Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 20:1-18

LI TI ATËNË NI

  • Pashur apika Jérémie (1-6)

  • Jérémie apeut ti zia lege ti fango tënë ape (7-13)

    • Atënë ti Nzapa ayeke tongana wâ (9)

    • Jéhovah ayeke tongana mbeni zo ti bira so amû mbeto na zo (11)

  • Dema ti Jérémie (14-18)

20  Andâ prêtre Pashhur, molenge ti Immer, so lo yeke mû nga li ni na ndö ti da ti Jéhovah, ayeke mä lani atënë ti prophétie so Jérémie ayeke fa ni so.  Tongaso, Pashhur apika prophète Jérémie na lo yôro lo na yâ ti olombo+ na ndo so a iri ni Yanga-ti-gbagba-ti-mbage-ti-nduzu so ayeke ti Benjamin, na yâ ti da ti Jéhovah.  Me na ndade ni, tongana Pashhur azi Jérémie na yâ ti olombo ni awe, Jérémie atene na lo: “Jéhovah adi iri ti mo Pashhur pëpe, me Ye-so-amu-mbeto-mbage-na-mbage.+  Ngbanga ti so Jéhovah atene: ‘Mbi yeke sara si mo ga ye so ayeke mû mbeto na mo wani nga na akamarade ti mo kue, ala yeke kui na lê ti épée ti awato ti ala na mo yeke bâ ni na lê ti mo.+ Mbi yeke zia azo ti Juda kue na maboko ti gbia ti Babylone, lo yeke gbu ala, lo yeke gue na ala na Babylone na lo yeke fâ ala na épée.+  Mbi yeke mû amosoro ti gbata so kue, anzoni ye ni kue, aye ti ngangu ngere ni kue, aye ti mosoro kue ti agbia ti Juda, mbi zia ni na maboko ti awato ti ala.+ Awato ti ala ayeke gbu aye so na ngangu, ala hon na ni na Babylone.+  Me ti mo, Pashhur, nga na azo kue so ayeke na yâ ti da ti mo, a yeke gue na ala na ngbâa. A yeke gue na mo ande na Babylone na mo yeke kui kâ, na a yeke lu ande mo nga na akamarade ti mo kue kâ, ndali ti so mo tene aprophétie ti mvene na ala.’”+   Jéhovah, mo woko mbi, me mbi mä yâ ni fade pëpe. Mo sara kua na ngangu ti mo na ndö ti mbi, na mo sö benda.+ Mbi ga mbeni ye ti hengo ni na yâ ti lango ni kue. Azo kue ayeke he mbi hengo.+   Na ndo kue so mbi sara tënë, a lingbi mbi dekongo nga mbi to mbela, mbi tene: “Aï! sarango ye ti ngangu na zo nga na futingo ye!” Ndali ti tënë ti Jéhovah, azo azonga mbi nga ala he mbi na yâ ti lango ni kue.+   Ni la mbi tene: “Mbi yeke di iri ti lo pëpe, mbi yeke fa tënë na iri ti lo encore ape.”+ Me tënë ni aga tongana wâ na yâ ti bê ti mbi, na a yeke gbi na yâ ti abio ti mbi. Mbi fatigué awe ti pete ndö ni, mbi peut encore ape ti ngbâ ti pete ndö ni.+ 10  Mbi mä gbâ ti asioni tënë so azo ayeke tene, ye so amû mbeto na zo angoro mbi kue.+ Ala tene: “E sigi na nda ti lo, zia e sigi na nda ti lo.” Azo kue so atene ala ye mbi duti na siriri, ala yeke ku ti bâ tingo ti mbi na ala tene:+ “Peut-être lo yeke sara mbeni ye ti buba, tongaso e wara go na ndö ti lo na e kiri na lo peko ti sioni so lo sara na e so.” 11  Me Jéhovah ayeke na terê ti mbi tongana mbeni zo ti bira so amû mbeto na zo.+ Ndani la azo so ayeke sara ye ti ngangu na mbi ayeke pika gere ti ala, ala yeke sö benda pëpe. Kota kamene ayeke gbu ande lê ti ala ndali ti so ala yeke sö benda pëpe.+ Kamene ti ala ni so ayeke ngbâ lakue lakue, zo ayeke girisa ni pëpe.+ 12  Me mo Jéhovah ti aturugu, mo la mo hinga azo so ayeke mbilimbili. Mo bâ bê ti zo nga na aye so ayeke na gbe ti bê ti zo kâ.+ Zia mbi bâ tongana nyen mo yeke kiri na ala peko ti sioni so ala sara,+ ndali ti so mbi zia tënë ti mbi na maboko ti mo awe.+ 13  Ala he bia na Jéhovah! Ala gonda Jéhovah! Ndali ti so lo zi wayere* na yâ ti maboko ti azo ti sioni. 14  Zia deba aga na ndö ti lango ti dungo mbi. Zia a sara tufa pëpe na ndö ti lango so mama ti mbi adü na mbi.+ 15  Deba aga na ndö ti zo so ague lani na nzoni sango so na babâ ti mbi, atene: “A dü na mo mbeni molenge ti koli!” A sara si terê ti lo anzere mingi. 16  Zia zo tongaso aga tongana agbata so Jéhovah ayeke futi ni sân ti tene lo regretté. Zia si na ndapre lo mä toto ti demango terê, na midi lo mä dekongo ti bira. 17  Ngbanga ti nyen la mo fâ mbi lani na yâ ti mama ti mbi ape? Tongaso si mama ti mbi aga dû ti kuâ ti mbi, na ngo angbâ lakue lakue na yâ ti lo.+ 18  Mbi sigi lani na yâ ti mama ti mbi ngbanga ti nyen? Ti bâ pasi na vundu? Ti tene fini ti mbi ahunzi na yâ ti kamene?+

Kete tënë

Wala “âme ti wayere.”