Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

3 Jean 1:1-14

LI TI ATËNË NI

  • Bara nga na sambela (1-4)

  • A gonda Gaïus (5-8)

  • Diotrèphe aye gï kota ndo (9, 10)

  • A sara nzoni tënë ti Démétrius (11, 12)

  • Jean aleke ti gue ti bâ aita; abara (13, 14)

 Mbi, mbakoro-koli, mbi sû mbeti so na Gaïus, lo so mbi ndoye lo mingi.  Mo so mbi ndoye mo mingi, mbi sambela ti tene na yâ ti aye kue mo maï na mo duti na nzoni seni, gï tongana ti so mo yeke* maï nzoni so.  Biani, terê ti mbi anzere lani mingi tongana aita aga, ala sara nzoni tënë ti tâ tënë so mo gbu ni ngangu, gï tongana ti so mo ngbâ ti tambela na yâ ti tâ tënë.+  So mbi mä a tene amolenge ti mbi angbâ ti tambela na yâ ti tâ tënë,+ mbeni ye ti zia ngia na bê ti mbi* ti hon so ayeke dä pëpe.  Mo so mbi ndoye mo mingi, mo yeke be-ta-zo na yâ ti aye kue so mo yeke sara ndali ti aita, atâa so mo hinga ala kozo pëpe.+  Ala sara nzoni tënë ti ndoye ti mo na gbele congrégation. Mbi voro mo ti zia aita so na lege tongana ti so alingbi na lê ti Nzapa.+  Ndali ti so a yeke ndali ti iri ti Nzapa la si ala yeke tambela so, na ala mû ye oko pëpe+ na tïtî azo ti amara.  Ni la, a yeke ngbanga ti e ti yamba azo tongaso nzoni+ si e ga amba ti ala awakua na yâ ti tâ tënë.+  Mbi sû lani mbeni mbeti na congrégation, me Diotrèphe, so aye gï kota ndo na popo ti ala,+ lo yeda pëpe na aye kue so alondo na e nga lo ne ni pëpe.+ 10  Ndani la, tongana mbi ga, mbi yeke kiri ande na ndö ti akusala so lo ngbâ ti sara so. Lo yeke diko asioni tënë lakue na iri ti e.+ Na so kue alingbi na lo pëpe, lo yeke yamba nga aita ni nzoni pëpe.+ Ala so aye ti yamba aita ni, lo yeke tara ti kanga lege na ala na ti tomba ala na yâ ti congrégation. 11  Mo so mbi ndoye mo mingi, mo mû pëpe peko ti ye so ayeke sioni, me mo mû peko ti ye so ayeke nzoni.+ Zo so asara ye ti nzoni, lo yeke ti Nzapa.+ Me zo so asara ye ti sioni lo bâ Nzapa pëpe.+ 12  Aita kue asara nzoni tënë ti Démétrius, tâ tënë nga kue asara nzoni tënë ti lo. Biani, e nga kue e yeke sara nzoni tënë na ndö ti lo, na mo hinga so tënë ti e so ayeke tâ tënë. 13  Mbi yeke na tënë mingi ti tene na mo, me mbi ye pëpe ti ngbâ ti sû ni na encre nga na keke-mbeti. 14  Me mbi yeke ku ti bâ mo fafadeso, si e yeke sara tënë lê na lê. Zia siriri aduti na mo. Aita abara mo. Mo bara na mbi aita oko oko kue na iri ti ala.

Kete tënë

Wala “âme ti mo ayeke.”
A lingbi nga ti tene “mbeni ye ti pusu mbi ti kiri singila mingi.”