Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 25:1-34

LI TI ATËNË NI

  • Abraham amû mbeni fini wali (1-6)

  • Tënë ti kuâ ti Abraham (7-11)

  • Amolenge ti Ismaël (12-18)

  • Dungo Jacob na Ésaü (19-26)

  • Ésaü akä droit ti lo ti kozo molenge (27-34)

25  Abraham akiri amû wali, iri ti lo ayeke Kéturah.  Na pekoni, wali ni adü na lo Zimran, Jocshan, Médan, Madian,+ Ishbac na Shuah.+  Jocshan adü Shéba na Dedan. Amolenge ti Dedan ayeke Ashurim, Létushim na Léummim.  Amolenge ti Madian ayeke Éphah, Épher, Hanok, Abida na Eldaah. Ala so kue so ayeke amolenge ti Kéturah.  Na mbeni ngoi na pekoni, Abraham amû aye ti lo kue na Isaac;+  me ti amolenge so awali ti Abraham ti use ndo adü, Abraham amû na ala amatabisi. Nga, na ngoi so lo de na fini, lo tene na ala ti hon yongoro na terê ti molenge ti lo Isaac,+ na mbage ti est, na ndo so a iri ni Est.  Ngu ti Abraham ayeke ngu 175.  Abraham awu tanga ti pupu ti lo na lo kui na peko ti so lo ga mbakoro mingi, lo te gigi aninga nga alingbi na lo; na lo wu terê ti lo tongana ti azo ti lo.*  Tongaso, amolenge ti lo Isaac na Ismaël alu lo na yâ ti kota dû ti tênë ti Macpélah, so abâ ndo lê na lê na Mamré,+ na yâ ti sese ti Éphron molenge ti Zohar so ayeke mbeni hale ti Heth, 10  sese so Abraham avo na maboko ti ahale ti Heth. A lu Abraham kâ, na terê ti wali ti lo Sara.+ 11  Na peko ti kuâ ti Abraham, Nzapa angbâ ti sara tufa na ndö ti molenge ti lo Isaac.+ Isaac asara kodro nduru na Béer-Lahaï-Roï.+ 12  Mbaï ti Ismaël,+ molenge ti Abraham so Agar+ zo ti Égypte so ayeke zo ti kua ti Sara adü na lo, ayeke so. 13  Amolenge ti Ismaël ti koli, na lege ti iri ti ala nga na lege ti sewa so ala londo dä, ayeke: Nébaïoth,+ kozo molenge ni, na pekoni Kédar,+ Adbéel, Mibsam,+ 14  Mishma, Dumah, Massa, 15  Hadad, Téma, Jétur, Naphish na Kédémah. 16  Amolenge ti Ismaël la, iri ti ala na lege ti ando so ala sara kodro dä nga na lege ti acamp ti ala* la, amokonzi 12 alingbi na agroupe ti mara ti ala.+ 17  Ngu ti Ismaël ayeke ngu 137. Lo wu tanga ti pupu ti lo na lo kui, na lo wu terê ti lo tongana ti azo ti lo.* 18  Ando so ala sara kodro dä alondo na Havilah+ nduru na Shur,+ so ayeke nduru na Égypte, ague asi na Assyrie. Lo sara kodro lani nduru na ndo so aita ti lo kue ayeke dä.*+ 19  Mbaï ti Isaac molenge ti Abraham+ ayeke so. Abraham adü Isaac. 20  Isaac ayeke na ngu 40 na ngoi so lo mû Rébecca, molenge ti Béthuel+ so ayeke Araméen zo ti kodro ti Paddan-Aram, ti ga wali ti lo; Rébecca ayeke nga ita ti Laban so ayeke Araméen. 21  Isaac ayeke voro yanga lakue na Jéhovah ndali ti wali ti lo, ndali ti so lo dü pëpe; tongaso Jéhovah amä toto ti Isaac, na wali ti lo Rébecca amû ngo. 22  Amolenge ni so ayeke na yâ ti lo atiri na popo ti ala;+ tongaso lo tene: “Tongana ye ni ayeke tongaso, ngbanga ti nyen ti ngbâ na fini?” Ni la lo hunda Jéhovah dä. 23  Jéhovah atene na lo: “Amara use ayeke na yâ ti mo,+ na amara use ayeke sigi na yâ ti mo.+ Ala yeke kangbi ande; mbeni mara ni ayeke duti ande ngangu ahon mbeni,+ na yaya ni ayeke sara kua na ngambe ni.”+ 24  Tongana lango ti dungo ti lo alingbi, mo ye ti bâ, angbo la ayeke na yâ ti lo. 25  Kozo molenge ni asigi, lo yeke bengba bengba, kuä ti terê ti lo ayeke mingi mo bâ mo tene lo yü bongo so a sara ni na kuä ti terê ti nyama;+ tongaso ala zia iri ti lo Ésaü.*+ 26  Na pekoni, ita ti lo asigi, na maboko ti lo agbu peko ti gere ti Ésaü;+ tongaso Isaac azia iri ti lo Jacob.*+ Isaac ayeke na ngu 60 na ngoi so Rébecca adü ala. 27  Amolenge-koli so akono, na Ésaü aga kpengba zo ti gingo nyama,+ lo ye ngonda mingi. Me Jacob aduti mingi ni na yâ ti atente na lo yeke zo so tënë ayeke na li ti lo pëpe.+ 28  Isaac aye Ésaü mingi, ngbanga ti so lo yeke ga na nyama na yanga ti lo, me Rébecca aye ti lo Jacob mingi.+ 29  Mbeni lâ, na ngoi so Jacob ayeke tö kobe, Ésaü alondo na ngonda aga, ngangu ahunzi na lo. 30  Ésaü atene na Jacob: “Pardon, mû na mbi mbeni* bengba kobe so* hio si! Ngangu ahunzi na mbi awe!”* Ndani la a mû na lo iri ti Édom.*+ 31  Jacob atene na lo: “Kä na mbi droit ti mo ti kozo molenge si!”+ 32  Ésaü atene: “So mbi yeke kui kuingo so! Droit ti kozo molenge asara nyen na mbi?” 33  Jacob akiri atene: “Deba yanga ti mo na mbi kozoni si!” Tongaso, Ésaü adeba yanga ti lo na Jacob nga lo kä droit ti lo ti kozo molenge na Jacob.+ 34  Jacob amû mapa na kobe ti lentille na Ésaü, tongaso lo te, lo nyon. Na pekoni, lo londo lo hon ti lo. Tongaso Ésaü abâ droit ti kozo molenge tongana mbumbuse ye.

Kete tënë

So ayeke mbeni fason ti tene so zo ni akui.
Wala “acamp so gbagba ayeke na terê ni.”
So ayeke mbeni fason ti tene so zo ni akui.
A lingbi nga ti tene “Lo ke aita ti lo kue.”
Ndani aye ti tene “Gbâ ti kuä ti terê.”
Ndani aye ti tene “Zo so agbu peko ti gere ti mbeni zo; Zo so amû place ti mba ti lo.”
Wala “mû na mbi mbeni kete.”
Na Hébreu: “bengba ye ni, ye ni so abe bengo so.”
Wala “Nzara ahon ndö ti mbi!”
Ndani aye ti tene “Bengba.”