Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 15:1-21

LI TI ATËNË NI

  • Jéhovah ayeke changé yâ ti ngbanga so lo fâ so ape (1-9)

  • Dema ti Jérémie (10)

  • Jéhovah akiri tënë (11-14)

  • Sambela ti Jérémie (15-18)

    • Tengo atënë ti Nzapa anzere (16)

  • Jéhovah akpengba Jérémie (19-21)

15  Na pekoni Jéhovah atene na mbi: “Même tongana Moïse na Samuel la aluti na devant ti mbi ti toto ndali ti azo so,+ mbi yeke sara nzoni bê na azo so oko pëpe. Tomba azo so na lê ti mbi. Zia ala gue.  Me tongana ala tene na mo: ‘E yeke gue na ndo wa?’ Tene na ala: ‘Bâ tënë so Jéhovah atene la: “Zo so tongana a yeke ti tene sioni kobela la afâ lo, sioni kobela ayeke fâ lo! Zo so tongana a yeke ti tene épée la afâ lo, épée ayeke fâ lo!+ Zo so tongana a yeke ti tene kota nzara la afâ lo, kota nzara ayeke fâ lo! Zo so tongana a yeke ti tene a gue na lo na ngbâa, a yeke gue na lo na ngbâa!”’+  “Jéhovah atene: ‘Mbi yeke tokua aye ti vundu+ osio* na ndö ti ala, épée ti tene afâ ala, ambo ti tene asuru yâ ti ala, andeke ti nduzu nga na anyama ti ngonda ti tene ate ala na afuti ala.+  Mbi yeke sara si ala ga mbeni ye so amû mbeto na aroyaume kue ti sese+ ngbanga ti ye so Manassé molenge ti Ézéchias, gbia ti Juda, asara lani na Jérusalem.+   Jérusalem, zo wa la ayeke bâ mawa ti mo zo wa? Zo wa la ayeke kangbi ande vundu na mo zo wa? Zo wa la ayeke luti ande ti hunda tënë na ndö ti duti ti mo?’   Jéhovah atene: ‘Mo dö mbi mo zia awe,+ mo tourné peko ti mo na mbi.+ Ni la mbi yeke yôro maboko ti mbi ti sara ye ti ngangu na mo nga ti futi mo.+ Mbi fatigué ti bâ mawa ti mo awe.   Mbi yeke pe ala na râteau na ayanga ti gbagba ti kodro ni. Mbi yeke fâ amolenge ti ala.+ Mbi yeke futi azo ti mbi, ndali ti so ala ke ti changé aye so ala sara.+   Awali-mua ti ala ayeke ga gbani gbani na lê ti mbi tongana mbutu ti ngu-ingo. Mbi yeke ga ande na mbeni zo ti futingo ye na terê ti ala na kota lâ, na terê ti amama nga na terê ti amaseka-koli. Mbi yeke ga na ye ti vundu nga na kota mbeto na ndö ti ala gï gbagburu tongaso.   Wali so adü lani amolenge mbasambala, lo fatigué awe. Lo yeke tirika ti wu pupu. Ti wali so, lâ alinda awe andâ ndo ade ti vuko pëpe, kamene ayeke gbu lê ti lo.’ ‘Ti ala oko oko so ayeke ngbâ na popo ti ala, mbi yeke zia ala na lê ti épée ti awato ti ala,’ tënë ti yanga ti Jéhovah la.”+ 10  Aï! Mama ti mbi, mawa na mbi ndali ti so mo dü mbi,+ mo dü mbeni zo so ndali ti lo tiri na papa alondo na yâ ti kodro ni kue. Mbi sara bon ti zo pëpe wala mbeni zo asara nga bon ti mbi pëpe, me ala kue adeba mbi. 11  Jéhovah atene: “Ti tâ tënë ni, mbi yeke sara nzoni na mo; ti tâ tënë ni mbi yeke voro yanga ndali ti mo na devant ti awato ti mo, na ngoi ti ye ti ngangu nga na ngoi ti ye ti vundu. 12  Zo alingbi ti kungbi yâ ti wen kete kete? Wen so alondo na mbage ti nord, wala cuivre? 13  Mbi yeke zia si azo aga agbu anzoni ye ti mo nga na amosoro ti mo ahon na ni,+ ala mû ni senge senge, ndali ti asiokpari kue so mo sara na ndö ti sese ti mo kue. 14  Mbi yeke mû aye so na awato ti mo, ala yeke gue na ni na mbeni kodro so mo hinga ni pëpe.+ Ndali ti so ngonzo ti mbi asara si wâ alondo, na wâ ni ayeke gbi ti ga na ndö ti ala.”+ 15  Jéhovah, mo hinga pasi ti mbi awe, dabe ti mo na mbi na mo bi lê ti mo na ndö ti mbi. Ti azo so ayeke sara ye ti ngangu na mbi, mo kiri peko ti sioni ni na ala.+ Mo zia mbi kui pëpe* ngbanga ti so mo yeke sara ngonzo hio hio pëpe. Zia mo hinga so a yeke ndali ti iri ti mo la mbi wara aye ti kamene so.+ 16  Mbi wara atënë ti mo, na mbi te ni awe,+ tënë ti mo aga ye so asara si mbi yeke na ngia, ye so asara si bê ti mbi anzere. Ndali ti so iri ti mo, Jéhovah ti aturugu, ayeke na ndö ti mbi. 17  Mbi duti pëpe na popo ti azo ti hengo ndo ti sara ngia na ala.+ Ndali ti so maboko ti mo ayeke na ndö ti mbi, mbi duti gï mbi oko, ngbanga ti so mo sara si ngonzo agbu mbi.+ 18  Ngbanga ti nyen la pasi ti mbi ayeke hunzi pëpe nga kä ti mbi ayeke mü ape so? Kä ni ake ti mü awe. Eskê mo yeke ga ande tongana li ti ngu so ahanda zo, si zo alingbi ti zia bê ti lo na ndö ni ape so? 19  Ni la, bâ tënë so Jéhovah atene la: “Tongana mo changé bango ndo ti mo, mbi yeke sara si mo kiri mo kpengba, na mo yeke luti ande na gbele mbi. Tongana mo zi ye so ayeke ti ngere ngangu mo zia ni nde na asenge senge ye, mo yeke ga tongana yanga ti mbi.* Azo so ayeke ga ande na mbage ti mo, me mo, mo la mo yeke kiri na mbage ti ala pëpe.” 20  “Mbi yeke sara si mo ga mbeni ngangu gbagba ti cuivre na lê ti azo so.+ Biani ala yeke tiri na mo, me ala yeke sö benda na ndö ti mo pëpe,+ ndali ti so mbi yeke na mo, ti sö mo nga ti zi mo na maboko ti ala,” tënë ti yanga ti Jéhovah la. 21  “Mbi yeke zi mo na maboko ti azo ti sioni nga mbi yeke futa mbeni ye ti zi mo na yâ ti maboko ti azo so asara ngangu na zo.”

Kete tënë

A lingbi nga ti tene “mara ti angbanga nde nde osio.” Na Hébreu: “asewa osio.”
Na Hébreu: “Mo fâ mbi pëpe.”
Wala “mo yeke ga wayanga ti mbi.”