Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 13:1-18

LI TI ATËNË NI

  • Abram akiri na Canaan (1-4)

  • Abram na Lot akangbi terê (5-13)

  • Nzapa akiri amû zendo na Abram (14-18)

13  Na pekoni, Abram azia Égypte ti monté ti gue na Négueb,+ lo, wali ti lo na aye kue so lo wara ni; Lot nga ague na lo.  Abram ayeke na gbâ ti anyama, gbâ ti argent na gbâ ti lor.+  Lo londo na Négueb, lo hon lo si na mbeni ndo, lo sara kodro, lo hon lo si na mbeni ndo, lo sara kodro, juska lo si na Béthel, na ndo so tente ti lo ayeke ândö dä na popo ti Béthel na Aï,+  ndo so lo sara lani gbalaka dä kozo awe. Abram asepela iri ti Jéhovah kâ.  Lot, so ayeke mû peko ti Abram, ayeke nga na ataba, abagara na atente.  Tongaso, sese ni alingbi pëpe ti tene ala kue asara kodro ndo oko; aye ti ala aga gbani, na ala lingbi pëpe ti sara kodro ndo oko.  Tongaso, papa alondo na popo ti azo ti batango anyama ti Abram na azo ti batango anyama ti Lot. (Na ngoi ni so, azo ti Canaan na azo ti Périzzi ayeke sara kodro na sese ni.)+  Ni la Abram atene na Lot:+ “Pardon, a yeke nzoni tënë aduti na popo ti mbi na mo pëpe, nga na popo ti azo ti batango anyama ti mbi na azo ti batango anyama ti mo pëpe, teti e yeke aita.  Sese ni kue la na gbele mo so ape? Pardon, e kangbi. Tongana mo gue na mbage ti wali, mbi yeke gue na mbage ti koli; me tongana mo gue na mbage ti koli, mbi yeke gue na mbage ti wali.” 10  Tongaso, Lot ayô lê ti lo na nduzu, lo bâ sese kue so ayeke na terê ti Ngu ti Jourdain+ juska na Zoar.+ Lo bâ so na ndo ni kue, ngu ayeke dä nzoni (kozo si Jéhovah afuti Sodome na Gomorrhe); ndo ni ayeke tongana yaka ti Jéhovah,+ tongana sese ti Égypte. 11  Lot asoro ndo kue so ayeke na terê ti Ngu ti Jourdain; lo na azo ti lo alondo ala gue ala sara kodro na mbage ti est. Tongaso, ala kangbi. 12  Abram asara kodro na sese ti Canaan, me Lot asara ti lo kodro na terê ti agbata so ayeke na ndo ni.+ Lo gue ngbii, lo leke tente ti lo nduru na Sodome. 13  Azo ti Sodome ayeke sioni mingi nga ala yeke akota zo ti sarango siokpari na terê ti Jéhovah.+ 14  Jéhovah asara tënë na Abram na peko ti so lo na Lot akangbi, lo tene: “Pardon, yô lê ti mo na nduzu na bâ ndo na mbage ti nord, na mbage ti sud, na mbage ti est nga na mbage ti ouest, 15  ndali ti so sese ni kue so mo yeke bâ so, mbi yeke mû ni na mo nga na ahale* ti mo biani biani.+ 16  Mbi yeke sara si ahale* ti mo aga tongana alê ti mbutu, si, tongana zo alingbi ti diko alê ti mbutu, andâ lo lingbi ti diko wungo ti ahale* ti mo.+ 17  Londo mo tambela na yâ ti kodro ni ti hinga yongo ni nga na konongo ti lê ni, ndali ti so mbi yeke mû ande ni na mo.” 18  Tongaso, Abram angbâ gï ti lango na yâ ti atente. Na pekoni, lo gue lo sara kodro na popo ti akota keke ti Mamré,+ so ayeke na Hébron;+ lo leke mbeni gbalaka teti Jéhovah+ kâ.

Kete tënë

Na Hébreu: “ngongoa.”
Na Hébreu: “ngongoa.”
Na Hébreu: “ngongoa.”