Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 21:1-14

LI TI ATËNË NI

  • Jéhovah ake ti sara ye so Sédécias ahunda (1-7)

  • A yeke na azo ti soro fini wala kuâ (8-14)

21  Jéhovah asara tënë na Jérémie na ngoi so Gbia Sédécias+ atokua na lo Pashhur+ molenge ti Malkijah, na prêtre Sophonie+ molenge ti Maaséïah si ala hunda Jérémie, atene:  “Pardon, mo hunda Jéhovah ndali ti e, ngbanga ti so Nébucadnezzar,* gbia ti Babylone, ayeke ga ande ti sara bira na e.+ Hinga ape Jéhovah ayeke sara mbeni ye ti kpene ti lo ndali ti e, tongaso si Nébucadnezzar* azi terê ti lo yongoro na e.”+  Jérémie atene na ala: “Bâ tënë so ala yeke tene ande na Sédécias la:  ‘Tënë so Jéhovah Nzapa ti Israël atene la: “Bâ, mbi yeke sara si aye ti bira so ayeke na yâ ti maboko ti mo so akiri ti sara sioni na mo, aye ti bira so mo yeke mû ti sara na bira na gbia ti Babylone+ nga na azo ti Chaldée so ayeke na peko ti gbagba ni si ala sara camp ti ala angoro mo kue so. Mbi yeke bungbi aye ti bira so tâ na milieu ti gbata so.  Mbi wani la mbi yeke sara bira na ala,+ na lege ti maboko ti mbi so mbi yôro ni, na lege ti mbeni ngangu maboko, na lege ti ngonzo, na songo bê nga na kota ngonzo.+  Mbi yeke fâ ande azo ti gbata so, azo na anyama kue. Ala yeke kui na lege ti mbeni sioni kobela so amû ndo.”’+  “‘Jéhovah atene: “Na pekoni, mbi yeke zia Sédécias gbia ti Juda, azo ti kua ti lo nga na azo ti kodro ti lo na maboko ti Nébucadnezzar,* gbia ti Babylone, na maboko ti awato ti ala nga na maboko ti ala so ayeke gi fini* ti ala. Azo kue so asö kuâ na yâ ti sioni kobela so amû ndo, na lê ti épée nga na yâ ti kota nzara so, mbi yeke zia ala nga na maboko ti Nébucadnezzar,* gbia ti Babylone, na maboko ti awato ti ala nga na maboko ti ala so ayeke gi fini* ti ala.+ Nébucadnezzar* ayeke fâ ala ande na épée. Lo yeke bâ mawa ti ala pëpe, lo yeke bi bê ti lo na ala pëpe nga lo yeke sara nzoni bê na ala pëpe.’”+  “Mo tene na azo ni so, mo tene: ‘Bâ tënë so Jéhovah atene la: “Mbi zia na devant ti ala lege ti fini na lege ti kuâ.  Azo so ayeke ngbâ na yâ ti gbata so, ala yeke kui ande na lege ti épée, na lege ti kota nzara nga na sioni kobela so amû ndo. Me zo kue so asigi na yâ ti gbata ni, lo zia terê ti lo na gbe ti azo ti Chaldée so asara camp ti ala angoro gbata ni so, lo yeke ngbâ na fini, na fini* ti lo ayeke ngbâ na lo tongana ye so zo agbu na peko ti bira.”’+ 10  “‘Jéhovah atene: “Mbi zia lê ti mbi na ndö ti gbata so ti ga na aye ti vundu na ndö ni me aye ti nzoni pëpe.+ A yeke zia gbata so na maboko ti gbia ti Babylone,+ na lo yeke gbi ni na wâ.”+ 11  “‘Ti ala azo ti sewa ti gbia ti Juda: Ala mä tënë ti yanga ti Jéhovah. 12  Ala ahale ti David, bâ tënë so Jéhovah atene la: “Zia ala fâ ngbanga mbilimbili lakue na ndapre, zo so azo anzi ye ti lo, ala zi lo na maboko ti azo ti nzi ni,+ tongaso pëpe, ndali ti aye ti sioni so ala sara, ngonzo ti mbi ayeke londo tongana wâ,+ a yeke gbi ye, zo ti mingongo ni ayeke dä pëpe.”’+ 13  Jéhovah atene: ‘Bâ, mbi yeke sara bira na ala, ala azo so asara kodro na yâ ti popo-hoto,* ala so asara kodro na yâ ti gbata so ayeke na ndö ti kota tênë. Ndali ti so ala tene: “Zo wa la ayeke descend ande ge ti sara bira na e zo wa? Zo wa la ayeke ga ti mû ando ti lango ti e?” 14  ‘Mbi yeke ga ande ti fâ ngbanga na ndö ti ala alingbi na aye so ala sara,’+ tënë ti yanga ti Jéhovah la. ‘Mbi yeke bi wâ ande na terê ti gbako ti ala, na wâ ni ayeke gbi aye kue so angoro gbako ni.’”+

Kete tënë

Na Hébreu: “Nébucadrezzar,” so mbeni lege ti di iri ni so la.
Na Hébreu: “Nébucadrezzar,” so mbeni lege ti di iri ni so la.
Na Hébreu: “Nébucadrezzar,” so mbeni lege ti di iri ni so la.
Wala “âme.”
Na Hébreu: “Nébucadrezzar,” so mbeni lege ti di iri ni so la.
Wala “âme.”
Na Hébreu: “Nébucadrezzar,” so mbeni lege ti di iri ni so la.
Wala “âme.”
Wala “kpangbala ndo.”