Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 30:1-43

LI TI ATËNË NI

  • Bilhah adü Dan na Nephtali (1-8)

  • Zilpah adü Gad na Aser (9-13)

  • Léa adü Issacar na Zabulon (14-21)

  • Rachel adü Joseph (22-24)

  • Anyama ti Jacob aga gbani (25-43)

30  Tongana Rachel abâ so lo dü molenge oko pëpe na Jacob, lo sara mbanda na terê ti ita ti lo ti wali, si lo tene na Jacob: “Mû na mbi molenge; tongaso pëpe, mbi yeke kui.”  Ngonzo asara Jacob ngangu na terê ti Rachel, si lo tene: “Mbi la mbi yeke na place ti Nzapa so agbanzi mo ti dü?”*  Tongaso, Rachel atene: “Bâ, ngbâa ti mbi Bilhah+ la. Bungbi na lo, si lo dü na place ti mbi,* tongaso si mbi nga kue mbi wara amolenge na lege ti lo.”  Ni la lo mû zo ti kua ti lo Bilhah na Jacob ti ga wali ti lo, na Jacob abungbi na lo.+  Bilhah amû ngo, na pekoni lo dü molenge-koli na Jacob.  Rachel atene: “Nzapa afâ yâ ti ngbanga ti mbi awe, nga lo mä go ti mbi, si lo mû na mbi molenge-koli.” Ndani la lo zia iri ti lo Dan.*+  Bilhah, zo ti kua ti Rachel, akiri amû ngo, na pekoni lo dü use molenge-koli na Jacob.  Rachel atene: “Mbi tiri atiri ti pongo na ita ti mbi ti wali. Mbi sö benda nga!” Tongaso, lo zia iri ti lo Nephtali.*+  Tongana Léa abâ so lo dü encore ape, lo mû zo ti kua ti lo Zilpah na Jacob ti ga wali ti lo.+ 10  Na pekoni, Zilpah, zo ti kua ti Léa, adü molenge-koli na Jacob. 11  Na Léa atene: “So pasa na mbi!” Tongaso lo zia iri ti lo Gad.*+ 12  Na pekoni, Zilpah, zo ti kua ti Léa, adü use molenge-koli na Jacob. 13  Léa atene: “So ngia na mbi! teti amolenge-wali ayeke tene ande so mbi yeke wali so ayeke na ngia.”+ Tongaso lo zia iri ti lo Aser.*+ 14  Na ngoi ti kongo lê ti blé, Ruben+ ague ti fono na lo wara amandragore* na ngonda. Tongaso, lo ga na ni na mama ti lo Léa. Rachel atene na Léa: “Pardon, mû na mbi ambeni mandragore ti molenge ti mo ni.” 15  Léa atene na Rachel: “So mo mû koli ti mbi awe so, mo bâ mo tene kete ye la?+ Fadeso mo ye ti mû nga amandragore ti molenge ti mbi?” Tongaso, Rachel atene: “Tënë ayeke dä pëpe; lo yeke lango ande na mo na bï so ndali ti amandragore ti molenge ti mo.” 16  Tongana Jacob alondo na ngonda lo yeke kiri na lakui, Léa asigi, lo mû devant ti lo, na lo tene: “A yeke mbi la mo yeke bungbi na mbi, ndali ti so mbi vo mo na amandragore ti molenge ti mbi awe.” Tongaso, lo lango na lo na bï ni so. 17  Nzapa amä Léa; na Léa amû ngo, na pekoni lo dü oku molenge-koli na Jacob. 18  Léa atene: “Nzapa amû na mbi futa,* ndali ti so mbi mû zo ti kua ti mbi na koli ti mbi.” Tongaso, lo zia iri ti lo Issacar.*+ 19  Léa akiri amû ngo, na pekoni lo dü omene molenge-koli na Jacob.+ 20  Léa atene: “Nzapa amû mbeni ye na mbi, mbeni nzoni ye. Ti fadeso, koli ti mbi ayeke kanga bê ti lo na mbi,+ ngbanga ti so mbi dü na lo amolenge-koli omene.”+ Tongaso, lo zia iri ti lo Zabulon.*+ 21  Na pekoni, lo dü molenge-wali, lo zia iri ti lo Dinah.+ 22  Na pekoni, Nzapa adabe ti lo na Rachel, Nzapa amä lo na lo sara si lo lingbi ti mû ngo.*+ 23  Lo mû ngo, na lo dü molenge-koli. Lo tene: “Nzapa azi kamene na lê ti mbi awe!”+ 24  Tongaso, lo zia iri ti lo Joseph,*+ na lo tene: “Jéhovah azia mbeni molenge-koli na ndö ni na mbi.” 25  Kete na peko ti so Rachel adü Joseph, Jacob atene na Laban: “Zia mbi, mbi kiri na ndo ti mbi nga na kodro ti mbi.+ 26  Mû na mbi awali ti mbi na amolenge ti mbi, so mbi sara kua na mo ndali ti ala, ti tene mbi gue; teti mo hinga bien lege so mbi sara kua na mo.”+ 27  Laban atene na lo: “Mbi gbu gere ti mo, mo hon pëpe; mbadi so mbi bâ* afa so grâce na mo la Jéhovah ayeke sara tufa na ndö ti mbi.” 28  Lo kiri lo tene: “Fa na mbi futa ti kua ti mo, na mbi yeke mû ni na mo.”+ 29  Tongaso, Jacob atene na lo: “Mo hinga tongana nyen la mbi sara kua na mo nga tongana nyen la mbi bata anyama ti mo.+ 30  Kozo si mbi ga, ye ti mo ayeke gï kete, na pekoni anyama ti mo awu mingi, na Jéhovah asara tufa na ndö ti mo ngbene ye so mbi si ge. Tongaso, lawa la mbi yeke sara mbeni ye ndali ti sewa ti mbi wani?”+ 31  Tongaso, lo hunda lo, lo tene: “Mo ye mbi mû na mo nyen?” Jacob atene: “Mû na mbi ye oko pëpe! Tongana mo sara na mbi ye so, mbi yeke kiri ti fa lege na anyama ti mo na ti bata ala.+ 32  Mbi yeke hon ande na popo ti anyama ti mo kue laso. Na popo ti ataba, ala kue so terê ti ala ayeke top top na ala kue so acouleur ti terê ti ala ayeke nde nde, mo zia ala nde. Na popo ti akete koli-taba ni, ala kue so terê ti ala ayeke marron marron, mo zia ala nde. Nga, na popo ti awali-ngasa ni, ala kue so acouleur ti terê ti ala ayeke nde nde nga na ala so terê ti ala ayeke top top, mo zia ala nde. A to nda ni laso, amara ni so kue ayeke duti ande futa ti mbi.+ 33  Tongana mbeni lâ mo ga ti bâ futa ti mbi, sarango ye ti mbi mbilimbili* la ayeke kiri ande tënë na place ti mbi. Awali-ngasa so terê ti ala ayeke top top pëpe, ala so acouleur ti terê ti ala ayeke nde nde pëpe nga na akete koli-taba so terê ti ala ayeke marron marron pëpe, tongana mo bâ ala na mbi ge, a yeke ye ti nzi la.” 34  Laban atene: “So nzoni! Zia a duti tongana ti so mo tene.”+ 35  Tongaso, na lango ni so, akoli-ngasa so terê ti ala ayeke rayé rayé nga na ala so acouleur ti terê ti ala ayeke nde nde, lo zia ala nde. Nga, awali-ngasa kue so terê ti ala ayeke top top nga na ala so acouleur ti terê ti ala ayeke nde nde, lo zia ala nde. Akete koli-taba kue so mbage ti terê ti ala ayeke vuru vuru nga na ala kue so terê ti ala ayeke marron marron, lo zia ala nde; na lo mû ala na amolenge ti lo ti koli ti bata ala. 36  Na peko ti ye so, lo sara si popo ti lo na Jacob ayo alingbi na tambela ti lango ota, na Jacob ayeke bata anyama ti Laban so angbâ. 37  Jacob amû amaboko ti keke ti styrax, ti amande na ti platane so a fâ ni fini fini, lo zi ambeni mbage ti poro ti akeke ni ti tene avuru ni aduti dä top top. 38  Akeke so lo zi ambage ti poro ni so, lo zia ni na devant ti anyama ni, na yâ ti akete dû so ngu ayeke hon dä, so anyama ni ayeke ga ti nyon ngu dä, si ala wara nzara ti montengo terê na devant ti akeke ni na ngoi so ala ga ti nyon ngu. 39  Tongaso, nzara ti montengo terê asara anyama ni na devant ti akeke so, na ala yeke dü anyama so terê ti ala ayeke rayé rayé, ala so terê ti ala ayeke top top nga na ala so acouleur ti terê ti ala ayeke nde nde. 40  Jacob amû akete koli-taba, lo zia ala nde; na pekoni lo sara si tanga ti anyama ni abâ ndo na mbage ti ala so ayeke rayé rayé nga na ala kue so ayeke marron marron na popo ti anyama ti Laban. Ati lo nyama ni, lo zia ala nde, lo bungbi ala na anyama ti Laban pëpe. 41  Na ngoi kue so angangu nyama ni ayeke wara nzara ti montengo terê, Jacob ayeke zia akeke ni na yâ ti akete dû so ngu ayeke hon dä na devant ti anyama ni, si nzara ti montengo terê asara ala nduru na akeke ni. 42  Me tongana anyama ni awoko, lo yeke zia akeke ni kâ pëpe. Tongaso, anyama so awoko ayeke lakue ti Laban, me angangu ni ayeke ti Jacob.+ 43  Lo wara mosoro mingi; lo wara gbâ ti anyama, azo ti kua ti koli na ti wali, achameau nga na akororo.+

Kete tënë

Wala “so agbanzi ngongoa na mo?”
Na Hébreu: “lo dü na ndö ti gere ti mbi.”
Ndani aye ti tene “Juge.”
Ndani aye ti tene “Atiri ti pongo so mbi tiri.”
Ndani aye ti tene “Nzoni pasa.”
Ndani aye ti tene “Ngia; Dutingo na ngia.”
A ye ti kpa babolo, na a yeke lë lê ni.
Wala “nginza ti kua so zo ayeke wara.”
Ndani aye ti tene “Lo yeke futa so zo awara.”
Ndani aye ti tene “Ti kanga bê.”
Na Hébreu: “Nzapa amä lo, na lo zi lege ti dungo ti lo.”
Nduru iri ti Josiphiah, so ndani aye ti tene “Zia Jah azia mbeni na ndö ni.”
Wala “gbâ ti aye so mbi bâ.”
Wala “na lege ni.”