Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 26:1-35

LI TI ATËNË NI

  • Isaac na Rébecca na kodro ti Guérar (1-11)

    • Nzapa akiri atene na Isaac zendo so lo mû lani na Abraham (3-5)

  • Papa na ndö ti adû ti ngu (12-25)

  • Mbele so Isaac ate na Abimélek (26-33)

  • Ésaü amû awali use ti kodro ti Heth (34, 35)

26  Mbeni kota nzara atï na kodro ni, nde na kozo kota nzara so atï na ngoi ti Abraham;+ tongaso Isaac ague na Guérar na ndo ti Abimélek, gbia ti aPhilistin.  Jéhovah asi na lo, lo tene: “Gue na Égypte pëpe. Sara kodro na sese so mbi yeke fa na mo.  Sara kodro tongana wande na sese ni so,+ na mbi yeke ngbâ na mo nga mbi yeke sara tufa na ndö ti mo, ndali ti so mbi yeke mû ande asese so kue na mo nga na ahale* ti mo.+ Nga, mbi yeke sara ye ti peko ti bä so mbi dë lani na babâ ti mo Abraham,+ mbi tene:  ‘Mbi yeke sara ande si ahale* ti mo awu mingi tongana atongoro ti yayu,+ na mbi yeke mû asese so kue na ahale* ti mo;+ na lege ti hale* ti mo, amara kue ti sese ayeke wara ande tënë nzoni ndali ti ala wani,’+  ngbanga ti so Abraham amä yanga ti mbi na lo ngbâ lani ti sara aye so mbi hunda na lo ti sara, lo bata acommandement ti mbi, ambela ti mbi nga na andia ti mbi.”+  Tongaso, Isaac angbâ ti sara kodro na Guérar.+  Akoli ti kodro ni ayeke hunda lo tënë ti wali ti lo, na lo yeke tene na ala: “Lo yeke ita ti mbi ti wali.”+ Lo yeke na mbeto ti tene: “Lo yeke wali ti mbi,” ndali ti so lo tene: “Peut-être akoli ti kodro so ayeke fâ mbi ande ngbanga ti Rébecca,” ndali ti so lo yeke lani pendere mingi.+  Mbeni lâ, Abimélek gbia ti aPhilistin ayeke bâ ndo na lê ti fenêtre, na lo bâ so Isaac ayeke sara ngia na wali ti lo Rébecca.*+  Hio, Abimélek airi Isaac na lo tene: “Me wali ti mo la! Ka ngbanga ti nyen mo tene lo yeke ita ti mo?” Isaac atene: “Mbi tene tongaso ngbanga ti so mbi sara mbeto ti tene a fâ mbi ndali ti lo.”+ 10  Abimélek atene: “Nyen la mo sara na e tongaso?+ Gï tongana ye ti ngia, mbeni zo alingbi fade ti lango na wali ti mo, na mo ga na tënë na li ti e!”+ 11  Abimélek amû yanga na azo ni kue, lo tene: “Zo so andu koli so wala wali ti lo, a yeke fâ lo!” 12  Na pekoni, Isaac alu ngongoa ti kobe na sese ni; na yâ ti ngu ni, lo wara juska fani 100 ye so lo lu, teti Jéhovah airi tënë nzoni na ndö ti lo.+ 13  Tongaso lo ga zo ti mosoro, lo ga kota ahon ti kozo juska lo ga kota zo ti mosoro. 14  Lo wara ataba, abagara nga na gbâ ti azo ti kua;+ tongaso aPhilistin asara bê na terê ti lo. 15  A-Philistin amû hulengo sese ala kanga na adû ti ngu kue so azo ti kua ti babâ ti lo Abraham azi ni na ngoi ti babâ ti lo ni.+ 16  Na pekoni, Abimélek atene na Isaac: “Londo na terê ti e mo hon, ndali ti so mo ga ngangu mingi ahon e.” 17  Tongaso, Isaac alondo kâ, lo gue lo sara kodro na popo-hoto* ti Guérar.+ 18  Isaac akiri azi adû ti ngu so a zi na ngoi ti babâ ti lo Abraham me so aPhilistin akanga ni na peko ti kuâ ti Abraham;+ na lo kiri lo iri adû ti ngu ni na airi so babâ ti lo airi na ni lani.+ 19  Na ngoi so azo ti kua ti Isaac ayeke zi adû na yâ ti popo-hoto* ni, ala wara mbeni nzoni ngu kâ. 20  Aberger ti kodro ti Guérar ato nda ti papa na aberger ti Isaac, ala tene: “Ngu ti e la!” Tongaso, Isaac airi dû ti ngu ni so Ésec,* ndali ti so ala papa na lo. 21  Ala zi mbeni dû ti ngu ni nde, na ala kiri ala papa na ndö ni. Tongaso lo iri ni Sitnah.* 22  Na pekoni, lo londo na ndo so lo hon, lo zi mbeni dû ti ngu ni, me ala papa na ndö ni pëpe. Tongaso, lo iri ni Réhoboth* nga lo tene: “A yeke ndali ti so Jéhovah amû na e fadeso kota ndo nga lo sara si e dü mingi na yâ ti kodro ni.”+ 23  Lo londo kâ lo monté na Béer-Shéba.+ 24  Na bï ni so, Jéhovah asi na lo, lo tene: “Mbi yeke Nzapa ti babâ ti mo Abraham.+ Sara mbeto pëpe,+ ndali ti so mbi yeke na mo, mbi yeke iri tënë nzoni na ndö ti mo na mbi yeke sara si ahale* ti mo awu mingi ndali ti wakua ti mbi Abraham.”+ 25  Tongaso, Isaac aleke mbeni gbalaka na ndo ni so na lo sepela iri ti Jéhovah.+ Lo leke tente ti lo kâ,+ na azo ti kua ti lo azi dû ti ngu kâ. 26  Na pekoni, Abimélek alondo na Guérar lo ga na ndo ti Isaac, lo na Ahuzzath, wawango ti lo, na Phicol, mokonzi ti aturugu ti lo.+ 27  Isaac ahunda ala, atene: “Ala ga na mbi ge ngbanga ti nyen? so ala la ake mbi, na ala hunda na mbi ti hon yongoro na terê ti ala so?” 28  Ala tene: “E bâ biani so Jéhovah ayeke na mo.+ Ni la e mä terê na popo ti e ti tene tënë so na mo: ‘Pardon, e deba yanga na popo ti e, nga e te mbele na popo ti e,+ 29  so mo yeke sara sioni na e pëpe tongana ti so e sara sioni na mo pëpe; e sara gï nzoni na mo na lege so e zia mo hon na siriri. Mo yeke fadeso zo so tufa ti Jéhovah ayeke na ndö ti lo.’” 30  Lo sara matanga ndali ti ala, ala te na ala nyon. 31  Ndade na ndapre ni, ala londo hio na ala deba yanga na popo ti ala.+ Na pekoni, Isaac atene na ala ti gue na siriri. 32  Na lango ni so, azo ti kua ti Isaac aga, ala sara tënë na lo na ndö ti dû ti ngu so ala zi,+ ala tene: “E wara ngu awe!” 33  Tongaso, lo iri dû ti ngu ni Shibah. Ndani la iri ti gbata ni ayeke Béer-Shéba+ juska laso. 34  Tongana Ésaü awara ngu 40, lo mû Judith molenge ti Beéri na Basémath molenge ti Élon ti ga awali ti lo. Beéri na Élon ayeke azo ti mara ti Heth.+ 35  Awali so aga mbeni ye ti ziango vundu na bê ti Isaac na Rébecca.+

Kete tënë

Na Hébreu: “ngongoa.”
Na Hébreu: “ngongoa.”
Na Hébreu: “ngongoa.”
Na Hébreu: “ngongoa.”
Wala “ayeke gbu Rébecca na kate ti lo.”
Bâ na kete bakari.
Bâ na kete bakari.
Ndani aye ti tene “Papa.”
Ndani aye ti tene “Bingo tënë na li ti zo.”
Ndani aye ti tene “Ando so akono.”
Na Hébreu: “ngongoa.”