Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 23:1-20

LI TI ATËNË NI

  • Tënë ti kuâ ti Sara nga na ndo so a lu lo dä (1-20)

23  Ngu ti Sara ayeke ngu 127; ngu ti lo kue la.+  Sara akui na Kiriath-Arba,+ so ayeke Hébron,+ na sese ti Canaan;+ Abraham atoto Sara nga lo sara vundu ti lo.  Na pekoni, Abraham alondo na terê ti kuâ ti wali ti lo na lo sara tënë na ahale ti Heth,+ lo tene:  “Mbi yeke wande so asara kodro na popo ti ala.+ Ala mû na mbi mbeni ndo ti ala si aga ndo ti mbi ti lungo akuâ, si mbi lu kuâ ti wali ti mbi dä.”  Ahale ti Heth atene na Abraham:  “Mä e si, seigneur ti e. Mo yeke na popo ti e tongana mokonzi so Nzapa asoro lo.*+ Lu kuâ ti wali ti mo na ndo so ayeke nzoni ahon tanga ti ando ti e ti lungo kuâ. Zo oko na popo ti e ayeke gbanzi mo pëpe na ndo ti lo ti lungo kuâ ti kanga lege na mo ti lu kuâ ti wali ti mo.”  Tongaso, Abraham alondo, lo kuku na gbe ti azo ti kodro ni, ahale ti Heth,+  na lo tene na ala: “Tongana ala yeda* ti tene mbi lu kuâ ti wali ti mbi, ala mä mbi na ala hunda Éphron, molenge ti Zohar ti koli,  ti kä na mbi kota dû ti tênë ti lo, kota dû ti tênë ti Macpélah so ayeke na yanga ti sese ti lo. Zia lo kä ni na mbi na lê ti ala, na mbi yeke futa ande na lo wungo ti argent kue so alingbi na ngere ti dû ti tênë ni,+ si a ga ndo ti mbi ti lungo kuâ.”+ 10  Éphron ayeke duti na popo ti ahale ti Heth. Tongaso, Éphron, zo ti mara ti Heth, akiri tënë na Abraham na mê ti ahale ti Heth nga na mê ti azo kue so ayeke lï na yanga ti gbagba ti gbata ti lo,+ lo tene: 11  “Ên-ën, seigneur ti mbi! Mä mbi si. Sese ni nga na kota dû ti tênë so ayeke na yâ ni, mbi mû ni na mo. Mbi mû ni na mo na lê ti azo ti mbi. Lu kuâ ti wali ti mo.” 12  Na mango tënë so, Abraham akuku na gbe ti azo ti kodro ni 13  na lo sara tënë na Éphron na mê ti ala, lo tene: “Pardon, mä mbi si! Mbi yeke futa na mo wungo ti argent kue so alingbi na ngere ti sese ni. Mû ni na maboko ti mbi, tongaso si mbi lu kuâ ti wali ti mbi dä.” 14  Éphron atene na Abraham: 15  “Seigneur ti mbi, mä mbi si. Ngere ti sese ni ayeke sicle* ti argent 400; a yeke nga mbeni tënë na popo ti mbi na mo pëpe. Gue, mo lu kuâ ti wali ti mo dä.” 16  Tongaso, Abraham amä Éphron, na Abraham ahaka na Éphron kilo ti argent so lo fa ni na mê ti ahale ti Heth: sicle* ti argent 400, a lingbi na nengo ti sicle so awadengo buze ayeda na ni.+ 17  A yeke tongaso si sese ti Éphron so ayeke na Macpélah, so abâ ndo lê na lê na Mamré, so ti tene sese ni, kota dû ti tênë so ayeke na yâ ni nga na akeke kue so ayeke na yâ ni, aga biani 18  ye ti Abraham so lo vo ni na lê ti ahale ti Heth, na lê ti azo kue so ayeke lï na yanga ti gbagba ti gbata ti lo. 19  Na pekoni, Abraham alu wali ti lo Sara na yâ ti kota dû ti tênë so ayeke na sese ti Macpélah lê na lê na Mamré, so ayeke Hébron, na sese ti Canaan. 20  A yeke tongaso si ahale ti Heth amû sese ni na kota dû ti tênë so ayeke na yâ ni na Abraham si aga ndo ti lo ti lungo kuâ.+

Kete tënë

A lingbi nga ti tene “kota mokonzi.”
Wala “âme ti ala ayeda.”
Sicle oko ane gramme 11,4. Bâ na B14.
Sicle oko ane gramme 11,4. Bâ na B14.