Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 3:1-24

LI TI ATËNË NI

  • Tongo nda ti siokpari ti zo (1-13)

    • Kozo mvene (4, 5)

  • Jéhovah afâ ngbanga na ndö ti azo ti kengo yanga ni (14-24)

    • A sara tënë ti hale ti wali ni (15)

    • A tomba Adam na Ève na Éden (23, 24)

3  Na popo ti anyama kue ti ngonda so Jéhovah Nzapa asara, ngbo+ la asara ye na hange* ahon atanga ni kue. Tongaso, lo tene na wali ni: “Tâ tënë, Nzapa atene ala te lê ti akeke kue ti yaka so ape?”+  Wali ni atene na ngbo ni: “E lingbi ti te lê ti akeke ti yaka ni.+  Me ti lê ti keke so ayeke na milieu ti yaka ni,+ Nzapa atene na e, atene: ‘Ala te ni pëpe, ala ndu nga ni pëpe ngbanga ti ala kui.’”  Ngbo ni atene na wali ni: “Ti tâ tënë ni, ala yeke kui pëpe.+  Nzapa ahinga so gï na lango so ala yeke te ni, lê ti ala ayeke zi, na ala yeke ga tongana Nzapa, ala yeke hinga ye ti nzoni na ye ti sioni.”+  Tongaso, wali ni abâ so lê ti keke ni ayeke nzoni ti tene zo ate, na a yeke mbeni ye so ayeke pendere ti tene zo abâ ni. Gï na bango lê ti keke ni, a yeke pendere mingi. Ni la lo ko ni, lo te.+ Na pekoni, lo mû mbeni nga na koli ti lo na ngoi so koli ni aga na terê ti lo, na koli ni ate ni.+  Tongaso, lê ti ala use kue azi, na ala ga ti bâ so terê ti ala ayeke senge. Ni la ala fü akugbe ti keke ti figue, ala sara na kambusu ndali ti ala wani.+  Na pekoni, ala mä go ti Jéhovah Nzapa na tango so lo yeke tambela na yâ ti yaka ni na lakui, na ngoi so pendere pupu ayeke ya. Koli ni na wali ti lo ahonde terê ti ala na popo ti akeke ti yaka ni ti tene Jéhovah Nzapa abâ ala pëpe.  Jéhovah Nzapa airi koli ni ngbii, na lo hunda lo: “Mo yeke na ndo wa?” 10  Na pekoni, lo tene: “Mbi mä fade go ti mo na yâ ti yaka ni, me mbeto asara mbi ngbanga ti so terê ti mbi ayeke senge, ni la mbi honde terê ti mbi.” 11  Nzapa ahunda lo: “Zo wa la atene na mo so terê ti mo ayeke senge?+ Mo te lê ti keke so mbi mû yanga na mo ti te pëpe so?”+ 12  Koli ni atene: “Wali so mo mû lo na mbi so, lo la lo mû na mbi lê ti keke ni si mbi te.” 13  Tongaso, Jéhovah Nzapa ahunda wali ni: “Nyen la mo sara so?” Wali ni atene: “Ngbo la ahanda mbi si mbi te ni.”+ 14  Jéhovah Nzapa atene na ngbo ni:+ “Na popo ti anyama kue ti kodro nga na anyama kue ti ngonda, deba ayeke na li ti mo ndali ti ye so mo sara so. Mo yeke hara na yâ ti mo nga mo yeke te fuku ti sese na yâ ti gigi ti mo kue. 15  Mbi yeke zia kengo terê+ na popo ti mo+ na wali ni,+ nga na popo ti hale* ti mo+ na hale* ti lo.+ Lo yeke neka* ande li ti mo,+ na mo yeke dë ande* peko ti gere ti lo.”+ 16  Lo tene na wali ni: “Mbi yeke sara si mo bâ ande pasi mingi na ngo; mo yeke dü ande molenge na yâ ti pasi. Nzara ti bê ti mo ayeke duti ande mingi na mbage ti koli ti mo, na lo yeke komande mo.” 17  Lo tene na Adam:* “So mo mä wali ti mo na mo te lê ti keke so mbi mû yanga na mo,+ mbi tene: ‘Mo te ni pëpe’, a deba sese ni ndali ti mo+ awe. Na yâ ti gigi ti mo kue, mo yeke bâ pasi si mo wara kobe so asigi na sese ni.+ 18  Sese ni ayeke dü na mo asisi nga na akî, na mo yeke te akugbe ti kasa. 19  Mo yeke te kobe* na gbiki ti li ti mo juska mo kiri na sese, teti a sara mo na sese.+ Mo yeke fuku ti sese, na mo yeke kiri ande na fuku ti sese.”+ 20  Na peko ti aye so, Adam azia iri ti wali ti lo Ève,* ndali ti so lo yeke ga mama ti azo kue so ayeke na fini.+ 21  Jéhovah Nzapa amû poro ti nyama, lo leke na ayongoro bongo ndali ti Adam na wali ti lo, ti yü na ala.+ 22  Jéhovah Nzapa atene: “Bâ, zo aga tongana e awe na lege so lo hinga ye ti nzoni na ye ti sioni.+ Tongaso, ti tene lo yôro maboko ti lo pëpe ti ko nga lê ti keke ti fini+ si lo te na lo ngbâ na fini kpu na kpu,* . . .” 23  Ni la Jéhovah Nzapa atomba lo na yâ ti yaka ti Éden+ ti sigi ti fâ yaka na sese so a sara lo na ni.+ 24  Tongaso, lo tomba zo na gigi, na lo zia achérubin+ na mbage ti est ti yaka ti Éden nga na épée so wâ ayeke na terê ni si ayeke tourné lakue ti kanga lege so ague na keke ti fini.

Kete tënë

Wala “lê ti lo ahan mingi; asara ye na mayele mingi.”
Na Hébreu: “ngongoa.”
Na Hébreu: “ngongoa.”
Wala “zia kä; pika.”
Wala “zia kä ande na; pika ande.”
Ndani aye ti tene “Zo so a leke lo na sese; Azo kue.”
Na Hébreu: “mapa.”
Ndani aye ti tene “Lo so ayeke na fini.”
Wala “lakue lakue.”