Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 16:1-16

LI TI ATËNË NI

  • Agar na Ismaël (1-16)

16  Saraï, wali ti Abram, adü molenge na lo pëpe;+ me Saraï ayeke na zo ti kua ti lo so ayeke zo ti Égypte; iri ti lo Agar.+  Ni la Saraï atene na Abram: “Pardon, bâ Jéhovah akanga yâ ti mbi si mbi dü pëpe. Pardon, bungbi na zo ti kua ti mbi. Hinga ape mbi yeke wara ande amolenge na lege ti lo.”+ Tongaso, Abram amä Saraï.  Na peko ti ngu bale-oko so Abram asara na sese ti Canaan, Saraï, wali ti Abram, amû Agar zo ti kua ti lo so ayeke zo ti Égypte, lo mû lo na Abram ti ga wali ti lo.  Na pekoni, Abram abungbi na Agar; lo mû ngo. Gï so Agar abâ so lo mû ngo awe, lo komanse ti ke wa ti lo Saraï.  Tongana Saraï abâ ye so, lo tene na Abram: “Sioni so a sara na mbi so, faute ni ayeke ti mo. Mbi la mbi zia zo ti kua ti mbi na kate ti mo, na tongana lo bâ so lo mû ngo awe, lo komanse ti ke mbi. Zia Jéhovah afâ ngbanga na popo ti mbi na mo.”  Tongaso, Abram atene na Saraï: “Bâ, zo ti kua ti mo ayeke na maboko ti mo. Sara na lo ye so ayeke nzoni na lê ti mo.” Saraï azia kamene na lê ti Agar si lo kpe lo hon.  Na pekoni, ange ti Jéhovah awara Agar na terê ti mbeni dungu na yâ ti benyama; dungu ni so ayeke na lege ti guengo na Shur.+  Ange ni atene: “Agar, zo ti kua ti Saraï, mo londo na ndo wa, na mo yeke gue na ndo wa?” Lo tene: “Mbi londo na ndo ti wa ti mbi Saraï si mbi yeke kpe so.”  Ange ti Jéhovah akiri atene na lo: “Kiri na ndo ti wa ti mo na sara terê ti mo kete na gbe ti lo.” 10  Ange ti Jéhovah atene na lo: “Mbi yeke sara si ahale* ti mo aga gbani gbani, si a yeke ngangu ti diko ande wungo ti ala.”+ 11  Nga, ange ti Jéhovah atene na lo: “Mo yeke na ngo, na mo yeke dü ande molenge ti koli; mo zia iri ti lo Ismaël,* teti Jéhovah amä toto ti vundu ti mo awe. 12  Tongana molenge ni aga koli awe, lo yeke duti ande tongana kororo ti ngonda.* Lo yeke tiri na azo kue, nga azo kue ayeke tiri na lo; lo yeke sara ande kodro lê na lê na aita ti lo kue.”* 13  Tongaso, Agar airi ndo na Jéhovah so ayeke sara tënë na lo, lo tene: “Mo yeke Nzapa so abâ ye kue,”*+ teti lo hunda terê ti lo, lo tene: “A yeke tâ tënë so, ge, mbi bâ lo so ayeke bâ mbi?” 14  Ndani la a iri dû ti ngu so Béer-Lahaï-Roï.* (A yeke na popo ti Cadès na Bérèd.) 15  Agar adü molenge ti koli na Abram, na Abram azia iri ti molenge so Agar adü so Ismaël.+ 16  Abram ayeke na ngu 86 na ngoi so Agar adü na lo Ismaël.

Kete tënë

Na Hébreu: “ngongoa.”
Ndani aye ti tene “Nzapa amä.”
Wala “onagre.” Ambeni apensé so a ye ti sara tënë ti zèbre. Âmanke a ye ti fa so lo ye ti lo ti sara ye ka gï nde.
A lingbi nga ti tene “lo yeke ke ande aita ti lo kue.”
Wala “so abâ mbi.”
Ndani aye ti tene “Dû ti ngu ti Lo so ayeke na fini si ayeke bâ mbi.”