Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 9:1-29

LI TI ATËNË NI

  • Andia so Nzapa amû na azo kue (1-7)

    • Ndia na ndö ti mênë (4-6)

  • Mbele ti arc-en-ciel (8-17)

  • Aprophétie na ndö ti ahale ti Noé (18-29)

9  Nzapa airi tënë nzoni na ndö ti Noé na amolenge ti lo ti koli, na lo tene na ala: “Ala dü, ala ga gbani, ala si ndö ti sese.+  Mbeto ti ala, même kota mbeto ti ala, ayeke ngbâ lakue ti sara anyama kue so ayeke na ndö ti sese, anyama kue so ayeke huru, aye kue so ayeke tambela na ndö ti sese nga na asusu kue ti ngu-ingo. Ala yeke fadeso na maboko ti ala.*+  Anyama kue so ayeke tambela na so ayeke na fini, ala lingbi ti te ni.+ Legeoko tongana ti so mbi mû akugbe ti kasa na ala, mbi mû nga anyama kue na ala.+  Ye oko, nyama so fini* ni, wala mênë+ ni, angbâ dä, ala te ni pëpe.+  Na ndö ni, mbi yeke hunda ti tene a kiri tënë na mbi ndali ti mênë ti ala so asara si ala yeke na fini.* Mbi yeke hunda na acréature kue so ayeke na fini ti kiri tënë ndali ti mênë ti ala; mbi yeke hunda zo oko oko kue ti kiri tënë ndali ti fini ti ita ti lo.+  Zo so atuku mênë ti zo, mbeni zo ayeke tuku mênë ti lo nga,+ teti Nzapa asara zo na image ti lo.+  Âdu ti ala, ala dü, ala ga gbani; a lingbi ala ga gbani gbani na ndö ti sese.”+  Nzapa atene na Noé na amolenge ti lo, atene:  “Laso, mbi te mbele na ala+ na ahale ti ala, 10  nga na aye* kue so ayeke na fini so ala na ala asigi na yâ ti arche: andeke, tanga ti anyama kue nga na aye kue so ayeke na fini, so ti tene ye kue so ayeke na fini na ndö ti sese.+ 11  Mbele so mbi te na ala ayeke so: Mitele kue* ayeke kui encore ape na lege ti kota ngu, nga kota ngu ayeke pika ti futi sese encore ape.”+ 12  Nzapa akiri atene: “So ayeke fä ti mbele so mbi te na ala nga na aye* kue so ayeke na fini si ayeke na terê ti ala; a yeke nga ndali ti azo ti angoi nde nde kue so ayeke ga ande. 13  Mbi zia arc-en-ciel ti mbi na yâ ti mbinda, na a yeke duti fä ti mbele so ayeke na popo ti mbi na sese. 14  Tongana mbi ga na mbinda na nduzu na ndö ti sese, arc-en-ciel ni ayeke sigi na yâ ni. 15  Mbi yeke dabe ti mbi na mbele so mbi na ala nga na mara ti aye nde nde kue so ayeke na fini* e te na popo ti e; nga ngu ayeke pika ngbii ti ga kota ngu si afuti mitele kue encore ape.+ 16  Tongana arc-en-ciel asigi na yâ ti mbinda, mbi yeke bâ ni si mbi dabe ti mbi na mbele ti lakue lakue so ayeke na popo ti mbi nga na mara ti aye nde nde kue so ayeke na fini* na ndö ti sese.” 17  Nzapa akiri atene na Noé: “So ayeke fä ti mbele so mbi te na mitele kue so ayeke na ndö ti sese.”+ 18  Amolenge ti Noé ti koli, so asigi na yâ ti arche, ayeke Sem, Cham na Japhet.+ Na pekoni, Cham adü Canaan.+ 19  Ala ota so ayeke amolenge ti Noé; na lege ti ala la azo kue ti sese abâ gigi na ala kangbi na ando nde nde.+ 20  Noé ato nda ti fâ yaka, na lo fâ yaka ti vigne. 21  Lo nyon vin, lo soulé, tongaso lo lango terê senge na yâ ti tente ti lo. 22  Cham, babâ ti Canaan, abâ babâ ti lo so terê ti lo ayeke senge, na lo gue lo sara tënë ni na aita ti lo ti koli use so ayeke na gigi. 23  Tongaso, Sem na Japhet amû bongo, ala use kue azia ni na ndö ti go ti ala; ala kiri na peko ngbii ala lï na yâ ti tente ni. Ala bi ni na terê ti babâ ti ala so ayeke senge, me ala bi lê ti ala ayo si ala bâ pëpe terê ti babâ ti ala so ayeke senge. 24  Tongana Noé azingo na lango na peko ti vin so asara lo, lo mä ye so tanga ti molenge ti lo asara na lo. 25  Lo tene: “Mbi deba Canaan+ awe. Lo yeke ga ande ndangba ti angbâa ti aita ti lo.”+ 26  Nga lo tene: “Zia a sepela Jéhovah, Nzapa ti Sem, nga Canaan ayeke ga ande ngbâa ti lo.+ 27  Zia Nzapa amû ndo so lê ni akono mingi na Japhet, nga zia lo lango na yâ ti atente ti Sem. Zia Canaan aga ngbâa ti lo nga.” 28  Noé angbâ na fini ngu 350 na peko ti kota ngu.+ 29  Tongaso, ngu ti Noé kue ayeke ngu 950, na lo kui.

Kete tënë

Wala “na gbe ti komandema ti ala.”
Wala “âme.”
Wala “mênë ti âme ti ala.”
Wala “a-âme.”
Wala “Aye kue so ayeke na fini.”
Wala “a-âme.”
Wala “nga na âme ti aye kue so ayeke na fini so ayeke na mitele.”
Wala “nga na âme ti aye kue so ayeke na fini so ayeke na mitele.”