Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Jérémie 1:1-19

LI TI ATËNË NI

  • A soro Jérémie ti ga prophète (1-10)

  • Vision ti mbeni keke ti amande (11, 12)

  • Vision ti mbeni tawa (13-16)

  • Nzapa akpengba Jérémie ndali ti kua so aku lo (17-19)

1  So ayeke atënë ti yanga ti Jérémie* molenge ti Hilkiah, mbeni prêtre na kodro ti Anathoth+ na sese ti azo ti mara ti Benjamin.  Jéhovah asara tënë na Jérémie na ngoi ti Josias+ molenge ti Amon,+ gbia ti Juda, na yâ ti ngu 13 ni so lo yeke gbia.  Nzapa asara nga tënë na lo na ngoi so Jéhoïakim,+ molenge ti Josias, ayeke gbia na Juda. Lo sara tënë na lo juska na ngoi so Sédécias,+ mbeni molenge ti Josias, ayeke gbia na Juda. Na pekoni Nzapa angbâ lakue ti sara tënë na lo juska na hunzingo ti ngu 11 ni ti komandema ti Sédécias, na yâ ti nze oku ni so a gbu azo ti Jérusalem a gue na ala na kodro-wande.+  Jéhovah atene na mbi:   “Kozo si mbi sara mo na yâ ti mama ti mo, mbi hinga* mo,+kozo si a dü mo,* mbi zia mo nde ndali ti mbi.+ Mbi soro mo ti sara mbeni kua so ayeke nde, kua ti prophète ti amara.”   Me mbi tene: “Aï, Jéhovah, Seigneur ti dunia kue. Mbi hinga ti sara tënë pëpe+ ndali ti so mbi de maseka mingi.”+   Me Jéhovah atene na mbi: “Mo tene pëpe mo tene ‘mbi de maseka mingi.’ Mo yeke gue ande na mbage ti azo kue so mbi yeke tokua mo na ala,mo yeke fa na ala atënë kue so mbi mû yanga na mo ti tene na ala.+   Sara mbeto ti lê ti ala pëpe,+ndali ti so ‘mbi yeke na mo ti zi mo na maboko ti ala’,+ tënë ti yanga ti Jéhovah la.”  Jéhovah ayôro maboko ti lo, lo ndu yanga ti mbi.+ Na pekoni, Jéhovah atene na mbi: “Mbi zia tënë ti mbi na yanga ti mo awe. + 10  Bâ, mbi mû na mo komandema laso na ndö ti amara nga na ndö ti aroyaume, ti gboto gunda ti aye na sese, ti kungbi ye na sese, ti futi ye nga ti dë ye na sese, ti leke ye nga ti lu ye.”+ 11  Jéhovah akiri asara tënë na mbi, atene: “Jérémie, nyen la mo bâ nyen?” Tongaso mbi tene na lo: “Mbi bâ maboko ti keke ti amande.”* 12  Jéhovah atene na mbi: “Mo bâ ye ni nzoni, ndali ti so lê ti mbi angbâ na zingo ni na ndö ti atënë ti mbi ti sara si aga tâ tënë.” 13  Jéhovah akiri atene na mbi ti fani use ni, atene: “Nyen la mo bâ nyen?” Tongaso mbi tene na lo: “Mbi bâ mbeni tawa* so ye ayeke kporo* na yâ ni na ndö ti wâ, na yanga ni adengi na ngbonda ni abâ ndo na mbage ti nord.” 14  Na pekoni Jéhovah atene na mbi: “Ye ti vundu ayeke londo na mbage ti nord si ayeke gati tï na ndö ti azo ti kodro ni kue.+ 15  Jéhovah Nzapa atene: ‘Bâ, mbi yeke iri amara kue ti royaume ti mbage ti nord.+ Ala yeke ga. Zo oko oko ayeke zia mbata ti lo ti gbiana ayanga ti gbagba ti Jérusalem,+ala yeke zia ni angoro terê ti amur ti gbata ni kue,na terê ti agbata kue ti Juda.+ 16  Mbi yeke dë ngbanga ti mbi na ndö ti ala nga na ndö ti aye ti sioni kue so ala sara,ndali ti so ala dö mbi azia,+na ala yeke zö asandaga na ambeni nzapa nde,+nga ala yeke kuku na gbe ti aye so ala leke na maboko ti ala wani.’+ 17  Âdu ti mo, a yeke nzoni mo leke terê ti mo ti sara mbeni ye,*mo londo mo tene na ala peko ti atënë kue so mbi mû yanga na mo ti tene na ala. Zia mbeto ti ala ahon ndö ti mo pëpe;+tongana mo sara mbeto ti ala, mbi yeke sara si mbeto agbu mo na lê ti ala. 18  Laso mbi sara si mo ga mbeni gbata so angangu gbagba angoro ni,mbi sara si mo ga pilier so a sara ni na wen, gbagba so a sara ni na cuivre ti kanga lege na kodro ni kue,+ti kanga lege na agbia ti Juda na amokonzi ni,ti kanga lege na aprêtre ni nga na azo ti kodro ni.+ 19  Ala yeke ga ande biani ti tiri na mo,me ala yeke sö benda na ndö ti mo pëpe,*ndali ti so ‘mbi yeke na mo,+ ti zi mo na maboko ti ala,’ tënë ti yanga ti Jéhovah la.”

Kete tënë

Peut-être ndani aye ti tene “Jéhovah ayâa zo na nduzu.”
Wala “soro.”
Na Hébreu: “kozo si mo sigi na yâ ti mama ti mo.”
Na Hébreu: “zo so lê ti lo angbâ na zingo ni.”
Wala “tawa so yanga ni akono.”
Na Hébreu: “so a hûru wâ na gbe ni,” na a ye ti sara tënë ti wâ so a ngbâ ti pe ni.
Na Hébreu: “kanga bongo na gbe ti yâ ti mo.”
Wala “ala yeke kinda mo pëpe.”