Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 12:1-17

LI TI ATËNË NI

  • Dema ti Jérémie (1-4)

  • Jéhovah akiri tënë (5-17)

12  Jéhovah, mo yeke Nzapa so ayeke mbilimbili,+ na ngoi so mbi ga na tënë ti dema ti mbi na mo, na ngoi so mbi sara na mo tënë ti aye so abâ tënë ti fango ngbanga, mo yeke sara ye lakue gï na lege ni. Me aye so azo ti sioni ayeke sara ayeke ga nzoni ngbanga ti nyen?+ Azo so ayeke sara ye na handa agi bê ti ala pëpe ngbanga ti nyen?   Mo lu ala tongana keke na gunda ti ala alï sese nzoni. Ala kono na ala lë lengo. Ala yeke sara nzoni tënë ti mo na yanga ti ala, me na yâ ti bê ti ala kâ* mo yeke yongoro mingi na ala.+   Me ti mbi, Jéhovah, mo hinga mbi nzoni mingi+ na mo bâ mbi. Mo gi yâ ti bê ti mbi na mo bâ so mbi yeke beoko na mo.+ Mo zi ala mo zia nde tongana ataba so a bata ala ti fâ ala, mo zia ala nde ti ku na lâ ti fango ala.   Kodro ni ayeke buba tongaso juska lawa? Akeke nga na apere kue ti yaka ayeke hule juska lawa?+ A yeke ndali ti sioni ti azo so aduti na yâ ti kodro ni la si anyama ti ngonda na andeke akui. Ala tene: “Lo yeke bâ aye so ayeke si ande na e so pëpe.”   Ka so mo kpe loro na azo ti gere si mo fatigué so, mo yeke sara ande mandako na ambarata tongana nyen?+ So mo yeke na yâ ti kodro ti siriri si mo gi bê ti mo ape so, fade mo yeke sara tongana nyen na yâ ti kete gbako so ayeke na terê ti Ngu ti Jourdain so?   Ndali ti so même aita ti mo wani, afami ti babâ ti mo wani, asara ye na handa na mbage ti mo.+ Ala dekongo na peko ti mo. Mo zia bê ti mo na ala pëpe, même tongana ala tene nzoni tënë na mo.   “Mbi dö da ti mbi,+ mbi zia awe. Mbi ke ye so ayeke ti mbi.+ Wali so mbi ye lo mingi* so, mbi zia lo na maboko ti awato ti lo awe.+   Na lê ti mbi, ye so ayeke ti mbi aga tongana mbeni bamara na yâ ti ngonda. Lo dekongo na ndö ti mbi. Ndani la mbi ke lo awe.   Ye so ayeke ti mbi aga tongana mbeni ndeke ti mungo anyama so anzoroko ti terê ti lo ayeke gbani gbani. Ambeni ndeke ti mungo nyama angoro lo ti gbu lo.+ Ala ga, ala bungbi terê ti ala, ala anyama kue ti ngonda, ala ga ala te ye.+ 10  Aberger mingi abuba yaka ti vigne ti mbi.+ Ala dö na gbe ti gere ti ala mbage ti sese ni so ayeke ti mbi.+ Ala sara si pendere mbage ti sese ti mbi so aga benyama so zo ayeke dä pëpe. 11  Ala sara si sese ni aga désert. Sese ni abuba.* Na lê ti mbi, ye oko ayeke dä pëpe.+ Sese ni kue aga mbeni ndo so ye oko ayeke dä pëpe, me tënë ni agbu bê ti zo oko pëpe.+ 12  Azo ti bubango ye amû alege kue so ayeke na yâ ti benyama ala ga, ndali ti so épée ti Jéhovah ayeke futi ye, a londo na mbeni mbage ti yanga ti sese ni ti si na mbeni mbage ni.+ Mbeni zo ti duti na siriri ayeke dä pëpe. 13  Ala yeke lu blé, me ala yeke ko asisi.+ Ala yeke bâ pasi, me ala yeke wara ye ti nzoni oko na pekoni pëpe. Kamene ti alengo ti kobe so ala wara so ayeke sara ala ande ndali ti kota ngonzo ti Jéhovah.” 14  Bâ tënë so Jéhovah atene na ndö ti asioni voizin ti mbi, ala so andu ye ti mbi so mbi sara si azo ti mbi Israël awara ni:+ “Bâ, mbi yeke gboto gunda ti ala na yâ ti kodro ti ala,+ mbi yeke gboto gunda ti azo ti Juda na popo ti ala. 15  Me na peko ti so mbi gboto gunda ti ala awe, mbi yeke kiri ti sara nzoni bê na ala na mbi yeke ga na ala oko oko kue na ndö ti ye so ayeke ti ala, na yâ ti kodro ti ala.” 16  “Tongana asioni voizin so agi ti manda asarango ye ti azo ti mbi, tongana ala deba terê ti ala na iri ti mbi ala tene: ‘Ti tâ tënë ni so Jéhovah ayeke na fini,’ tongana ti so ala fa lani na azo ti mbi ti deba terê ti ala na iri ti Baal so, mbi yeke mû ande na ala mbeni ndo na popo ti azo ti mbi. 17  Me tongana mbeni oko na popo ti amara so ake ti mä yanga ti mbi, mbi nga kue mbi yeke gboto gunda ti mara ni so, mbi yeke gboto gunda ti lo biani biani na mbi yeke futi lo,” tënë ti yanga ti Jéhovah la.+

Kete tënë

Na Hébreu: “na rein ti ala.”
Wala “so âme ti mbi aye lo mingi.”
A lingbi nga ti tene “ayeke na mua.”