Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 37:1-36

LI TI ATËNË NI

  • Abango li so Joseph abâ (1-11)

  • Joseph na aita ti lo so asara kota bê (12-24)

  • A kä Joseph na ngbâa (25-36)

37  Jacob angbâ ti sara kodro na sese ti Canaan, ndo so babâ ti lo asara kodro dä tongana wande.+  Mbaï ti Jacob ayeke so. Na ngoi so Joseph+ ayeke na ngu 17, lo na aita ti lo ti koli, amolenge ti Bilhah+ na ti Zilpah+ so ayeke awali ti babâ ti lo, ayeke bata ataba.+ Joseph aga afa na babâ ti ala asioni ye so ala yeke sara.  Israël aye Joseph mingi ahon tanga ti amolenge ti lo ti koli kue,+ ndali ti so lo yeke molenge ti lâ ti mbakoro ti lo; lo fü na lo mbeni pendere yongoro bongo.  Tongana tanga ti aita ti lo ti koli abâ so babâ ti ala aye lo mingi ahon ala, ala to nda ti ke lo, na ala yeke sara tënë na lo yeke* pëpe.  Mbeni lâ, Joseph abâ li ti lo, na lo fa peko ni na aita ti lo;+ ye so lo tene na ala asara si ala ke lo ahon ti kozo.  Lo tene na ala: “Pardon, ala mä bango li so mbi bâ:  Mbi na ala e yeke na yaka, e yeke fâ akobe ti yaka ni na e yeke kanga gere ni; mo ye ti bâ, akobe ti mbi so mbi fâ si mbi kanga gere ni so alondo aluti na nduzu, na akobe ti ala so ala fâ si ala kanga gere ni so angoro ti mbi ni na akuku na gbe ni.”+  Me aita ti lo atene na lo: “Mo ye ti tene so mo yeke duti ande gbia na ndö ti e nga mo yeke komande e?”+ Ala kiri ala ke lo ahon ti kozo ndali ti bango li ti lo nga na tënë so lo tene.  Na pekoni, lo kiri lo bâ li ti lo na lo fa peko ni na aita ti lo, lo tene: “Mbi kiri mbi bâ li ti mbi. Ti so ni so, lâ, nze na atongoro 11 akuku na gbe ti mbi.”+ 10  Lo fa peko ni na babâ ti lo nga na aita ti lo; na babâ ti lo asuku na lo nga lo tene na lo: “Bango li so mo bâ so aye ti tene nyen la? A ye ti tene so mbi na mama ti mo nga na aita ti mo, e yeke ga na terê ti mo e kuku na gbe ti mo?” 11  Aita ti lo ti koli asara bê na terê ti lo,+ me babâ ti lo abata tënë so. 12  Aita ti lo ague na anyama ti babâ ti ala ti te pere nduru na Sichem.+ 13  Mbeni ngoi na pekoni, Israël atene na Joseph, atene: “Aita ti mo ayeke bata anyama nduru na Sichem ape? Ga, mbi tokua mo na ala.” Joseph atene na lo: “Tene tokua ni!” 14  Lo tene na lo: “Pardon, gue mo bâ wala aita ti mo ayeke na nzoni terê nga mo bâ wala anyama ni ayeke na nzoni terê, na mo kiri mo tene na mbi.” Tongaso lo londo na popo-hoto* ti Hébron,+ lo mû lege ti gue na Sichem. 15  Mbeni koli awara lo, lo yeke tambela gï tongaso na yâ ti ngonda. Koli ni ahunda lo: “Mo yeke gi nyen?” 16  Lo tene: “Mbi yeke gi aita ti mbi la. Pardon, ala yeke bata anyama ni na ndo wa?” 17  Koli ni atene: “Ala londo ge ala hon awe, ngbanga ti so mbi mä ala tene: ‘E gue na Dothan.’” Tongaso Joseph ague na peko ti ala, na lo wara ala na Dothan. 18  Na ngoi so lo ngbâ ayo kete na ala, lê ti ala atï na ndö ti lo; kozo si lo si na terê ti ala, ala to nda ti mä terê na ndö ti lo ti fâ lo. 19  Ala tene na mba, ala tene: “Bâ zo ti bango li so la ayeke ga so!+ 20  Ala ga e fâ lo, e bi kuâ ti lo na yâ ti mbeni dû ti ngu so; na e tene mbeni sioni nyama ti ngonda la ate lo. Na pekoni, e bâ wala abango li ti lo ni ayeke ga ande tâ tënë.” 21  Tongana Ruben+ amä tënë so, lo gi ti zi lo na maboko ti ala. Tongaso lo tene: “E zi fini ti lo pëpe.”*+ 22  Ruben akiri atene na ala: “Ala tuku mênë pëpe.+ Ala bi lo na yâ ti dû ti ngu so ayeke na yâ ti benyama so, me ala sara sioni na lo pëpe.”*+ Andâ lo ye ti zi lo na maboko ti ala ti kiri na lo na babâ ti lo. 23  Gï so Joseph asi na terê ti aita ti lo, ala zi yongoro bongo ti lo na terê ti lo, pendere yongoro bongo so lo yü,+ 24  ala mû lo, ala bi lo na yâ ti dû ti ngu ni. Na ngoi ni so, yâ ti dû ni ayeke senge; ngu ayeke na yâ ni pëpe. 25  Ala duti ti te ye. Tongana ala yô lê ti ala na nduzu, ala bâ azo ti mara ti Ismaël+ so alondo na Galaad ayeke ga. Achameau ti ala ayô aye so afun pendere: ngu ti keke so ayuru si akpengba, mafuta ti keke ti baume nga na aporo ti keke so ngu ni agbu ye gbungo;+ ala yeke descend na Égypte. 26  Tongaso Juda atene na aita ti lo, lo tene: “Tongana e fâ ita ti e si e honde tënë ti kuâ ti lo, nzoni ti nyen la e yeke wara dä?+ 27  Ala ga, e kä lo+ na azo ti mara ti Ismaël so, na e sara ye ti ngangu na lo pëpe. Kozoni kue, lo yeke ita ti e, mênë* ti e la.” Tongaso, ala mä ita ti ala ni. 28  Tongana awadengo buze ti kodro ti Madian+ ayeke hon, ala gboto Joseph na yâ ti dû ti ngu ni na gigi, na ala kä lo na azo ti mara ti Ismaël ni na lê ti nginza ti argent 20.+ Akoli so ague na Joseph na Égypte. 29  Na pekoni, tongana Ruben akiri na yanga ti dû ti ngu ni si lo bâ so Joseph ayeke na yâ ni pëpe, lo suru bongo na terê ti lo. 30  Na ngoi so lo kiri na terê ti aita ti lo, lo tene: “Molenge ni ayeke dä pëpe! Azo! Mbi yeke sara tongana nyen?” 31  Ala fâ mbeni koli-ngasa, na ala mû yongoro bongo ti Joseph, ala yôro ni na yâ ti mênë ni. 32  Na pekoni, ala tokua yongoro bongo so na babâ ti ala, ala tene: “Ye so e wara la. Pardon, bâ ni nzoni ti bâ wala bongo ti molenge ti mo la?”+ 33  Jacob abâ bongo ni nzoni si lo tene: “Yongoro bongo ti molenge ti mbi la! Mbeni sioni nyama ti ngonda ate Joseph awe! A suru yâ ti lo kete kete awe!” 34  Tongaso, Jacob asuru bongo na terê ti lo, lo kanga bongo ti vundu na yâ ti lo na lo sara mua ti molenge ti lo lango mingi. 35  Amolenge ti lo ti koli kue nga na ala ti wali kue ayeke tara ti dë bê ti lo, me lo ke ti tene a dë bê ti lo, na lo yeke tene: “Mbi yeke ngbâ ti toto molenge ti mbi juska mbi descend na yâ ti Dû ti kuâ!”*+ Babâ ti lo angbâ ti toto lo. 36  Na Égypte, azo ti Madian akä lo na Potiphar, mbeni kota zo na yangbo ti Pharaon+ nga mokonzi ti agarde.+

Kete tënë

Na Hébreu: “na siriri.”
Wala “kpangbala ndo.”
Wala “pika âme ti lo pëpe.”
Wala “ala zia maboko na ndö ti lo pëpe.”
Na Hébreu: “mitele.”
Wala “Shéol,” so ti tene dû ti kuâ so azo kue ayeke gue dä. Bâ na kete bakari.