Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 7:1-24

LI TI ATËNË NI

  • Lindango na yâ ti arche ni (1-10)

  • Kota ngu so amû ndö ti sese kue (11-24)

7  Na pekoni, Jéhovah atene na Noé: “Lï na yâ ti arche ni, mo na azo ti da ti mo kue, ndali ti so, na popo ti azo ti ngoi ti mo, mo la mbi bâ mo yeke mbilimbili.+  Ti anyama kue so a bâ ni tongana ye ti sioni pëpe, mo mû ala mbasambala mbasambala,*+ koli ni na wali ni; ti anyama kue so a bâ ni tongana ye ti sioni, mo mû ala gï use use, koli ni na wali ni.  Ti anyama so ayeke huru na lê ti nduzu, mo mû ala mbasambala mbasambala,* koli ni na wali ni, ti tene mara ti ala angbâ na ndö ti sese,+  ndali ti so a ngbâ gï lango mbasambala ti tene mbi sara si ngu apika+ na ndö ti sese lâ 40 na bï 40;+ na mbi yeke futi ye kue so mbi sara so ayeke na fini na ndö ti sese.”+  Noé asara ye kue so Jéhovah amû yanga na lo ti sara.  Noé ayeke na ngu 600 na ngoi so kota ngu apika na ndö ti sese.+  Tongaso, Noé, amolenge ti lo ti koli, wali ti lo nga na awali ti amolenge ti lo alï na yâ ti arche kozo si kota ngu ni apika.+  Ti anyama kue so a bâ ni tongana ye ti sioni pëpe, anyama kue so a bâ ni tongana ye ti sioni, anyama so ayeke huru nga na ye kue so ayeke tambela na ndö ti sese,+  ala lï use use na peko ti Noé na yâ ti arche ni, koli ni na wali ni, gï tongana ti so Nzapa afa na Noé. 10  Lango mbasambala na pekoni, kota ngu apika na ndö ti sese. 11  Na ngu 600 ni ti fini ti Noé, na use nze ni, na lango 17 ti nze ni, na lango ni so, a zi yanga ti gbâ ti angu so ayeke na lê ti nduzu nga a zi ayanga ti yayu si ngu ni apika.+ 12  Kota ngu-nzapa apika na ndö ti sese lâ 40 na bï 40. 13  Tâ na lango ni so, Noé alï na yâ ti arche ni, lo, amolenge ti lo ti koli Sem, Cham na Japhet,+ wali ti lo nga na awali ti amolenge ti lo ota.+ 14  Ala lï, ala na anyama ni kue alingbi na mara ti ala: anyama ti ngonda, anyama ti kodro, anyama so ahara harango na ndö ti sese, anyama so ayeke huru, andeke nga na anyama so ayeke na kpangbi. 15  Ala yeke lï use use na peko ti Noé na yâ ti arche, mara ti anyama kue so ayeke wu pupu.* 16  Tongaso, mara ti anyama kue alï na yâ ti arche ni, koli ni na wali ni, alingbi na yanga so Nzapa amû na lo. Na pekoni, Jéhovah akanga yanga ni na peko ti Noé. 17  Kota ngu-nzapa apika* na ndö ti sese lango 40, ngu angbâ gï ti suku sukungo na ato nda ti hon na arche ni, na arche ni ayeke na ndö ti ngu ni. 18  Ngu ni asuku ahon ndö ni na angbâ gï ti suku sukungo ti mû ndö ti sese kue, me arche ni ayeke sua na lê ti ngu ni. 19  So ngu ni asuku ahon ndö ni, a mene ahoto so ayeke na ndö ti sese kue so ayo na nduzu mingi.+ 20  Ngu ni asuku amene ahoto ni ahon coudée* 15. 21  Tongaso, aye kue so ayeke na fini,* so atambela na ndö ti sese, akui:+ anyama so ayeke huru, anyama ti kodro, anyama ti ngonda, gbâ ti akete kete nyama nga na azo kue.+ 22  Ye kue so ayeke na ndö ti kuru sese si ayeke wu pupu* akui.+ 23  Tongaso, Lo futi ye kue so ayeke na fini na ndö ti sese: azo, anyama, anyama so ahara nga na anyama so ayeke huru na nduzu. A futi ala na ndö ti sese ni;+ gï Noé na ala so ayeke na lo na yâ ti arche la asö kuâ.+ 24  Ngu ni angbâ na sukungo ni tongaso na ndö ti sese lango 150.+

Kete tënë

A lingbi nga ti tene “anyama so a bâ ni tongana ye ti sioni pëpe, koli ni na wali ni, fani mbasambala.”
A lingbi nga ti tene “anyama so ayeke huru na lê ti nduzu, koli ni na wali ni, fani mbasambala.”
Wala “so yingo asara si ala yeke na fini.”
Wala “angbâ gï ti pika.”
Coudée oko alingbi na centimètre 44,5. Bâ na B14.
Na Hébreu: “mitele kue.”
Wala “ye kue so pupu asara si ayeke na fini.”