Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 22:1-24

LI TI ATËNË NI

  • Nzapa atene na Abraham ti mû Isaac na sandaga (1-19)

    • Azo ayeke wara tënë nzoni na lege ti hale ti Abraham (15-18)

  • Sewa ti Rébecca (20-24)

22  Na pekoni, tâ Nzapa atara bê ti Abraham;+ lo iri Abraham, lo tene: “Abraham!” Abraham ayeda, lo tene: “Mbi la!”  Nzapa atene: “Pardon, mû Isaac,+ molenge ti mo ti koli, oko molenge ti mo so mo ye lo mingi,+ na mo gue na sese ti Moriah;+ kâ, mû lo na sandaga so a zö ni agbi kue na ndö ti mbeni oko ti ahoto so mbi yeke fa na mo.”  Tongaso, Abraham alondo hio na ndapre, lo leke ye ti duti na ndö ti kororo ti lo, lo mû ambeni zo ti kua ti lo use na terê ti lo nga na molenge ti lo Isaac. Lo suru keke ti wâ ti zongo na sandaga ni, na lo londo, lo mû lege ti gue na ndo so tâ Nzapa afa na lo.  Na ota lango ni, Abraham ayô lê ti lo na nduzu na lo bâ ndo ni yongoro kâ.  Abraham atene na azo ti kua ti lo: “Ala ngbâ ge na kororo ni, me mbi na molenge ni e yeke gue kâ ti voro Nzapa, na e yeke kiri ti wara ala ge.”  Tongaso, Abraham amû keke ti wâ ti zongo na sandaga ni lo mû na molenge ti lo Isaac ti yô ni, lo mû wâ na maboko ti lo nga na zembe,* na ala use kue ahon legeoko.  Isaac atene na babâ ti lo Abraham: “Babâ!” Abraham atene: “Mbi la, molenge ti mbi!” Isaac ahunda lo, atene: “Wâ na keke ti wâ la, me taba ti sandaga ni ayeke na ndo wa?”  Abraham atene: “Molenge ti mbi, Nzapa wani ayeke mû ande taba ti sandaga ni.”+ Na ala use kue angbâ ti tambela ti gue.  Tongana ala si na ndo so tâ Nzapa afa na lo, Abraham aleke mbeni gbalaka kâ, na lo leke keke ti wâ ni na ndö ni. Lo kanga maboko ti molenge ti lo Isaac nga na gere ti lo, lo zia lo na ndö ti keke ti wâ ni.+ 10  Na pekoni, Abraham ayôro maboko ti lo, lo mû zembe* ti fâ molenge ti lo.+ 11  Me ange ti Jéhovah angbâ na yayu kâ, lo iri lo, lo tene: “Abraham, Abraham!” Abraham ayeda, atene: “Mbi la!” 12  Ange ni atene: “Sara sioni na molenge ni pëpe, sara ye oko na lo pëpe, teti fadeso mbi hinga so mo kpe mbeto ti Nzapa, ndali ti so mo gbanzi molenge ti mo ti koli, oko molenge ti mo, na mbi pëpe.”+ 13  Tongaso, Abraham ayô lê ti lo na nduzu, lo bâ mbeni koli-taba so ayo na lo mingi pëpe. Mbeni kete keke so adü gbani agbu didi ti lo. Tongaso, Abraham ague, lo mû taba ni, lo zö lo na sandaga na place ti molenge ti lo. 14  Abraham azia iri ti ndo ni so Jéhovah-Jiréh.* Ndani la, juska laso azo ayeke tene ka atene: “Na hoto ti Jéhovah, a yeke mû ande ye so a yeke na bezoin ni.”+ 15  Ange ti Jéhovah angbâ na yayu kâ, lo iri Abraham ti fani use ni, 16  lo tene: “Jéhovah+ atene: ‘Mbi deba na iri ti mbi wani mbi tene, ndali ti so mo sara ye so, na mo gbanzi molenge ti mo pëpe, oko molenge ti mo,+ 17  ti tâ tënë ni, mbi yeke iri ande tënë nzoni na ndö ti mo, ti tâ tënë ni, mbi yeke sara ande si hale* ti mo awu mingi tongana atongoro ti yayu nga tongana mbutu ti yanga ti ngu-ingo.+ Hale* ti mo ayeke mû yanga ti gbagba* ti awato ti lo ti ga ti lo.+ 18  Na lege ti hale*+ ti mo, amara kue ti sese ayeke wara ande tënë nzoni ndali ti ala wani ngbanga ti so mo mä yanga ti mbi.’”+ 19  Na peko ti ye so, Abraham akiri na terê ti azo ti kua ti lo, na ala mû lege ala kiri na Béer-Shéba.+ Abraham angbâ ti sara kodro na Béer-Shéba. 20  Na pekoni, Abraham amä mbeni sango so atene: “Milcah nga adü amolenge ti koli na ita ti mo Nahor:+ 21  Kozo molenge ni ayeke Uz, na pekoni Buz ita ti lo ti koli, Kémuel babâ ti Aram, 22  Késèd, Hazo, Pildash, Jidlaph na Béthuel.”+ 23  Béthuel adü Rébecca.+ Azo miombe so ayeke amolenge so Milcah adü na Nahor, ita ti Abraham. 24  Wali ti lo ti use ndo, so iri ti lo ayeke Réumah, adü amolenge ti koli so: Tébah, Gaham, Tahash na Maacah.

Kete tënë

Wala “zembe ti fango na nyama.”
Wala “zembe ti fango na nyama.”
Ndani aye ti tene “Jéhovah ayeke mû ye ande; Jéhovah ayeke bâ lege ti ye ni.”
Na Hébreu: “ngongoa.”
Na Hébreu: “Ngongoa.”
Wala “agbata.”
Na Hébreu: “ngongoa.”