Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 18:1-23

LI TI ATËNË NI

  • Popoto ti sarango na ta na yâ ti maboko ti zo ti sarango ta ni (1-12)

  • Jéhovah atourné peko ti lo na Israël (13-17)

  • Azo agbe lingo na terê ti Jérémie; lo toto na Nzapa (18-23)

18  Bâ tënë so Jéhovah atene na Jérémie la:  “Londo mo gue na ndo ti zo ti lekengo ta ti sese,+ kâ mbi yeke sara mbeni tënë na mo.”  Tongaso, mbi gue na ndo ti zo ti lekengo ta ni, lo ngbâ ti leke mbeni ta ti sese na ndö ti ye so a yeke leke ta na ndö ni.  Me ta so lo ngbâ ti leke ni so abuba na yâ ti maboko ti lo. Tongaso, zo ti lekengo ta ni akiri aleke mbeni ta ni nde so lo bâ ayeke nzoni na lê ti lo.  Na pekoni, Jéhovah atene na mbi:  “‘Ala, azo ti mara ti Israël, ye so zo ti lekengo ta ti sese so ayeke sara so, eskê mbi peut ti sara na ala tongaso ape?’ Tënë ti yanga ti Jéhovah la. ‘Bâ! Gï tongana popoto ti sese so ayeke na yâ ti maboko ti zo ti lekengo ta, ala nga kue ala yeke tongaso na yâ ti maboko ti mbi.+  Tongana mbeni lâ, mbi tene mbeni tënë na ndö ti mbeni mara wala mbeni royaume mbi tene mbi yeke gboto lo tongana ti so a yeke gboto na mbeni keke na gunda ni kue, mbi yeke dë lo na sese wala mbi yeke futi lo,+  si mara ni so azia lege ti sarango ye ti sioni so mbi sara tënë ni, mbi nga kue mbi yeke zia lege ti kota ye ti vundu so mbi ye ti ga na ni na ndö ti lo.+  Me tongana mbeni lâ mbi tene mbi yeke leke mbeni kodro so abuba awe wala mbi yeke lu mbeni mara wala mbeni royaume tongana ti so a lu na keke, 10  si mara ni so asara aye ti sioni na lê ti mbi nga lo mä yanga ti mbi pëpe, mbi yeke zia lege ti ye ti nzoni so mbi ye ti sara na lo so.’ 11  “Fadeso, mo tene na azo ti Juda nga na azo so asara kodro na Jérusalem mo tene: ‘Bâ tënë so Jéhovah atene la: “Bâ mbi ngbâ ti leke mbeni kota ye ti vundu nga na kpale ti ga na ni na ndö ti ala. A yeke nzoni ala zia lege ti aye ti sioni so ala yeke sara so, ala changé lege ti ala, ala sara ye ti nzoni.”’”+ 12  Me ala tene: “E yeke na mbeni ye oko ti sara pëpe!+ E yeke sara ande gï aye so aga na li ti e, na zo oko oko ayeke mû peko ti aye ti sioni so bê ti lo afa na lo ti sara.”+ 13  Ndani la, bâ tënë so Jéhovah atene la: “A yeke nzoni ala hunda azo na popo ti amara nde nde. Zo wa la si amä mbeni mara ti tënë tongaso awe? Maseka-wali ti Israël asara mbeni ye so ayeke sioni mingi.+ 14  Ala bâ lâ oko neige* ti Liban agirisa na ndö ti akota tênë so ayeke na terê ti ali ti ahoto ni awe? Wala ala bâ lâ oko dede ngu so alondo ayo, si ayeke sua so, ahule awe? 15  Me azo ti mbi agirisa na ndö ti mbi.+ Ndali ti so ala mû asandaga na ye so ayeke asenge senge ye,+ na ala sara si azo apika gere ti ala na ndö ti lege ti ala, alege ti ala ti ândö,+ ti tene ala tambela na ndö ti alege so kûtu ayeke dä nga so ayeke kirikiri, 16  ala sara si kodro ti ala aga mbeni ndo so ayeke sara zo mbeto mingi,+ nga mbeni ye so azo ayeke hûru yanga lakue lakue ndali ni.+ Zo kue so ahon na lege, a yeke sara lo mbeto mingi na lo yeke yengi li ti lo.+ 17  Legeoko tongana ti so pupu ti mbage ti est ayeke kangbi yâ ti ahulengo pere kirikiri, mbi yeke kangbi yâ ti ala kirikiri na devant ti awato ti ala. Na lango ti kota ye ti vundu so ayeke si ande na ala, mbi yeke tourné peko ti mbi na ala me mbi yeke zia lê ti mbi na mbage ti ala pëpe.”+ 18  Ala tene: “Ala ga, zia e mä terê e ke Jérémie,+ ndali ti so ndia* ayeke ngbâ lakue na maboko ti aprêtre, wango ayeke ngbâ lakue na yanga ti azo ti ndara nga tënë ayeke ngbâ lakue na yanga ti aprophète. Ala ga, zia e gi ti bi tënë na li* ti lo, na e mä tënë so lo tene so oko pëpe.” 19  Jéhovah, mo dengi mê ti mo ti mä mbi, mä tënë so awato ti mbi ayeke tene na terê ti mbi so. 20  A lingbi zo akiri sioni na place ti ye ti nzoni? Ala yeke zi dû ndali ti fini* ti mbi.+ Dabe ti mo na ngoi so mbi luti na gbele mo ti sara nzoni tënë ti azo so, ti sara si kota ngonzo so mo sara na terê ti ala akaï. 21  Tongaso, zia amolenge ti ala akui na nzara, na mo zia a fâ ala na épée.+ Sara si amolenge ti awali ti ala akui nga awali ti ala aga awali-mua.+ Sara si sioni kobela afâ akoli ti ala, Sara si a fâ amaseka ti ala ti koli na épée na yâ ti bira.+ 22  Zia si a mä toto na yâ ti ada ti ala, na ngoi so mo sara si asioni zo asi gbagburu na ndö ti ala. Ndali ti so ala zi dû ti tene ala gbu na mbi, ala zia kûkû ti gbu gere ti mbi.+ 23  Me mo, Jéhovah, mo hinga nzoni mingi amayele kue so ala sara na terê ti mbi ti fâ mbi.+ Mo kanga lê ti mo na ndö ti sioni ti ala pëpe, mo sara si siokpari ti ala agirisa na lê ti mo pëpe. Zia si ala pika gere ti ala na devant ti mo+ na ngoi so mo ga ti punir ala na yâ ti ngonzo ti mo.+

Kete tënë

A kpa glace so yâ ni afâ kete kete me ayeke ti lo fuku fuku. A yeke londo ka na nduzu si ayeke tï na sese tongana ngu-nzapa.
Wala “fango ye.”
Na Hébreu: “fâ lo na tënë ti yanga.”
Wala “âme.”