Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 38:1-30

LI TI ATËNË NI

  • Juda na Tamar (1-30)

38  Na ngoi ni so, Juda azia aita ti lo na lo gue lo leke tente ti lo nduru na mbeni zo ti kodro ti Adullam so iri ti lo ayeke Hirah.  Kâ, Juda abâ mbeni molenge-wali ti mbeni zo ti Canaan+ so iri ti lo ayeke Shua. Lo mû lo na wali, lo bungbi na lo.  Wali ni amû ngo. Na pekoni, lo dü molenge-koli, na Juda azia iri ti lo Er.+  Lo kiri lo mû ngo, lo dü molenge-koli, na lo zia iri ti lo Onan.  Lo kiri lo dü molenge-koli, na lo zia iri ti lo Shélah. Andâ lo* yeke na Aczib+ na ngoi so wali ni adü molenge ni.  Mbeni lâ, Juda amû wali na kozo molenge ti lo Er, iri ti lo ayeke Tamar.+  Me sarango ye ti Er, kozo molenge ti Juda, anzere na Jéhovah pëpe; tongaso Jéhovah afâ lo.  Tongaso, Juda atene na Onan: “Mo sara mariage na wali ti ita ti mo tongana ti so a hunda, mo bungbi na lo, na mo dü amolenge na iri ti ita ti mo.”+  Me Onan ahinga so amolenge ni ayeke duti ande ti lo pëpe.+ Tongaso, na ngoi so lo yeke bungbi na wali ti ita ti lo, lo tuku ngu ti terê ti lo na sese, tongaso si lo dü amolenge na iri ti ita ti lo pëpe.+ 10  Ye so lo sara so ayeke sioni na lê ti Jéhovah; ni la lo fâ lo nga.+ 11  Juda atene na kogara ti lo Tamar: “Duti tongana wali-mua na da ti babâ ti mo juska molenge ti mbi Shélah akono si”, teti lo yeke tene na yâ ti bê ti lo, lo tene: “Lo nga lo lingbi ti kui tongana aita ti lo.”+ Tongaso Tamar ague, lo lango na ndo ti babâ ti lo. 12  A si na mbeni ngoi, wali ti Juda so ayeke molenge ti Shua+ akui. Tongana ngoi ti sarango vundu ti kuâ ni ahunzi awe, Juda ague na ndo ti azo ti fango kuä ti terê ti ataba ti lo na Timnah,+ lo na kamarade ti lo Hirah, zo ti kodro ti Adullam.+ 13  A tene na Tamar, a tene: “Kogara ti mo ti koli ayeke gue na Timnah ti fâ kuä ti terê ti ataba ti lo.” 14  Tongaso Tamar azi bongo ti lo ti wali-mua, na lo kanga mbeni kota lê ti bongo na terê ti lo. Lo bi voile na li ti lo, na lo duti na yanga ti gbata ti Énaïm so ayeke na lege ti guengo na Timnah, teti lo bâ so Shélah akono awe, me a mû lo na wali na Shélah pëpe.+ 15  Tongana lê ti Juda atï na ndö ti lo, hio lo bâ lo tene wali-ndumba la, ngbanga ti so lo kanga lê ti lo na bongo awe. 16  Tongaso lo gue na mbage ti lo na terê ti lege ni na lo tene: “Pardon, zia mbi bungbi na mo ma.” Andâ lo hinga pëpe so a yeke kogara ti lo la.+ Ye oko, wali ni atene: “Mo yeke mû nyen na mbi si mo bungbi na mbi?” 17  Lo tene: “Mbi yeke mû mbeni kete ngasa ti mbi ti tokua na mo.” Me wali ni atene: “Mo yeke zia mbeni ye juska mo tokua ngasa ni si?” 18  Juda atene: “Mo ye mbi zia nyen na mo?” Wali ni atene: “Bague ti mo ti kpongo na nzoroko,+ kamba ti mo nga na keke ti mo so ayeke na maboko ti mo.” Tongaso lo mû aye ni so na lo, lo bungbi na lo na lo zia ngo na yâ ti lo. 19  Na pekoni, Tamar alondo lo gue ti lo, lo zi kota lê ti bongo ni na terê ti lo, na lo yü bongo ti lo ti wali-mua. 20  Juda atokua kete ngasa ni na maboko ti kamarade ti lo, zo ti kodro ti Adullam,+ ti tene lo mû aye so lo zia na wali ni, me lo wara wali ni pëpe. 21  Tongaso lo hunda azo ti kodro ni, lo tene: “Wali-ndumba* so ayeke na Énaïm ge, so aduti na terê ti lege so ayeke na ndo wa?” Ala tene: “Wali-ndumba ayeke na ndo so lâ oko pëpe.” 22  Lo kiri na ndo ti Juda, lo tene: “Mbi wara lo pëpe, nga, azo ti kodro ni atene: ‘Wali-ndumba ayeke na ndo so lâ oko pëpe.’” 23  Tongaso, Juda atene: “Zia aye ni angbâ na lo, si e tï buba na lê ti azo pëpe. Kota ye ni ayeke so mbi tokua kete ngasa ni, me mo wara lo pëpe.” 24  Me nze ota tongaso na pekoni, a tene na Juda, a tene: “Kogara ti mo Tamar asara ye tongana wali-ndumba, na lo mû ngo na pekoni.” Na mango tënë so, Juda atene: “Ala sigi na lo si a gbi lo.”+ 25  Na ngoi so a yeke sigi na lo, lo tokua ndo na kogara ti lo, lo tene: “Koli so ayeke wa ti aye so la azia ngo ni na yâ ti mbi.” Nga lo tene: “Pardon, bâ ni nzoni si: bague ti kpongo na nzoroko ni, kamba ni nga na keke ni ayeke ti zo wa?”+ 26  Juda abâ ni nzoni na lo tene: “Lo yeke mbilimbili ahon mbi, ngbanga ti so mbi mû lo na molenge ti mbi Shélah pëpe.”+ Lo kiri lo bungbi na lo pëpe. 27  Na ngoi so lo ye ti dü, a bâ so amolenge use la ayeke na yâ ti lo. 28  Na ngoi so lo yeke dü, oko ayôro maboko ti lo, na hio, matrone ni amû bengba kamba lo kanga na maboko ti molenge ni, lo tene: “Lo so la asigi kozo.” 29  Gï so lo gboto maboko ti lo, mo ye ti bâ, ita ti lo ti koli asigi; tongaso matrone ni adekongo: “Mo suru lege ti mo wani!” Ni la a zia iri ti lo Pérès.*+ 30  Na pekoni, ita ti lo ti koli so bengba kamba ayeke na maboko ti lo asigi, na a zia iri ti lo Zérah.+

Kete tënë

So ti tene Juda.
Na Hébreu: “Wali-ndumba ti mbeni temple.”
Ndani aye ti tene “Surungo ye na ngangu.” Âmanke a ye ti sara tënë ti terê ti wali so asuru na ngoi ti dungo.