Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 21:1-34

LI TI ATËNË NI

  • Dungo Isaac (1-7)

  • Ismaël ahe Isaac (8, 9)

  • A tomba Agar na Ismaël (10-21)

  • Mbele so Abraham ate na Abimélek (22-34)

21  Jéhovah abi bê ti lo na ndö ti Sara tongana ti so lo tene lani, nga Jéhovah asara na Sara ye so lo mû zendo ni lani.+  Tongaso, Sara amû ngo,+ lo dü molenge-koli na Abraham na lâ ti mbakoro ti lo, na tâ ngoi ni so Nzapa amû zendo ni lani na lo.+  Abraham azia iri ti molenge so Sara adü na lo so Isaac.+  Abraham afâ molenge ti lo Isaac na ganza na ngoi so lo wara lango miombe, a lingbi na yanga so Nzapa amû na lo.+  Abraham ayeke na ngu 100 na ngoi so a dü molenge ti lo Isaac na lo.  Sara atene: “Nzapa amû na mbi mbeni ye so asara si mbi he ngia; azo kue so amä tënë ni ayeke he ngia legeoko na mbi.”*  Nga lo tene: “Zo wa la alingbi lani ti tene na Abraham so mbi Sara mbi yeke mû me na amolenge? Me mbi dü na lo molenge ti koli na lâ ti mbakoro ti lo.”  Molenge ni akono na a zi lo na me; na Abraham asara kota matanga na lango ni so a zi Isaac na me.  Me Sara abâ so molenge so Agar,+ wali ti Égypte, adü na Abraham ayeke he Isaac.+ 10  Tongaso lo tene na Abraham: “Tomba wali-ngbâa so, lo na molenge ti lo, ndali ti so molenge ti wali-ngbâa so ayeke ga ande héritier legeoko na molenge ti mbi Isaac pëpe!”+ 11  Me tënë so lo tene na Abraham na ndö ti molenge ti lo Ismaël ason bê ti lo mingi.+ 12  Tongaso, Nzapa atene na Abraham: “Zia bê ti mo ason pëpe na tënë so Sara ayeke tene na mo na ndö ti molenge ni nga na ndö ti ngbâa ti mo ti wali. Mä lo,* ndali ti so ye so a yeke iri ni ande hale* ti mo ayeke sigi na lege ti Isaac.+ 13  Âdu ti molenge so wali-ngbâa ni adü,+ mbi yeke sara nga si lo ga mbeni mara,+ ndali ti so lo nga kue lo yeke hale* ti mo.” 14  Tongaso, Abraham alondo hio na ndapre, lo mû mapa na bozo ti ngu so a sara na poro ti nyama, lo mû na Agar. Lo zia ni na ndö ti go ti Agar, na lo tene na lo ti mû molenge ni ala hon.+ Agar amû lege lo hon, na lo tambela gï tongaso na yâ ti benyama ti Béer-Shéba.+ 15  Tongana ngu ahunzi na yâ ti bozo ni, lo pusu molenge ni na gbe ti mbeni kete keke. 16  Na pekoni lo hon, lo gue lo duti gï lo oko. Ndo so lo gue lo duti dä alingbi na yongo ti ndo so tongana zo apika kokora, a tï dä, ngbanga ti so lo tene: “Mbi ye ti bâ molenge ni na kuingo ni na lê ti mbi pëpe.” Tongaso, lo duti ayo, na lo to nda ti toto ngangu. 17  Nzapa amä go ti molenge ni,+ na ange ti Nzapa angbâ na yayu kâ lo iri Agar na lo tene na lo:+ “Agar, nyen la asara mo? Sara mbeto pëpe, ndali ti so Nzapa amä go ti molenge ni kâ na ndo so lo yeke dä. 18  Londo, mû molenge ni na nduzu na gbu lo na maboko ti mo, ngbanga ti so mbi yeke sara si lo ga mbeni kota mara.”+ 19  Nzapa azi lê ti lo si lê ti lo atï na ndö ti mbeni dû ti ngu; lo gue lo tö ngu na yâ ti bozo ni, na lo mû ngu ni na molenge ni. 20  Nzapa ayeke na molenge ni+ na ngoi so lo yeke kono. Lo sara kodro na yâ ti benyama, na lo ga zo ti pikango kokora. 21  Lo sara kodro na yâ ti benyama ti Paran,+ na mama ti lo amû na lo mbeni wali ti kodro ti Égypte. 22  Na ngoi ni so, Abimélek amû Phicol, mokonzi ti aturugu ti lo, na terê ti lo, na lo tene na Abraham: “Nzapa ayeke na mo na yâ ti ye kue so mo yeke sara.+ 23  Tongaso, deba yanga ti mo na mbi na ndo so na iri ti Nzapa so mo yeke sara ye na handa na mbi, na amolenge ti mbi nga na ahale ti mbi pëpe, nga so mo yeke sara ye na mbi nga na sese so mo yeke sara kodro dä na tâ ndoye, tongana ti so mbi sara na mo.”+ 24  Tongaso, Abraham atene: “Mbi deba yanga ti mbi.” 25  Ye oko, Abraham adema terê ti lo na Abimélek ndali ti dû ti ngu so azo ti kua ti Abimélek agbu na ngangu.+ 26  Abimélek atene: “Mbi hinga zo so asara ye so pëpe; mo wani mo tene na mbi pëpe, na mbi nga mbi mä tënë ni pëpe, gï mango ni la laso.” 27  Ge, Abraham amû ataba na abagara, lo mû ni na Abimélek, na ala use kue ate mbele. 28  Tongana Abraham amû akete wali-taba mbasambala na popo ti ataba ti lo, lo zia ala nde, 29  Abimélek ahunda Abraham, atene: “Mo zia akete wali-taba mbasambala so nde ngbanga ti nyen?” 30  Lo tene: “Mû akete wali-taba mbasambala so na maboko ti mbi, si a duti ye so afa so mbi la mbi zi dû ti ngu so.” 31  Ndani la lo iri ndo ni so Béer-Shéba,*+ ngbanga ti so ala use kue adeba yanga ti ala dä. 32  Tongaso, ala te mbele+ na Béer-Shéba, na pekoni Abimélek na Phicol, mokonzi ti aturugu ti lo, alondo, ala kiri na kodro ti aPhilistin.+ 33  Na peko ti ye so, lo lu keke ti tamaris na Béer-Shéba; kâ lo sepela iri ti Jéhovah,+ Nzapa so angbâ lakue lakue.+ 34  Abraham angbâ* na kodro ti aPhilistin aninga.*+

Kete tënë

A lingbi nga ti tene “ayeke he mbi.”
Na Hébreu: “Mä go ti lo.”
Na Hébreu: “ngongoa.”
Na Hébreu: “ngongoa.”
Ndani aye ti tene “Dû ti ngu so azo adeba yanga dä; Dû ti ngu ti aye mbasambala.”
Wala “asara kodro tongana wande.”
Na Hébreu: “lango mingi.”