Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 2:1-37

LI TI ATËNË NI

  • Israël adö Jéhovah azia, lo voro ambeni nzapa nde (1-37)

    • Israël ayeke tongana mbeni vigne ti ngonda (21)

    • Mênë ayeke na yanga ti bongo ti lo (34)

2  Jéhovah atene na mbi:  “Gue, mo to mbela na mê ti azo ti Jérusalem, mo tene: ‘Bâ tënë so Jéhovah atene la: “Mbi dabe ti mbi na tâ yengo so mo ye na mbi na ngoi so mo de maseka,+ yengo so mo ye lani na mbi tongana mbi hunda ti sara mariage na mo,+ tongana nyen mo tambela na peko ti mbi na yâ ti benyama, na sese so zo alingbi ti lu lê ti kobe dä pëpe.+   Israël ayeke lani nzoni-kue na lê ti Jéhovah,+ lo yeke kozo li ti kobe ti yaka ti lo so lo ko ni.”’ ‘Azo kue so ate lo, ngbanga ayeke na li ti ala. Ye ti vundu ayeke ga na ndö ti ala,’ tënë ti yanga ti Jéhovah la.”+   Ala mä tënë so Jéhovah atene, ala ahale ti Jacob, na ala asewa kue ti mara ti Israël.   Bâ tënë so Jéhovah atene la: “Ye ti sioni wa la akotara ti ala abâ na mbage ti mbi,+ si ala hon yongoro na mbi tongaso so? Ala gue na peko ti asenge senge yanda,+ si ala nga kue aga asenge senge ye.+   Ala hunda ndo pëpe, atene: ‘Jéhovah ayeke na ndo wa? Lo so lo sigi na e na kodro ti Égypte,+ lo so afa lege na e na yâ ti benyama, lo hon na e na yâ ti mbeni ndo so ayeke désert+ nga na yâ ti akota dû, na yâ ti mbeni ndo so ahule+ nga so ndo avuko dä pitipiti, na yâ ti mbeni ndo so azo atambela dä pëpe, nga so zo asara kodro dä pëpe.’   Tongaso, mbi gue na ala na mbeni sese so ayeke lë akeke so azo ayeke te lengo ni, ti tene ala te alê ti keke ni nga na anzoni ye ti ndo ni so.+ Me tongana ala si dä awe, ala sara si sese ti mbi aga sioni. Ala sara si sese ti mbi ni aga mbeni ye so ayeke sioni mingi.+   Aprêtre ahunda ndo lani pëpe, atene: ‘Jéhovah ayeke na ndo wa?’+ Azo so ahinga ti sara kua na Ndia ahinga mbi pëpe, aberger asara kpengba-li na mbi,+ aprophète afa atënë ti prophétie na iri ti Baal,+ na ala tambela na peko ti anzapa so alingbi ti ga na ala ye ti nzoni oko pëpe.   Ni la Jéhovah atene: ‘Mbi yeke kiri ti sara bira na ala,+ mbi yeke sara bira na amolenge ti amolenge ti ala.’ 10  ‘Me zia ala fâ ngu ala gue na akodro ti Kittim+ so ayeke na ayanga ti ngu* na ala bâ ndo kâ si. Ala tokua azo na Kédar+ na ala gi ti bâ ye ni nzoni; ala bâ wala mara ti ye tongaso asi kâ awe. 11  Eskê ala bâ lâ oko awe azo ti mbeni kodro azia lege ti anzapa ti ala ti gue na peko ti aye so ayeke anzapa pëpe? Me azo ti mbi amû gloire ti mbi ala mû na aye so ayeke senge senge.+ 12  Yayu, zia bê ti mo adö na bango ye so; nga zia mbeto asara mo ngangu mingi,’ tënë ti yanga ti Jéhovah la. 13  ‘Ndali ti so azo ti mbi asara aye ti sioni use: Ala ke mbi, mbi so mbi yeke li ti ngu so amû fini,+ na ala gue ala zi* adû ti ala wani ti bata ngu dä, agbagbara dû so alingbi ti bata ngu pëpe.’ 14  ‘Israël ayeke zo ti kua, wala lo yeke ngbâa so a dü lo na yâ ti da ti wa ti lo? Tongaso, ndali ti nyen si Israël aga tongana akungba so azo aga agbu ahon na ni? 15  Abamara so akono awe* adekongo na ndö ti Israël; ala dekongo ngangu.+ Ala sara si kodro ti Israël aga ndo so amû mbeto na zo. A gbi agbata ni, si zo oko angbâ na yâ ni pëpe. 16  Azo ti kodro ti Noph*+ na ti Tahpanès+ ate bio ti li ti mo. 17  Eskê a yeke mo wani la mo sara si ye so aga na ndö ti mo so ape? Mo sara tongaso na lege so mo ke Jéhovah Nzapa ti mo+ na ngoi so lo yeke fa lege na mo. 18  Ti fadeso, ngbanga ti nyen la mo ye gï ti gue na Égypte+ ti nyon ngu ti Shihor?* Ngbanga ti nyen mo ye gï ti gue na Assyrie+ ti nyon Ngu ti Euphrate? 19  Sioni ti mo la ayeke kiri ande na mo na nzoni lege, ziango mbi so mo zia mbi so la ayeke sara si li ti mo aga dä. Zia mo hinga na mo bâ so a yeke sioni mingi nga a yeke ye ti vundu+ ti ke Jéhovah Nzapa ti mo. Mo sara mbeto ti mbi oko pëpe,’+ tënë ti yanga ti Seigneur ti dunia kue, Jéhovah ti aturugu, la. 20  ‘A ninga awe la mbi fâ yâ ti joug ti mo,+ na mbi fâ nga yâ ti akamba so akanga mo. Me mo tene: “Mbi yeke sara kua na mo pëpe,” ndali ti so na ndö ti ayongoro hoto kue nga na gbe ti akeke kue so kugbe ni ayeke mingi,+ mo lango na sese ti sara ndumba.+ 21  Ândö mbi lu mo tongana keke ti nzoni bengba vigne,+ lê ni kue ayeke tâ nzoni ni. Me a sara tongana nyen si mo kiri mo ga tongana vigne ti ngonda so?’+ 22  ‘Atâa mo sukula terê ti mo na atrone wala na gbâ ti savon, sioni ti mo ayeke ngbâ lakue na lê ti mbi tongana saleté so agbu terê ti bongo ngangu,’+ tënë ti yanga ti Jéhovah, Seigneur ti dunia kue, la. 23  A sara tongana nyen la si mo tene: ‘Mbi sara si terê ti mbi aga sioni pëpe. Mbi mû nga peko ti aBaal ape’ so? Gue mo bâ peko ti gere ti mo na yâ ti popo-hoto. Gi ti bâ peko ti ye so mo sara. Mo yeke tongana mbeni kete wali-chameau so ayapu mingi, na so ahinga ye so lo yeke sara pëpe si lo yeke mû loro kirikiri tongana terê ti lo anzere. 24  Mo yeke tongana kororo ti ngonda so ahinga gï benyama, so lo yô hôn ti lo na nduzu lo yeke gboto pupu ndali ti so nzara ti koli ahon ndö ti lo.* Zo wa la alingbi ti kanga lege na lo na ngoi so nzara ti koli ahon ndö ti lo? Akoli ni kue so ayeke gi lo, a yeke duti ngangu na ala pëpe ti wara lo. Tongana nze ti lo ti bungbingo na koli alingbi awe, ala yeke wara lo. 25  Israël, mo sara hange si mo tambela gere senge pëpe, si lege ti go ti mo ahule pëpe. Me mo tene: ‘Ên-ën! Zia mê ti mbi!+ Nzara ti awande* la asara mbi,+ na mbi yeke mû peko ti ala.’+ 26  Legeoko tongana zo ti nzi so kamene asara lo na ngoi so a gbu lo, kamene ayeke sara nga azo ti Israël. Kamene ayeke sara ala, agbia ti ala nga na amokonzi ti ala, aprêtre ti ala nga na aprophète ti ala.+ 27  Ala tene na keke: ‘Mo yeke babâ ti mbi.’+ Ala tene na tênë: ‘Mo la mo dü mbi.’ Ti mbi, ala tourné peko ti ala na mbi, me lê ti ala pëpe.+ Na ngoi so ye ti ngangu asi na ala awe, ala yeke tene ande, atene: ‘Mo londo mo sö e ma!’+ 28  Me anzapa ti ala so ala leke lani so ayeke na ndo wa?+ Tongana anzapa ni alingbi ti sö ala na ngoi ti ye ti ngangu, zia ala londo asö ala ma, ndali ti so ala, azo ti Juda, anzapa ti ala ayeke gbani gbani tongana wungo ti agbata ti ala.+ 29  Jéhovah atene: ‘Ala yeke gi mbi na tënë ngbanga ti nyen? Ala kue asara kpengba-li na mbi ngbanga ti nyen?’+ 30  Mbi pika amolenge ti ala gbä.+ Ala mä wango oko pëpe.+ Épée ti ala wani la si afâ aprophète ti ala,+ tongana bamara so asuru yâ ti mbeni nyama. 31  Ala, azo ti ngoi so, ala bâ tënë ti Jéhovah so nzoni si. Mbi ga tongana benyama na lê ti azo ti Israël? Wala tongana kodro so ndo avuko dä pitipiti? Ndali ti nyen azo ti mbi atene: ‘E fono ti bê ti e, e yeke kiri na mo encore ape’?+ 32  Maseka so ade ti hinga koli pëpe apeut ti girisa aye ti baba ti lo? Wali so amû koli fini fini apeut ti girisa pendere ceinture ti lo?* Azo ti mbi agirisa mbi a sara alango mingi so zo apeut ti diko ni pëpe.+ 33  Mo wali so mo yeke na kode mingi si mo hinga ti gi akoli so! Mo fa sioni lege na terê ti mo wani ti sara aye ti sioni.+ 34  A wara même na yanga ti bongo ti mo mênë ti awayere so tënë ayeke na li ti ala* pëpe.+ Atâa so mbi wara ala lani na kungbingo yanga-da ti mo pëpe, mbi wara mênë ti ala na ndö ti ayanga ti bongo ti mo kue.+ 35  Me mo tene: ‘Tënë ayeke na li ti mbi oko pëpe. Biani lo yeke sara ngonzo na terê ti mbi encore ape.’ Ti fadeso mbi yeke fâ ngbanga na ndö ti mo, ndali ti so mo tene: ‘Mbi sara siokpari pëpe.’ 36  Mo so kete mo changé sarango ye ti mo, kete mo changé sarango ye ti mo, ndali ti nyen la mo bâ ni tongana senge ye? Azo ti Égypte nga ayeke bi kamene na lê ti mo,+ legeoko tongana ti so azo ti Assyrie abi lani kamene na lê ti mo.+ 37  Ndali ti tënë so nga, mo yeke zia maboko ti mo na li ti mo na ngoi so mo yeke sigi,+ ngbanga ti so Jéhovah ake azo so mo zia bê ti mo na ala so awe. Azo ni so ayeke sara ande pëpe si aye ti mo aga nzoni.”

Kete tënë

Wala “azoa.”
Wala “ala kôro,” âmanke na yâ ti kota tênë.
Wala “Akoli-bamara so akono awe.”
Wala “Memphis.”
So ti tene mbeni mbage ti maboko ti Ngu ti Nil.
Wala “so âme ti lo asara nzara ti koli mingi.”
Wala “ambeni nzapa nde.”
Wala “ceinture so lo yü na ngoi ti matanga ti mariage ti lo?”
Wala “li ti a-âme ti ala.”