Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 28:1-17

LI TI ATËNË NI

  • Jérémie nde na Hananiah, mbeni prophète ti wataka (1-17)

28  Na yâ ti oko ngu ni so, kete na peko ti so Sédécias+ gbia ti Juda akomanse ti komande, so ti tene na yâ ti osio ngu ni, na oku nze ni, prophète Hananiah molenge ti Azzur, zo ti kodro ti Gabaon,+ asara tënë na mbi, na yâ ti da ti Jéhovah na lê ti aprêtre nga na azo ni kue, lo tene:  “Bâ tënë so Jéhovah ti aturugu, Nzapa ti Israël, atene la: ‘Mbi yeke fâ ande yâ ti joug ti gbia ti Babylone.+  Kozo si ngu use alingbi, akungba kue ti da ti Jéhovah so Nébucadnezzar, gbia ti Babylone, amû lani na ndo so ague na ni na Babylone so, mbi yeke mû ni ti kiri na ni na ndo so ge.’”+  “‘Mbi yeke mû ande Jéconias+ molenge ti Jéhoïakim,+ gbia ti Juda, ti kiri na lo na ndo so ge, lo nga na azo kue so a gbu ala a gue na ala lani na Babylone,+ ndali ti so mbi yeke fâ ande yâ ti joug ti gbia ti Babylone,’ tënë ti yanga ti Jéhovah la.”  Na pekoni, prophète Jérémie asara tënë na prophète Hananiah na lê ti aprêtre nga na lê ti azo kue so angbâ ti luti na yâ ti da ti Jéhovah.  Prophète Jérémie atene: “Amen!* Zia si Jéhovah asara aye so! Zia Jéhovah asara si atënë ti prophétie so mo tene aga tâ tënë, na lege so Jéhovah ayeke mû ande akungba ti da ti lo nga na azo kue so a gbu ala ândö a gue na ala na Babylone so lo kiri na ala na ndo so ge.  Me, zia mo mä tënë so mbi yeke tene na mê ti mo nga na mê ti azo so kue.  A ninga awe la si aprophète so aga kozo na mbi nga ala so aga kozo na mo ayeke tene aprophétie na ndö ti akodro mingi nga na ndö ti akota royaume; ala tene aprophétie na ndö ti abira, aye ti vundu nga na akobela so amû ndo.  Tongana mbeni prophète atene prophétie na ndö ti tënë ti siriri, na tënë ti lo ni aga tâ tënë, azo ayeke hinga ande so Jéhovah la atokua prophète ni so biani.” 10  Tongaso, prophète Hananiah amû joug so ayeke na ndö ti go ti prophète Jérémie so, lo fâ yâ ni.+ 11  Na pekoni, Hananiah atene na lê ti azo ni kue, atene: “Bâ tënë so Jéhovah atene la: ‘A yeke tongaso la si mbi yeke fâ ande yâ ti joug ti Nébucadnezzar, gbia ti Babylone, na ndö ti go ti amara kue kozo si ngu use alingbi.’”+ Na pekoni, Jérémie ahon ti lo. 12  Na peko ti so prophète Hananiah afâ yâ ti joug so ayeke na ndö ti go ti prophète Jérémie so awe, Jéhovah atene na Jérémie: 13  “Gue mo tene na Hananiah, mo tene: ‘Bâ tënë so Jéhovah atene la: “Mo fâ yâ ti joug ti keke so awe+ me mo yeke sara ande mbeni joug ti wen na place ni.” 14  Bâ tënë so Jéhovah ti aturugu, Nzapa ti Israël, atene la: “Mbi yeke zia mbeni joug ti wen na ndö ti go ti amara so kue, si ala sara kua na Nébucadnezzar, gbia ti Babylone, ala doit ti sara kua na lo.+ Même anyama ti ngonda, mbi yeke mû ande na lo.”’”+ 15  Tongaso, prophète Jérémie atene na prophète Hananiah:+ “Hananiah, mo mä mbi si! Jéhovah la atokua mo pëpe, me mo la mo sara si azo so azia bê ti ala kue na tënë ti mvene.+ 16  Ni la, Jéhovah atene: ‘Bâ, mbi yeke zi mo na ndö ti sese. Mo yeke kui ande na ngu so, ndali ti so mo pusu azo ti sara kpengba-li na Jéhovah.’”+ 17  Tongaso, prophète Hananiah akui na nze mbasambala ni ti oko ngu ni so.

Kete tënë

Wala “Zia a duti tongaso!”