Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 2:1-25

LI TI ATËNË NI

  • Nzapa awu terê ti lo na lango mbasambala ni (1-3)

  • Jéhovah Nzapa, Lo so asara yayu na sese (4)

  • Koli na wali na yâ ti yaka ti Éden (5-25)

    • A sara zo na fuku ti sese (7)

    • A ke ti tene a te lê ti keke ti hingango ye (15-17)

    • Sarango wali (18-25)

2  A yeke tongaso si a hunzi sarango yayu na sese nga na aye kue so ayeke na yâ ni.*+  Ti si na lango mbasambala ni, Nzapa ahunzi kusala so lo yeke sara ni lani so awe. Na lango mbasambala ni, lo to nda ti wu terê ti lo na peko ti akusala ti lo kue so lo sara.+  Nzapa airi tënë nzoni na ndö ti lango mbasambala ni na lo tene lango ni so ayeke nde, ndali ti so na lango ni so, lo yeke na wungo terê na peko ti kusala kue so lo sara, aye kue so lo leke fade na bê ti lo ti sara.  So ayeke mbaï ti yayu na sese na ngoi so a sara ala, na lango ni so Jéhovah* Nzapa asara sese na yayu.+  Na ngoi ni so, ade mbeni kete keke nga mbeni pere ti ngonda asigi pëpe na ndö ti sese, ndali ti so ade Jéhovah Nzapa asara si ngu apika na ndö ti sese pëpe nga zo ayeke dä pëpe ti fâ yaka na ndö ti sese ni.  Me mbeni guru ti ngu ayeke londo na sese na atuku ngu na ndö ti lê ti sese ni kue.  Jéhovah Nzapa asara zo na fuku ti sese.+ Lo wu na dû ti hôn ti lo pupu so ayeke sara si zo ni aduti na fini;+ na pekoni zo ni aga zo so ayeke na fini.*+  Nga, Jéhovah Nzapa alu yaka na Éden,+ na mbage ti est, na lo zia zo so lo sara lo dä.+  Na pekoni, Jéhovah Nzapa asara si keke kue so ayeke pendere ti tene zo abâ ni nga so ayeke nzoni ti tene zo ate lê ni asigi na sese. Lo sara nga si keke ti fini+ so ayeke na milieu ti yaka ni nga na keke ti hingango nzoni na sioni+ asigi. 10  Mbeni kota ngu alondo na Éden asua ti sara si yaka ni awara ngu; a si na mbeni ndo, yâ ti kota ngu ni akangbi aga li ti ngu osio. 11  Iri ti kozo ngu ni ayeke Pishon; ngu ni so angoro sese ti Havilah kue, ndo so lor ayeke dä. 12  Lor ti sese ni so ayeke nzoni. Kâ, a yeke wara nga delium* na tênë so a iri ni onyx. 13  Iri ti use ngu ni ayeke Guihon; ngu ni so angoro sese ti Cush kue. 14  Iri ti ota ngu ni ayeke Hiddékel;*+ ngu ni so asua ague na mbage ti est ti Assyrie.+ Osio ngu ni ayeke Euphrate.+ 15  Jéhovah Nzapa amû zo, lo zia lo na yâ ti yaka ti Éden ti fâ ni nga ti bâ lege ni.+ 16  Nga Jéhovah Nzapa amû yanga na zo, lo tene: “Mo lingbi ti te lê ti akeke kue ti yaka ni alingbi na nzara ti mo.+ 17  Me ti keke ti hingango nzoni na sioni, mo te lê ni pëpe, teti na lango so mo te ni, ti tâ tënë ni mo yeke kui.”+ 18  Jéhovah Nzapa atene: “A yeke nzoni pëpe ti tene koli angbâ gï lo oko. Mbi yeke sara mbeni zo ti mungo maboko na lo, so alingbi na lo.”+ 19  Andâ na ngoi ni so, Jéhovah Nzapa ayeke mû fuku ti sese, lo yeke sara na anyama kue ti ngonda na anyama kue so ayeke huru na lê ti nduzu. Lo ga na ala na koli ni ti bâ iri wa la lo yeke zia na ndö ti ala oko oko; iri so lo zia na ndö ti nyama* oko oko kue so ayeke na fini aga iri ti nyama ni so.+ 20  Koli ni azia iri na ndö ti anyama kue ti kodro, anyama so ayeke huru na lê ti nduzu nga na anyama oko oko kue ti ngonda; me ti koli ni, mbeni zo ti mungo maboko na lo, so alingbi na lo, ayeke dä pëpe. 21  Tongaso, Jéhovah Nzapa asara si koli ni atï na kota lango; na ngoi so lo yeke lango, Nzapa amû bio ti kate ti lo oko na lo kanga nyama ti terê ti lo na place ni. 22  Jéhovah Nzapa asara wali na bio ti kate ti koli so lo mû, na lo ga na wali ni na koli ni.+ 23  Koli ni atene: “Ah! Fadeso, so ayeke bio ti bio ti mbi na mitele ti mitele ti mbi. A yeke iri lo Wali, ndali ti so a mû lo na yâ ti koli.”+ 24  Ndani la, koli ayeke zia ande babâ na mama ti lo, lo yeke ngbâ ande na terê ti wali ti lo na ala yeke ga terê oko.+ 25  Terê ti ala use kue ayeke senge,+ koli ni na wali ti lo, me kamene asara ala pëpe.

Kete tënë

Na Hébreu: “nga na aturugu ti ala kue.”
So ayeke ti kozoni la ti tene iri ti Nzapa יהוה (YHWH) asigi na yâ ti Bible. Bâ na A4.
Wala “âme.” Na Hébreu: “nèphèsh,” so ndani aye ti tene “ye so ayeke wu pupu.” Bâ na kete bakari.
“Delium, wala bdellium, ayeke ngu ti ambeni keke so ayuru si akpengba na so afun pendere.”
Wala “Tigre.”
Wala “âme.”