Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 6:1-22

LI TI ATËNË NI

  • Amolenge ti Nzapa amû awali na ndö ti sese ge (1-3)

  • Dungo aNéphilim (4)

  • Sioni ti azo azia vundu na bê ti Jéhovah (5-8)

  • A mû yanga na Noé ti sara mbeni arche (9-16)

  • Nzapa asara tënë ti kota ngu so ayeke mû ndö ti sese kue (17-22)

6  Tongana azo ato nda ti ga mingi na ndö ti sese na ala dü amolenge ti wali,  amolenge ti tâ Nzapa*+ abâ so amolenge-wali ni ayeke pendere. Tongaso, ala mû awali kue so ala ye ti mû.  Na pekoni, Jéhovah atene: “Mbi yeke* kanga bê na zo lakue lakue pëpe+ ndali ti so lo yeke gï zo* senge. Tongaso, ngoi so angbâ na lo ayeke ngu 120.”+  A-Néphilim* ayeke na ndö ti sese na ngoi ni so nga na yâ ti ngoi so aga na pekoni. Na yâ ti angoi ni so, amolenge ti tâ Nzapa angbâ ti bungbi na amolenge-wali ni, na awali ni ayeke dü na ala amolenge ti koli. Amolenge ni so ayeke awangangu ti giriri, azo so iri ti ala awu mingi.  Ye ti peko ni ayeke so Jéhovah abâ so sioni ti zo ayeke mingi na ndö ti sese nga so abibe ti lo na bê ti lo ayeke gï na ndö ti ye ti sioni na ngoi kue.+  Vundu asara Jéhovah ndali ti* so lo sara zo na ndö ti sese, bê ti lo ayeke na vundu.*+  Tongaso, Jéhovah atene: “Mbi yeke futi azo so mbi sara ala na ndö ti sese; mbi yeke futi zo, anyama ti kodro, anyama so ahara nga na anyama so ayeke huru na lê ti nduzu, ndali ti so mbi regretté so mbi sara ala.”  Me Noé anzere na lê ti Jéhovah.  Mbaï ti Noé ayeke so. Noé ayeke zo ti mbilimbili.+ Na popo ti azo ti ngoi ti lo,* lo la sarango ye ti lo alingbi kue.* Noé atambela na tâ Nzapa.+ 10  A si na mbeni ngoi, Noé adü amolenge ti koli ota: Sem, Cham na Japhet.+ 11  Me sese abuba na lê ti tâ Nzapa, sese asi singo na sarango ye ti ngangu. 12  Nzapa abâ so sese abuba;+ mitele* kue abuba lege ti lo na ndö ti sese awe.+ 13  Na peko ti ye so, Nzapa atene na Noé: “Mbi yeke hunzi ye kue so ayeke na fini, ndali ti so sese asi singo na sarango ye ti ngangu ngbanga ti ala; ni la mbi yeke futi ala legeoko na sese ni.+ 14  Mo sara arche* ndali ti mo wani na kpengbango keke so ngu ti yâ ni agbu ye gbungo.+ Mo kangbi yâ ti arche ni nde nde, nga mo zia mbeni ye tongana goudron+ na yâ ni nga na terê ni na gigi. 15  Mo sara ni tongaso: yongo ni ayeke coudée* 300, largeur ni ayeke coudée 50 nga yongo ni na nduzu ayeke coudée 30. 16  Mo yeke leke mbeni fenêtre si lumière* alï na yâ ti arche ni, nga popo ti fenêtre ni na li ti arche ni adoit ti duti coudée oko. Mo zia yanga ti arche ni na terê ni.+ Mo yeke sara arche ni na étage: use ni na ndö ti kozo ni, na ota ni na ndö ti use ni. 17  “Âdu ti mbi, mbi yeke sara si kota ngu+ amû ndö ti sese kue ti futi ye kue so ayeke wu pupu.* Ye kue so ayeke na ndö ti sese ayeke kui.+ 18  Mbi te mbele na mo; mo yeke lï na yâ ti arche ni, mo na amolenge ti mo ti koli, wali ti mo nga na awali ti amolenge ti mo.+ 19  Na popo ti anyama nde nde kue so ayeke na fini,+ mo mû ala use use, koli ni na wali ni,+ mo ga na ala na yâ ti arche ni si mo na ala angbâ na fini. 20  Anyama so ayeke huru alingbi na mara ti ala, anyama ti kodro alingbi na mara ti ala nga na anyama kue so ahara na ndö ti sese alingbi na mara ti ala, ala use use ayeke ga na mbage ti mo na yâ ti arche si ala ngbâ na fini.+ 21  Ti mo, mo bungbi mara ti akobe nde nde kue so a yeke te ni,+ mo gue na ni na yâ ti arche ni; a yeke ga kobe ti mo na ti anyama ni.” 22  Noé asara aye kue so Nzapa amû yanga na lo ti sara. Lo sara gï tongana ti so a hunda.+

Kete tënë

Wala “a-ange.”
Na Hébreu: “Yingo ti mbi ayeke.”
Wala “mitele.”
Peut-être a ye ti tene “Azo ti kindango azo,” so ti tene azo so asara si amba ti ala atï. Bâ na kete bakari.
Wala “Jéhovah aregretté.”
Wala “bê ti lo ason mingi.”
Na Hébreu: “agénération ti lo.”
Wala “lo la tënë ayeke na li ti lo pëpe.”
Wala “zo.”
Na Hébreu: “kota sanduku.”
Coudée oko alingbi na centimètre 44,5. Bâ na B14.
Na Hébreu: “tsohar.” Ambeni zo atene so tsohar ni aye pëpe ti sara tënë ti fenêtre so azi ti tene lumière alï dä, me a ye ti sara tënë ti li ti arche ni so adengi dengingo coudée oko.
Wala “so yingo asara si ala yeke na fini.”