Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Deutéronome 32:1-52

LI TI ATËNË NI

  • Bia ti Moïse (1-47)

    • Jéhovah, Kota tênë ni (4)

    • Israël agirisa Kota tênë ti lo (18)

    • “Mbi la mbi yeke kiri na zo peko ti sioni” (35)

    • “Ala amara, ala duti na ngia legeoko na azo ti lo” (43)

  • Moïse ayeke kui na Hoto ti Nébo (48-52)

32  “Mä si, yayu, mbi yeke sara tënë;zia sese amä tënë ti yanga ti mbi.   Fango ye ti mbi ayeke tï tongana ti so ngu-nzapa ayeke pika,tënë ti mbi ayeke yuru tongana ngu ti pere,tongana ngu-nzapa so atï kete kete na ndö ti pere,tongana kota ngu-nzapa so apika na ndö ti benyama.   Mbi yeke to mbela na iri ti Jéhovah.+ Fa tënë na ndö ti kota ti Nzapa ti e!+   Lo yeke Kota tênë na kusala ti lo ayeke mbilimbili-kue,+teti asarango ye ti lo kue ayeke mbilimbili.+ Lo yeke Nzapa so ayeke be-ta-zo,+ lo sara ye lakue mbilimbili.+ Lo yeke mbilimbili na lo yeke sara ye na lege ni.+   Ala wani la asara si lege ti ala abuba;+ala yeke amolenge ti lo pëpe, faute ni ayeke ti ala wani.+ Ala yeke azo so sarango ye ti ala aba bango nga ayeke kirikiri mingi!+   So lege ti sarango ye na Jéhovah la?+ ala azo so li ti ala ayeke dä pëpe so na so ndara amanke ala so.+ Lo yeke Babâ ti mo ape? Lo so asara si mo bâ gigi.+ Lo so asara mo nga lo so asara si gere ti mo aluti ngangu.   Dabe ti mo na angoi ti giriri,gbu li ti mo na ndö ti angu so ahon awe, so alondo na azo ti mbeni ngoi ti si na azo ti mbeni ngoi nde;mo hunda babâ ti mo, na lo yeke tene na mo;+mo hunda ambakoro ti mo, na ala yeke fa na mo.   Tongana Lo so ayeke na nduzu na ndö ti aye kue amû lani na amara héritage ti ala,+tongana lo kangbi lani yâ ti amolenge ti Adam,*+lo fa katikati ti akodro ti azo+alingbi na wungo ti amolenge ti Israël.+   Part ti Jéhovah ayeke azo ti lo;+Jacob ayeke ye ti lo.+ 10  Lo wara lo na yâ ti benyama,+na yâ ti mbeni désert so ye ayeke dä pëpe na so a mä gï toto ti anyama ti ngonda dä.+ Lo mû lo na yâ ti maboko ti lo ti bata lo, lo bâ lege ti lo,+lo bata lo tongana vuko lê ti lo.+ 11  Legeoko tongana aigle so ayeke fa na amolenge ti lo tongana nyen ti huruayeke huru na ndö ti ala,lo yeke gbara yâ ti akpangbi ti lo, lo yeke mû ala,lo yeke yô ala na ndö ni,+ 12  Jéhovah lo oko si angbâ lani ti fa lege na lo,*+na mbeni nzapa nde ayeke na terê ti lo pëpe.+ 13  Lo sara si lo hon na ando so ayeke na nduzu,+tongaso si lo te akobe ti yaka.+ Lo bata lo na mafuta ti otoro so asigi na yâ ti dû ti tênë,nga na mafuta so asigi na yâ ti ngangu tênë; 14  Lo mû na lo beurre ti abagara na ngu ti me ti atabanga na anzoni* taba,akoli-taba ti Basan, na akoli-ngasanga na pendere blé;+na mo nyon vin so a sara ni na ngu* ti vigne. 15  Tongana mafuta ti Jéshurun* aga dä awe, lo sara ngangu-li. Mafuta ti mo aga dä, mo kono mingi, yâ ti mo asi ahon ndö ni.+ Tongaso, lo zia Nzapa so asara lo,+na lo bâ Kota tênë ti salut ti lo tongana mbumbuse ye. 16  Ala voro ambeni nzapa nde si ngonzo asara lo ngangu;+ala son bê ti lo na aye so ayeke sioni mingi.+ 17  Ala mû sandaga na asioni yingo, me na Nzapa pëpe,+ala mû ni na anzapa so ala hinga ala pëpe,anzapa so aga fini fini,so akotara ti ala ahinga ala pëpe. 18  Mo girisa Kota tênë+ so adü mo,na mo dabe ti mo na Nzapa so adü mo so pëpe.+ 19  Tongana Jéhovah abâ tongaso, lo ke ala,+ngbanga ti so amolenge ti lo ti koli na ti wali ason bê ti lo. 20  Tongaso, lo tene: ‘Mbi yeke honde lê ti mbi na ala,+mbi yeke bâ ye so ayeke si ande na ala,ndali ti so azo ti ngoi so kue ayeke azo ti kirikiri,+amolenge so ayeke be-ta-zo oko pëpe.+ 21  Na lege ti mbeni ye so ayeke nzapa pëpe, ala sara si ngonzo agbu mbi ngangu;*+ala mû asenge senge yanda ti ala ti son bê ti mbi;+mbi kue, mbi yeke mû ande mbeni mara so ayeke tâ mara pëpe ti pusu ala ti sara kota bê,+mbi yeke mû mbeni buba mara ti son bê ti ala.+ 22  Ngonzo ti mbi aza wâ+na ayeke gbi juska na yâ ti Dû ti kuâ,*+a yeke gbi ande sese ni na akobe kue so ayeke na ndö ninga a yeke sara si gunda ti ahoto ayeke gï wâ. 23  Mbi yeke sara si ala wara gbâ ti aye ti ngangu;mbi yeke hunzi alê ti kokora ti mbi na terê ti ala. 24  Nzara ayeke woko ala,+ngangu fièvre ayeke hunzi ala, mbeni sioni ye ayeke futi ala.+ Mbi yeke tokua pembe ti anyama ti ngonda na terê ti ala+nga na ngu ti yanga ti asioni ngbo* ti sara sioni na ala. 25  Na gigi, épée ayeke fâ azo ti ala,+na yâ ti da, mbeto ayeke gbu ala;+a yeke fâ maseka-koli nga na maseka-wali so ade ahinga koli pëpe,a yeke fâ foroto nga na koli so kuä ti li ti lo avuru.+ 26  Mbi lingbi fade ti tene: “Mbi yeke kangbi yâ ti ala kirikiri,mbi yeke sara si azo asara tënë ti ala mbeni pëpe,” 27  me mbi sara mbeto ti ye so awato ayeke tene,+ngbanga ti so awato ni alingbi ti mä yâ ni nde,+na peut-être ala tene: “E sö benda na ngangu ti e wani,+Jéhovah la asara aye so pëpe.” 28  Ala yeke mbeni mara so li ti ala ayeke dä oko pëpe,*na ala yeke na hingango ndo oko pëpe.+ 29  Âdu fade ala yeke na ndara,+ ka ala gbu li na ndö ti ye so.+ Ala yeke gbu li ti ala na ndö ti ye so ayeke si ande na ala.+ 30  Tongana nyen si zo oko alingbi ti tomba azo 1 000? Tongana nyen si zo use azia loro na gere ti azo 10 000?+ A lingbi ti si tongaso gï tongana Kota tênë ti ala akä ala,+nga gï tongana Jéhovah azia ala na maboko ti awato ni. 31  Kota tênë ti ala ayeke tongana Kota tênë ti e pëpe,+même awato ti e ahinga ni.+ 32  Vigne ti ala ayeke avigne ti Sodomena ti ayaka ti Gomorrhe.+ Alê ti vigne ti ala ayeke alê ti vigne ti poison,ali ti vigne ti ala ase sengo.+ 33  Vin ti ala ayeke ngu ti yanga ti angbona ayeke ngu ti yanga ti acobra. 34  Mbi bata ye so,mbi kpo nzoroko dä na mbi zia ni na yâ ti gogoro ti mbi.+ 35  Mbi la mbi yeke kiri na zo peko ti sioni, nga mbi la mbi yeke punir zo;+na ngoi so mbi fa ni awe, gere ti ala ayeke glissé,+ndali ti so lango ti kota vundu ti ala apusu nduru,na aye so ayeke ku ala ayeke ga na loro.’ 36  Jéhovah ayeke fâ ande ngbanga ti azo ti lo,+me lo yeke bâ mawa ti* awakua ti lo,+na ngoi so lo bâ so ngangu ti ala ahunzi,na gï zo so zo ti mungo maboko na lo ayeke dä pëpe nga na zo so ayeke na ngangu pëpe si angbâ. 37  Lo yeke tene: ‘Anzapa ti ala ni ayeke na ndo wa?+kota tênë so ala kpe dä ti bata terê ti ala so. 38  Anzapa so ayeke te lani mafuta ti asandaga ti ala*na ayeke nyon vin ti asandaga ti ala ti sämba, ala yeke na ndo wa?+ Zia ala ga amû maboko na ala ma! Zia ala ga ndo ti batango terê ti ala ma! 39  Fadeso ala bâ mbi, mbi yeke Nzapa,+nde na mbi, mbeni nzapa ayeke dä pëpe.+ Mbi fâ zo, na mbi mû fini na zo.+ Mbi zia kä na terê ti zo,+ na mbi sara si kä ni amü,+na mbeni zo alingbi ti zi zo na maboko ti mbi pëpe.+ 40  Mbi yôro maboko ti mbi na nduzu,mbi deba yanga ti mbi, mbi tene: “Mbi so mbi yeke na fini kpu na kpu so,”+ 41  tongana mbi leke yanga ti épée ti mbi so lê ni aza zango,si mbi leke maboko ti mbi ti fâ ngbanga,+mbi yeke kiri na awato ti mbi peko ti sioni so ala sara+nga mbi yeke punir azo so ake mbi. 42  Mbi yeke sara si alê ti kokora ti mbi anyon mênë juska asoulé,mênë ti azo so a fâ ala awe na ti ala so a gbu ala na ngbâa,na épée ti mbi ayeke te nyama,nyama ti li ti amokonzi ti awato.’ 43  Ala amara, ala duti na ngia legeoko na azo ti lo,+ndali ti so lo yeke kiri peko ti mênë ti awakua ti lo,+na lo yeke kiri na awato ti lo peko ti sioni so ala sara,+nga lo yeke sara si a zi sioni ye na terê ti* sese ti azo ti lo.” 44  Tongaso, Moïse aga, lo diko atënë ti yâ ti bia so kue na mê ti azo ni,+ lo na Osée* molenge ti Nun.+ 45  Tongana Moïse ahunzi ti sara atënë so kue na azo ti Israël awe, 46  lo tene na ala, lo tene: “Atënë kue so mbi tene na ala laso ti gboto mê ti ala so,+ ala bata ni na bê ti ala, tongaso si ala mû yanga na amolenge ti ala ti sara kue ti bata atënë kue ti yâ ti Ndia so.+ 47  Tënë ni so ayeke senge tënë pëpe, me a yeke fini ti ala;+ grâce na ni, lango ti ala alingbi ti wu na ndö ti sese so ala yeke fâ Ngu ti Jourdain ti mû ni so.” 48  Jéhovah asara tënë na Moïse, na oko lango ni so, lo tene: 49  “Monté na ndö ti hoto ti Abarim so,+ Hoto ti Nébo,+ so ayeke na kodro ti Moab, so abâ ndo lê na lê na Jéricho, na mo bâ sese ti Canaan, so mbi yeke mû ni na azo ti Israël tongana héritage.+ 50  Na pekoni mo yeke kui na ndö ti hoto ni so mo yeke monté dä so, na mo yeke wu terê ti mo tongana ti akotara ti mo,* gï tongana ti so ita ti mo Aaron akui lani na ndö ti Hoto ti Hor+ na lo yeke wu terê ti lo tongana ti akotara ti lo; 51  ndali ti so na ngu ti Méribah+ ti Cadès na yâ ti benyama ti Zîn, ala use kue aduti lani be-ta-zo na mbi pëpe na popo ti azo ti Israël, nga ndali ti so ala sara lani pëpe si mbi ga nzoni-kue na lê ti azo ti Israël.+ 52  Mo yeke ngbâ ayo si mo bâ kodro ni, me mo yeke lï pëpe na yâ ti kodro ni so mbi yeke mû na azo ti Israël.”+

Kete tënë

A lingbi nga ti tene “azo kue so abâ gigi na lege ti lo.”
So ti tene Jacob.
Na Hébreu: “mafuta ti.”
Na Hébreu: “mênë.”
Ndani aye ti tene “Zo so ayeke mbilimbili,” a yeke mbeni iri so a mû na Israël ti gonda na lo.
Wala “mbi sara mbanda.”
Wala “Shéol,” so ti tene dû ti kuâ so azo kue ayeke gue dä. Bâ na kete bakari.
Wala “anyama so ahara na yâ ti sese.”
A lingbi nga ti tene “Ala kanga mê ti ala na wango.”
Wala “lo regretté ye so lo ye ti sara na.”
Wala “ate apendere sandaga ti ala.”
Wala “lo yeke sukula.”
Wala “Hoshéa.” Kozo iri ti Josué la. Hoshéa ayeke nduru iri ti Hoshaïah, so ndani aye ti tene “Jah asö lo; Jah asö.”
So ayeke mbeni fason ti tene so zo ni akui.