Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 25:1-38

LI TI ATËNË NI

  • Jéhovah ayeke na tënë na amara (1-38)

    • Amara ayeke sara kua na Babylone ngu 70 (11)

    • Kopo ti vin ti ngonzo ti Nzapa (15)

    • Ye ti vundu ayeke si na mbeni mara ti gue na mbeni mara (32)

    • Azo so Jéhovah afâ ala na épée (33)

25  A yeke na yâ ti ngu osio ni ti komandema ti Jéhoïakim+ molenge ti Josias, gbia ti Juda, so ti tene na yâ ti kozo ngu ti komandema ti Nébucadnezzar* gbia ti Babylone, la si Nzapa asara tënë so na Jérémie na ndö ti azo ti Juda kue.  Bâ tënë so prophète Jérémie atene na ndö ti azo ti Juda kue nga na ndö ti azo kue so asara kodro na Jérusalem la, lo tene:  “A komanse na ngu 13 ni ti komandema ti Josias+ molenge ti Amon, gbia ti Juda, juska laso, a sara ngu 23 awe, si Jéhovah ayeke sara tënë na mbi, na mbi yeke fa peko ti tënë ni na ala fani mingi,* me ala yeke dengi mê ti ala ti mä ni pëpe.+  Jéhovah atokua lani na ala awakua ti lo kue so ayeke aprophète, lo tokua na ala awakua ti lo so fani mingi,* me ala mä ndo pëpe nga ala dengi mê ti ala ti mä lo pëpe.+  Aprophète so ayeke tene na ala: ‘Ala changé lege ti ala, zo oko oko azia lege ti sioni sarango ye ti lo nga asioni so lo sara.+ Tongaso, ala yeke ngbâ na fini aninga, na ala yeke lï na yâ ti kodro so Jéhovah amû ni lani na ala nga na akotara ti ala aninga awe.  Ala mû peko ti ambeni nzapa nde pëpe na ala voro anzapa ni so pëpe nga ala kuku na gbe ti ala pëpe, ala zia ngonzo na bê ti mbi pëpe na lege ti akusala ti maboko ti ala. Me tongana ala ke ti sara ye alingbi na tënë so, mbi yeke ga na ye ti vundu na ndö ti ala.’  “Jéhovah atene: ‘Me ala ke ti mä mbi lani, ala son bê ti mbi na lege ti akusala ti maboko ti ala na ala ga na ye ti vundu na ndö ti ala wani.’+  “Ni la, bâ tënë so Jéhovah ti aturugu atene la: ‘“Ngbanga ti so ala mä yanga ti mbi pëpe,  mbi yeke tokua ti iri amara kue so ayeke na mbage ti nord ti ga,”+ tënë ti yanga ti Jéhovah la, “mbi yeke tokua ti iri Nébucadnezzar* gbia ti Babylone, so ayeke wakua ti mbi.+ Mbi yeke ga na ala kue na ndö ti kodro so,+ mbi yeke ga na ala na terê ti azo ti kodro ni nga na terê ti azo ti amara kue so angoro ala.+ Mbi yeke futi ala biani biani na mbi yeke sara si ala ga mbeni ye so amû mbeto na zo, mbeni ye so azo ayeke hûru yanga ti ala ndali ni nga mbeni ndo so abuba biani biani awe. 10  Mbi yeke sara si dekongo ti ngia nga na dekongo ti nzerengo terê ahunzi na popo ti ala.+ Mbi yeke sara nga si a mä go ti koli so amû wali fini fini wala go ti wali so amû koli fini fini+ na popo ti ala pëpe. Mbi yeke sara nga si a mä totongo ti tênë ti nekango na ye pëpe na mbi yeke sara si lumière ti lampe aza na popo ti ala pëpe. 11  Kodro ni kue ayeke buba biani biani na ayeke ga mbeni ye so ayeke mû mbeto na zo, nga azo ti amara ni so ayeke sara kua na gbia ti Babylone ndali ti ngu 70.”’+ 12  “Jéhovah atene: ‘Me tongana ngu 70 ni ahunzi awe,+ mbi yeke ga na ngbanga na ndö ti* gbia ti Babylone, na ndö ti azo ti mara so, ndali ti aye ti sioni so ala sara,+ mbi yeke sara si kodro ti azo ti Chaldée aga mbeni désert lakue lakue.+ 13  Mbi yeke sara si atënë kue so mbi tene na ndö ti kodro so aga na ndö ti kodro ni, atënë kue so a sû ni na yâ ti mbeti so, aye so Jérémie afa tënë ti prophétie ni na ndö ti amara kue. 14  Ndali ti so amara mingi nga na akota gbia+ ayeke sara ande si azo ti Chaldée aga angbâa,+ mbi yeke futa ala alingbi na asarango ye ti ala, a lingbi na akusala ti maboko ti ala.’”+ 15  Bâ tënë so Jéhovah, Nzapa ti Israël, atene na mbi la: “Mû kopo ti vin ti ngonzo so ayeke na yâ ti maboko ti mbi so, na mo sara si amara kue so mbi tokua mo na ala anyon ni. 16  Ala yeke nyon ni ande na ala yeke tambela kirikiri nga ala yeke sara ye mo bâ mo tene mbeni zo so ye asara li ti lo, ngbanga ti épée so mbi tokua na popo ti ala.”+ 17  Tongaso, mbi mû kopo ni na yâ ti maboko ti Jéhovah na mbi sara si amara kue so Jéhovah atokua mbi na ala so anyon ni:+ 18  a londo na Jérusalem nga na agbata ti Juda,+ agbia ni, amokonzi ni, ti sara si ala ga mbeni ndo so abuba kue, mbeni ye so amû mbeto na zo, mbeni ye so azo ayeke hûru yanga ti ala ndali ni nga mbeni ye so a deba ni awe,+ tongana ti laso. 19  Na pekoni, Pharaon gbia ti Égypte ayeke nyon ni, lo na azo ti kua ti lo, amokonzi ti lo nga na azo ti kodro ti lo kue,+ 20  nga na azo ti kodro so a wara amara nde nde na yâ ni, agbia kue ti sese ti Uz, agbia kue ti sese ti aPhilistin,+ Askélon,+ Gaza, Écron nga na tanga ti azo ti Ashdod. 21  Édom+ ayeke nyon ni, Moab+ nga na azo ti mara ti Ammon,+ 22  agbia ti Tyr kue, agbia ti Sidon+ kue nga na agbia ti sese so ayeke na mbage ti ngu-ingo, 23  Dedan,+ Téma, Buz nga na ala kue so akpaka kuä ti li ti ala so ayeke nduru na terê ti lê ti ala.+ 24  Agbia ti azo ti Arabie+ kue ayeke nyon ni, nga na agbia kue ti azo ti kodro so a wara amara nde nde na yâ ni, ala so asara kodro na yâ ti benyama, 25  agbia ti Zimri kue, agbia ti Élam kue+ nga na agbia ti Médie kue.+ 26  Nga agbia ti mbage ti nord kue, ala so ayeke nduru nga na ala kue so ayeke na yongoro ndo, ala oko oko kue ayeke nyon ni na peko ti terê nga na tanga ti aroyaume ti dunia kue so ayeke na ndö ti sese; gbia ti Shéshac*+ ayeke nyon kopo ni so na peko ti ala. 27  “Mo tene na ala: ‘Bâ tënë so Jéhovah ti aturugu, Nzapa ti Israël, atene la: “Ala nyon kopo ti vin ti ngonzo so ala soulé, ala dë na ala tï na sese, tongaso si ala lingbi ti londo pëpe+ ngbanga ti so mbi yeke tokua épée na popo ti ala.”’ 28  Tongana ala ke ti mû kopo so na maboko ti mo ti nyon ni, mo tene na ala: ‘Bâ tënë so Jéhovah ti aturugu atene la: “Ala yeke nyon ni! 29  Bâ, mbi yeke ga na ye ti vundu kozoni kue na ndö ti gbata so iri ti mbi ayeke na ndö ni;+ eskê a doit ti punir ala pëpe?”’+ “‘A yeke punir ala ande, ngbanga ti so mbi iri mbeni épée ti ga na terê ti azo kue so asara kodro na ndö ti sese,’ tënë ti yanga ti Jéhovah ti aturugu la. 30  “Mo tene tënë ti aprophétie so kue na ala mo tene: ‘Jéhovah angbâ na nduzu kâ lo yeke dekongo tongana bamara,lo ngbâ na yâ ti ndo ti lo so ayeke nzoni-kue lo sara si a mä go ti lo. Lo yeke dekongo ngangu tongana bamara so ayeke na yanga ti dû ti lo. Lo yeke dekongo tongana azo so ayeke pete alê ti vigne na yâ ti dû ti sarango na vin,Lo yeke he bia ti songo benda na ndö ti azo kue so asara kodro na ndö ti sese.’ 31  ‘A yeke mä mbeni bruit so ague juska na yanga ti sese kue,ndali ti so Jéhovah ayeke na tënë na amara. Lo wani lo yeke fâ ngbanga na li ti azo kue.+ Lo yeke fâ ande azo ti sioni na épée,’ tënë ti yanga ti Jéhovah la. 32  Bâ tënë so Jéhovah ti aturugu atene la: ‘Bâ, mbeni ye ti vundu ayeke londo na mbeni mara ti gue na mbeni mara,+mbeni ngangu pupu ti ngu ayeke londo na mbage ti sese kâ ti ga.+ 33  “‘Ala so Jéhovah afâ ala na lege ti épée na lango ni so ayeke londo na mbeni yanga ti sese ti si na mbeni yanga ti sese. Zo ti totongo kuâ ti ala ayeke duti dä pëpe, a yeke ro kuâ ti ala pëpe nga a yeke lu ala pëpe. Ala yeke ga tongana puru ti anyama na ndö ti sese.’ 34  Ala aberger, ala toto, ala dekongo ngangu! Ala akota zo so abâ ndo na ndö ti ataba, ala kpaka terê ti ala na yâ ti sese,ndali ti so ngoi ti fango ala nga ngoi ti kangbingo ala kirikiri asi awe,ala yeke tï na sese tongana mbeni pendere ta ti sese. 35  Aberger awara ndo ti kpe dä pëpe,akota zo so abâ ndo na ndö ti ataba ni ahinga lege so ala yeke kpe ti hon dä pëpe. 36  Ala mä dekongo ti aberger ni,toto ti akota zo so abâ ndo na ndö ti ataba ni,ndali ti so Jéhovah ayeke futi ndo ti tengo pere ti anyama ti ala. 37  Ando so ayeke fade na siriri so aga mbeni ndo so zo ayeke dä pëpe,ngbanga ti kota ngonzo ti Jéhovah. 38  Lo zia ndo ti lo, lo hon tongana ti so mbeni bamara so akono awe*+ so asigi na yâ ti dû ti lo ahon,kodro ti ala aga mbeni ye so amû mbeto na zo,ngbanga ti épée so asara sioni mingi,nga ngbanga ti kota ngonzo ti Nzapa.”

Kete tënë

Na Hébreu: “Nébucadrezzar,” so mbeni lege ti di iri ni so la.
Na Hébreu: “mbi londo hio ti sara tënë na ala.”
Na Hébreu: “lango oko oko mbi londo hio na ndapre, mbi yeke tokua ala.”
Na Hébreu: “Nébucadrezzar,” so mbeni lege ti di iri ni so la.
Wala “mbi yeke punir.”
Âmanke mbeni iri ti Babel la, me a sû ni na mbeni kode so a honde ndani na so azo kirikiri alingbi ti hinga ndani pëpe.
Wala “koli-bamara so akono awe.”