Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Genèse 1:1-31

LI TI ATËNË NI

  • Sarango yayu na sese (1, 2)

  • A leke sese ni na yâ ti alango omene (3-31)

    • Lango 1: lumière; kota lâ na bï (3-5)

    • Lango 2: lê ti nduzu (6-8)

    • Lango 3: hulengo ndo na pere (9-13)

    • Lango 4: asungo ye na lê ti nduzu (14-19)

    • Lango 5: asusu na andeke (20-23)

    • Lango 6: anyama na ndö ti sese nga na azo (24-31)

1  Na tongo nda ni Nzapa asara yayu na sese.+  Sese ni ayeke gï tongaso,* ye oko ayeke na ndö ni pëpe. Ndo avuko pitipiti na ndö ti ngu so alï mingi.*+ Ngangu* ti Nzapa+ ayeke sara ye na ndö ti lê ti ngu ni.+  Nzapa atene: “Zia lumière abâ gigi.” Na lumière abâ gigi.+  Na pekoni, Nzapa abâ so lumière ayeke nzoni, na Nzapa akomanse ti kangbi popo ti lumière na bingo.  Nzapa airi lumière ni Kota lâ, me lo iri bingo ni Bï.+ Lakui asi na ndapre asi; so ayeke kozo lango ni.  Nzapa atene: “Zia lê ti nduzu+ abâ gigi na popo ti angu, nga zia kangbi aduti na popo ti angu.”+  Tongaso Nzapa asara lê ti nduzu; lo kangbi ngu so ayeke na gbe ni na ngu so ayeke na lê ti nduzu.+ Na a si tongaso.  Nzapa airi lê ti nduzu ni Yayu. Lakui asi na ndapre asi; so ayeke use lango ni.  Nzapa atene: “Zia angu so ayeke na gbe ti yayu abungbi terê nga zia hulengo ndo abâ gigi.”+ Na a si tongaso. 10  Nzapa airi hulengo ndo ni Sese,+ me angu so abungbi terê so, lo iri ni aNgu-ingo.+ Nzapa abâ so a yeke nzoni.+ 11  Nzapa atene: “Zia sese asara si pere asigi nga na akete keke so ngongoa ayeke dä; nga zia si akeke so ayeke lë alê ti keke so ngongoa ayeke na yâ ni asigi alingbi na mara ti ala.” Na a si tongaso. 12  Sese ato nda ti dü pere nga na akete keke so ngongoa ayeke na yâ ni;+ a dü nga akeke so ayeke lë lê ti keke so ngongoa ayeke na yâ ni alingbi na mara ti ala. Na pekoni, Nzapa abâ so a yeke nzoni. 13  Lakui asi na ndapre asi; so ayeke ota lango ni. 14  Nzapa atene: “Zia asungo ye*+ abâ gigi na lê ti nduzu ti kangbi popo ti kota lâ na bï;+ ala yeke duti ande aye so ayeke fa angoi, alango na angu.+ 15  Ala yeke su na lê ti nduzu ti za lumière na ndö ti sese.” Na a si tongaso. 16  Nzapa asara akota sungo ye use: kota ni ti komande na kota lâ+ na kete ni ti komande na bï; lo sara nga atongoro.+ 17  Tongaso Nzapa azia ala na lê ti nduzu ti su na ndö ti sese, 18  ti komande na kota lâ nga na bï, na ti kangbi popo ti lumière na bingo.+ Na pekoni, Nzapa abâ so a yeke nzoni. 19  Lakui asi na ndapre asi; so ayeke osio lango ni. 20  Nzapa atene: “Zia angu asi singo na anyama* nga zia anyama so ayeke huru hurungo ahuru na ndö ti sese na lê ti nduzu.”+ 21  Nzapa asara akota nyama ti ngu-ingo nga na anyama kue* so ayeke fono na yâ ti angu alingbi na mara ti ala. Lo sara nga nyama oko oko kue so ayeke huru alingbi na mara ti lo. Nzapa abâ so a yeke nzoni. 22  Na pekoni, Nzapa airi tënë nzoni na ndö ti ala, lo tene: “Ala dü, ala ga gbani na ala si singo na yâ ti angu-ingo,+ nga zia anyama so ayeke huru aga gbani na ndö ti sese.” 23  Lakui asi na ndapre asi; so ayeke oku lango ni. 24  Nzapa atene: “Zia anyama* abâ gigi na ndö ti sese alingbi na mara ti ala: anyama ti kodro, anyama so ayeke hara* nga na anyama ti ngonda alingbi na mara ti ala.”+ Na a si tongaso. 25  Nzapa asara anyama ti ngonda alingbi na mara ti ala, anyama ti kodro alingbi na mara ti ala nga na anyama kue so ayeke hara na ndö ti sese alingbi na mara ti ala. Nzapa abâ so a yeke nzoni. 26  Nzapa atene: “Zia e+ sara zo na image ti e,+ na lege so lo kpa e.+ Zia ala komande asusu ti ngu-ingo, anyama so ayeke huru na lê ti nduzu, anyama ti kodro, sese kue nga na anyama kue so ahara harango so ayeke na ndö ti sese.”+ 27  Nzapa asara zo na image ti lo, na image ti lo wani, lo sara zo; lo sara ala koli na wali.+ 28  Na pekoni, Nzapa airi tënë nzoni na ndö ti ala nga lo tene na ala: “Ala dü, ala ga gbani, ala si ndö ti sese+ na ala sara si sese ni aga na gbe ti ala.+ Ala komande+ asusu ti ngu-ingo, anyama so ayeke huru na lê ti nduzu na anyama oko oko kue so ayeke na fini si ayeke tambela na ndö ti sese.” 29  Nzapa atene: “Mbi mû na ala akete keke kue so ngongoa ayeke dä na ndö ti sese kue nga na akeke kue so ayeke lë lê ti keke so ngongoa ayeke na yâ ni. Kobe ti ala la.+ 30  Nga mbi mû afini pere na akugbe kue ti ga kobe+ ti anyama ti ngonda kue so ayeke na ndö ti sese, anyama kue so ayeke huru na lê ti nduzu, na anyama kue so ayeke na fini* si ayeke tambela na ndö ti sese.” Na a si tongaso. 31  Na pekoni, Nzapa abâ aye kue so lo sara, na a yeke nzoni mingi+ na lê ti lo. Lakui asi na ndapre asi; so ayeke omene lango ni.

Kete tënë

Wala “senge.”
Wala “ngu so asua na ngangu.”
Wala “Yingo.”
Wala “alumière.”
Wala “a-âme so ayeke na fini.”
Wala “a-âme.”
Wala “a-âme so ayeke na fini.”
Wala “anyama so ayeke tambela,” âmanke a ndu nga anyama so ayeke hara na yâ ti ala, nga na ambeni nde na ti so a fa ni ge.
Wala “a-âme so ayeke na fini.”