yeke zia ala na maboko ti Nébucadnezzar,* gbia ti Babylone, na lo yeke fâ ala na épée na lê ti ala, azo ti Jérusalem. 22  Na azo ti Juda kue so a gbu ala a gue na ala na Babylone ayeke mû ye so asi na akoli use so, ti ga mbeni tënë so ala mû ti deba na ni na ndö ti amba ti ala, ala tene: “Zia Jéhovah asara na mo tongana ti so lo sara na Sédécias nga na Achab, ala so gbia ti Babylone azö ala zongo na wâ.” 23  A yeke ndali ti so ala sara ye ti kamene na Israël,+ ala yeke gi awali ti amba ti ala nga ala yeke tene atënë ti mvene na iri ti mbi, andâ mbi la mbi mû yanga na ala pëpe.+ “‘“Mbi la mbi hinga aye so, na mbi yeke témoin ni,”+ tënë ti yanga ti Jéhovah la.’” 24  “Ti Shémaïah+ zo ti Néhélam, mo tene na lo, mo tene: 25  ‘Bâ tënë so Jéhovah ti aturugu, Nzapa ti Israël, atene la: “Ndali ti so mo tokua alettre na iri ti mo na azo kue so ayeke na Jérusalem, mo tokua na prêtre Sophonie+ molenge ti Maaséïah, mo tokua ni nga na aprêtre kue, mo tene: 26  ‘Jéhovah asara si mo Sophonie mo ga prêtre na place ti prêtre Jéhoïada ti tene mo bâ ndo na ndö ti da ti Jéhovah, ti tene mo bâ lege ti azo kue so ye asara li ti ala si ala yeke sara ye tongana aprophète, si mo zia ala na yâ ti olombo nga mo zia chaîne na go ti ala.+ 27  Ngbanga ti nyen la mo suku pëpe na Jérémie zo ti Anathoth+ so ayeke sara ye tongana prophète na gbele ala so?+ 28  Ndali ti so lo tokua même lettre na e na Babylone, lo tene: “Ala yeke duti ande kâ aninga! Ala leke ada na ala lango na yâ ni. Ala fâ ayaka na ala te alê ti kobe ni. . .”’”’”+ 29  Na ngoi so prêtre Sophonie+ adiko lettre ni so na mê ti prophète Jérémie, 30  Jéhovah asara tënë na Jérémie, lo tene: 31  “Mo tokua ndo na azo kue so a gbu ala a gue na ala na kodro-wande so, mo tene: ‘Bâ tënë so Jéhovah atene na ndö ti Shémaïah zo ti Néhélam la: “Ngbanga ti so Shémaïah atene prophétie na mo, atâa so mbi la mbi tokua lo pëpe, lo ye ti sara si mo zia bê ti mo na atënë ti mvene,+ 32  tongaso, bâ tënë so Jéhovah atene la: ‘Bâ, mbi yeke punir Shémaïah zo ti Néhélam, lo na ahale ti lo. Zo oko na popo ti ahale ti lo ayeke sö kuâ na popo ti azo so pëpe, nga lo yeke bâ pëpe ye ti nzoni so mbi yeke sara ande ndali ti azo ti mbi ngbanga ti so lo pusu azo ti sara kpengba-li na Jéhovah,’ tënë ti yanga ti Jéhovah la.’”’”

Kete tënë

A lingbi nga ti tene “azo ti lekengo angangu gbagba.”
Na Hébreu: “lango oko oko mbi londo hio na ndapre, mbi yeke tokua ala.”
Na Hébreu: “Nébucadrezzar,” so mbeni lege ti di iri ni so la.