Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 47:1-31

LI TI ATËNË NI

  • Jacob awara terê na Pharaon (1-12)

  • Joseph abâ lege ti aye na ndara (13-26)

  • Israël asara kodro na Goshen (27-31)

47  Tongaso, Joseph ague atene na Pharaon,+ atene: “Babâ ti mbi na aita ti mbi alondo na sese ti Canaan ala si awe, ala ga na ataba na abagara ti ala nga na aye ti ala kue; ala yeke na sese ti Goshen.”+  Lo mû ambeni ita ti lo ti koli oku, lo fa ala na Pharaon.+  Pharaon ahunda aita ti Joseph, atene: “Ala yeke sara kua ti nyen?” Ala tene na Pharaon: “E azo ti kua ti mo e yeke azo ti batango ataba, e na akotara ti e.”+  Na pekoni, ala tene na Pharaon: “E ga ti sara kodro tongana awande na yâ ti kodro ni.+ Kota nzara ni ayeke ngangu mingi na sese ti Canaan,+ tongaso ndo ti tengo pere ayeke dä pëpe teti anyama ti e. Pardon, zia e azo ti kua ti mo e sara kodro na sese ti Goshen.”+  Pharaon atene na Joseph: “Babâ ti mo na aita ti mo asi na mo ge awe.  Kodro ti Égypte ayeke na maboko ti mo. Tene na babâ ti mo na aita ti mo ti sara kodro na mbage ti kodro ni so ayeke nzoni mingi.+ Zia ala sara kodro na sese ti Goshen, na tongana mo hinga ambeni koli na popo ti ala so ahinga kua, mo zia ala ti bâ lege ti anyama ti mbi.”  Na pekoni, Joseph alï na babâ ti lo Jacob, lo fa lo na Pharaon, na Jacob airi tufa na ndö ti Pharaon.  Pharaon ahunda Jacob, atene: “Mo yeke na ngu oke?”  Jacob atene na Pharaon: “Mbi yeke na ngu 130; na yâ ti angu so kue, mbi sara kodro na ando nde nde.* Ngu ti mbi ayeke mingi pëpe na asi singo na vundu,+ nga a lingbi pëpe na ngu ti akotara ti mbi so ala nga asara kodro na ando nde nde.”*+ 10  Na pekoni, Jacob airi tufa na ndö ti Pharaon, na lo sigi. 11  Tongaso, Joseph azia babâ ti lo na aita ti lo na mbeni ndo na kodro ti Égypte, lo mû na ala mbage ti sese ti Ramsès+ so ayeke nzoni mingi, gï tongana ti so Pharaon afa. 12  Joseph ayeke mû kobe* na babâ ti lo, aita ti lo nga na azo ti da ti babâ ti lo kue, a lingbi na wungo ti amolenge ti ala. 13  Na ndö ti sese kue kobe* ayeke dä pëpe, ndali ti so kota nzara ni aga ngangu mingi; azo ti kodro ti Égypte nga na ti sese ti Canaan awoko kue na kota nzara ni.+ 14  Joseph ayeke ro nginza kue so ayeke na kodro ti Égypte nga na sese ti Canaan, nginza so azo ayeke vo na alê ti kobe ni;+ lo yeke ga na nginza ni na da ti Pharaon. 15  Tongana nginza ahunzi na kodro ti Égypte nga na sese ti Canaan awe, azo ti Égypte kue aga na Joseph, ala tene: “Mû na e kobe ma! Ndani nyen ti tene e kui tâ na lê ti mo tongaso ndali ti so nginza ahunzi kue na terê ti e?” 16  Joseph atene: “Tongana nginza ahunzi na terê ti ala, ala ga na anyama ti ala na mbi yeke mû na ala kobe na place ti anyama ti ala ni.” 17  Tongaso, ala ga na anyama ti ala na Joseph. Joseph ayeke mû na ala kobe na place ti ambarata ti ala, angasa, ataba, abagara na akororo ti ala; lo ngbâ gï ti mû na ala kobe na place ti anyama ti ala kue na ngu ni so. 18  Tongana ngu ni so ahunzi awe, na ngu ti peko, ala ga na terê ti lo, ala tene: “E lingbi ti honde na mo pëpe, seigneur ti e, nginza nga na anyama ti e kue la e ga na ni na seigneur ti e awe so. Mbeni ye so angbâ na e ti mû na seigneur ti e ayeke dä pëpe, gï terê ti e na sese ti e. 19  Ndani nyen ti tene e kui na gbele mo, na sese ti e angbâ senge? Vo e nga na sese ti e na kobe, na e yeke ga angbâa ti Pharaon nga sese ti e ayeke ga ti lo. Mû na e ngongoa ti kobe si e ngbâ na fini na e kui pëpe nga si sese ti e angbâ senge pëpe.” 20  Tongaso, Joseph avo kodro ti Égypte kue na Pharaon, ngbanga ti so azo ti Égypte oko oko kue akä sese ti ala, ndali ti so kota nzara ni ayeke ngangu mingi; kodro ni aga ti Pharaon. 21  Lo zi azo ni na ndo ti ala, lo kiri na ala na yâ ti agbata, ti londo na mbeni yanga ti kodro ti Égypte ti si na mbeni yanga ni.+ 22  Gï sese ti aprêtre la lo vo ni pëpe,+ ngbanga ti so kobe ti aprêtre alondo na Pharaon, na ala te kobe so Pharaon ayeke mû na ala. Ndani la ala kä sese ti ala pëpe. 23  Tongaso, Joseph atene na azo ni: “Laso mbi vo ala nga na sese ti ala na Pharaon awe. Ngongoa ti kobe la, ala lu ni. 24  Tongana akobe ni asara awe, ala mû oku mbage ni na Pharaon,+ me ambage osio ni aga ti ala tongana ngongoa ti lungo ni na yaka nga tongana kobe ti ala, ti azo so ayeke na da ti ala nga ti amolenge ti ala.” 25  Tongaso, ala tene: “Mo sö fini ti e awe.+ Zia e nzere na lê ti seigneur ti e, nga e yeke ga angbâa ti Pharaon.”+ 26  Joseph asara si ye so aga mbela na kodro ti Égypte, mbela so angbâ na ngangu juska laso: Pharaon ayeke wara oku mbage ti akobe ti yaka. Gï sese ti aprêtre la aga ye ti Pharaon pëpe.+ 27  Azo ti Israël angbâ ti sara kodro na Égypte, na sese ti Goshen;+ ndo ni aga kodro ti ala, ala dü na ala ga tâ gbani gbani.+ 28  Jacob aduti na kodro ti Égypte ngu 17; tongaso ngu ti Jacob kue ayeke ngu 147.+ 29  Lango ti kuâ ti Israël aga nduru.+ Tongaso lo iri molenge ti lo Joseph na lo tene: “Tongana mbi nzere na lê ti mo, pardon, zia maboko ti mo na gbe ti cuisse ti mbi, na mo fa tâ ndoye na mbi nga fa so mo yeke be-ta-zo na mbi. Pardon, lu mbi na Égypte pëpe.+ 30  Tongana mbi kui,* mû kuâ ti mbi na Égypte mo gue mo lu ni na ndo so a lu akotara ti mbi dä.”+ Tongaso, Joseph atene: “Mbi yeke sara tongana ti so mo tene.” 31  Israël atene: “Deba yanga ti mo na mbi.” Joseph adeba yanga ti lo na lo.+ Ge, Israël akuku na mbage ti li ti gbogbo ti lo.+

Kete tënë

Wala “sara kodro na ando nde nde tongana wande.”
Wala “asara kodro na ando nde nde tongana awande.”
Na Hébreu: “mapa.”
Na Hébreu: “mapa.”
Na Hébreu: “lango na terê ti ababâ ti mbi.”