Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 50:1-26

LI TI ATËNË NI

  • Joseph alu Jacob na Canaan (1-14)

  • Joseph akiri atene na aita ti lo so lo pardonné ala (15-21)

  • Andangba lango ti Joseph nga na kuâ ti lo (22-26)

    • Tënë so Joseph atene na ndö ti abio ti lo (25) (25)

50  Joseph atï na ndö ti babâ ti lo,+ lo toto na lo su ngbangba ti lo.  Na pekoni, Joseph amû yanga na azo ti kua ti lo awanganga ti leke kuâ ti babâ ti lo si afun pëpe.+ Awanganga ni aleke kuâ ti Israël,  ala mû lango 40 ti leke kuâ ti lo, teti so a yeke ngoi so la ala yeke mû ka ti leke na kuâ si afun pëpe; na azo ti Égypte atoto kuâ ti lo lango 70.  Tongana alango ti sarango vundu ndali ti kuâ ni ahon awe, Joseph asara tënë na azo ti yangbo* ti Pharaon, lo tene: “Tongana mbi nzere na lê ti ala, pardon, ala tene na Pharaon, atene:  ‘Babâ ti mbi asara si mbi deba yanga ti mbi,+ lo tene: “Mbi yeke kui ti mbi kuingo.+ Mo lu mbi na ndo ti lungo kuâ ti mbi+ so mbi zi na sese ti Canaan.”+ Pardon, mo zia mbi, mbi monté kâ mbi lu babâ ti mbi, na pekoni mbi yeke kiri.’”  Pharaon atene: “Gue mo lu babâ ti mo tongana ti so mo deba yanga ti mo ti sara.”+  Joseph ague ti lu babâ ti lo, lo na azo ti kua ti Pharaon kue, a-ancien+ ti yangbo ti lo, a-ancien kue ti kodro ti Égypte,  azo kue ti da ti Joseph, aita ti lo ti koli nga na azo ti da ti babâ ti lo.+ Gï akete molenge ti ala, ataba ti ala, angasa ti ala nga na abagara ti ala la ala zia ni na sese ti Goshen.  Apuse ti mbarata+ na azo ti kpengo na mbarata nga ague legeoko na lo; azo ni ayeke gbani gbani. 10  Ala si na ndo ti pikango lê ti kobe ti Atad, nduru na Ngu ti Jourdain, kâ ala toto kuâ ni ngangu mingi; lo sara vundu ti kuâ ti babâ ti lo lango mbasambala. 11  Azo ti kodro ni, azo ti Canaan, abâ ala na sarango mua na ndo ti pikango lê ti kobe ti Atad, na ala tene: “So kota mua si azo ti Égypte asara so!” Ndani la a iri ndo ni so Abel-Mizraïm;* a yeke nduru na Ngu ti Jourdain. 12  Tongaso, amolenge ti Jacob asara tâ gï ye so lo fa na ala.+ 13  Ala yô lo ala gue na lo na sese ti Canaan, na ala lu lo na yâ ti kota dû ti tênë so ayeke na sese ti Macpélah, so abâ ndo lê na lê na Mamré, sese so Abraham avo lani na maboko ti Éphron so ayeke zo ti mara ti Heth, tongana ndo ti lo ti lungo akuâ.+ 14  Tongana Joseph alu babâ ti lo awe, lo kiri na Égypte, lo na aita ti lo nga na azo kue so ague lani legeoko na lo ti lu babâ ti lo. 15  Tongana aita ti Joseph abâ so babâ ti ala akui awe, ala tene: “Hinga ape Joseph angbâ ti bata ngonzo na bê ti lo na terê ti e, na lo yeke kiri na e peko ti sioni kue so e sara na lo.”+ 16  Tongaso, ala tokua ndo na Joseph, ala tene: “Kozo si babâ ti mo akui, lo mû yanga, lo tene: 17  ‘Ala tene na Joseph: “Mbi gbu gere ti mo, mo pardonné akengo ndia ti aita ti mo nga na siokpari so ala sara so aga na sioni na mo.”’ Fadeso, pardon, mo pardonné akengo ndia ti e awakua ti Nzapa ti babâ ti mo.” Joseph atï na toto na ngoi so a tene tënë ni na lo. 18  Na pekoni, aita ti lo aga nga, ala kuku na gbe ti lo, ala tene: “Bâ, e yeke angbâa ti mo!”+ 19  Joseph atene na ala: “Ala sara mbeto pëpe. Mbi la mbi yeke na place ti Nzapa? 20  Atâa so ala ye lani ti sara sioni na mbi,+ Nzapa aleke ti lo ti tene ye ni so aga nzoni ye nga ti tene azo mingi angbâ na fini, tongana ti so lo yeke sara laso.+ 21  Tongaso, ala sara mbeto pëpe. Mbi yeke ngbâ ti mû kobe na ala nga na akete molenge ti ala.”+ A yeke tongaso si lo dë bê ti ala. 22  Joseph angbâ ti sara kodro na Égypte, lo na azo ti da ti babâ ti lo; ngu ti Joseph asi ngu 110. 23  Joseph abâ a-âta ti Éphraïm,+ lo bâ nga amolenge ti Makir,+ molenge ti Manassé. A dü ala na ndö ti gere ti Joseph.* 24  A si na mbeni ngoi, Joseph atene na aita ti lo: “Mbi yeke kui ti mbi kuingo; me Nzapa ayeke bi bê ti lo biani na ala,+ na lo yeke sigi na ala na yâ ti kodro so ti gue na ala na sese so lo deba yanga ti lo ti mû ni na Abraham, na Isaac nga na Jacob.”+ 25  Joseph asara si amolenge ti Israël ti koli adeba yanga ti ala, lo tene: “Nzapa ayeke bi bê ti lo biani na ala. Ande na ngoi ni so, ala mû bio ti mbi na ndo so ala hon na ni.”+ 26  Joseph akui; lo yeke na ngu 110; ala hunda ti tene a leke kuâ ti lo si afun pëpe,+ na a zia lo na yâ ti sanduku ti kuâ na Égypte.

Kete tënë

Wala “azo ti da.”
Ndani aye ti tene “Mua so azo ti Égypte asara.”
So ti tene lo sara ye na ala tongana amolenge ti lo nga lo ye ala mingi.