Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 Samuel 16:1-23

LI TI ATËNË NI

  • Ziba adiko tënë na terê ti Méphibosheth (1-4)

  • Shiméï adeba David (5-14)

  • Absalom ayeda ti tene Hushaï angbâ na popo ti ala (15-19)

  • Wango ti Ahitophel (20-23)

16  Tongana David ahon li ti hoto ni kete,+ lo bâ Ziba,+ wakua ti Méphibosheth,+ so ayeke ku lo kâ. Lo yeke na akororo use so a zia mbeni ye tongana bongo na ndö ti ala. Na ndö ti akororo ni, a yeke wara mapa 200, araisin so a pete ni boule boule 100, ambeni lê ti keke ti ngoi ti ndowa* so a pete ni boule boule 100 nga na kota ta ti vin.+  Gbia atene na Ziba: “Mo ga na aye ni so ngbanga ti nyen?” Ziba akiri tënë, atene: “Akororo ni ayeke ti tene azo ti da ti gbia amonté na ndö ni. Mapa na alê ti keke ni ayeke ti tene amaseka-koli ni ate nga vin ni ayeke ti tene azo so afatigué na yâ ti benyama anyon ni.”+  Gbia ahunda lo, atene: “Molenge* ti wa ti mo ayeke na ndo wa?”+ Ziba atene na gbia: “Lo ngbâ ti lo na Jérusalem, ndali ti so lo tene: ‘Laso azo ti Israël ayeke kiri na mbi komandema ti babâ ti mbi.’”+  Gbia atene na Ziba: “Aye ti Méphibosheth kue aga ti mo awe.”+ Ziba akiri tënë, atene: “Mbi kuku na gbe ti mo. Seigneur na gbia ti mbi, zia mbi nzere na lê ti mo.”+  Gbia David asi na kodro ti Bahurim. Mbeni zo ti sewa ti Gbia Saül so iri ti lo ayeke Shiméï,+ molenge ti Guéra, asigi na yâ ti kodro ni. Lo yeke deba David na ngoi so David ayeke ga nduru nduru.+  Lo mû atênë lo yeke bi na mbage ti Gbia David, na mbage ti awakua ti lo kue, azo ni kue nga na angangu koli so ayeke na terê ti David na mbage ti koli nga na ti wali.  Shiméï adeba David, nga lo tene: “Hon kâ, hon kâ, mo zo ti tukungo mênë! Mo so li ti mo ayeke dä ape so!  Jéhovah asara si mênë ti azo ti Saül kue so mo fâ ala akiri na li ti mo. Mo mû komandema na peko ti Saül, me Jéhovah azi ni na maboko ti mo, lo mû ni na molenge ti mo Absalom. Ye ti ngangu awara mo ndali ti so mo tuku mênë ti azo.”+  Abishaï, molenge ti Zéruïah,+ atene na gbia: “Kuâ ti mbo+ so ayeke deba seigneur na gbia ti mbi ngbanga ti nyen?+ Zia mbi, mbi gue mbi fâ li ti lo.”+ 10  Me gbia atene: “Ala amolenge ti Zéruïah,+ ti ala na mbi nyen? Ala zia lo, lo deba mbi,+ ndali ti so Jéhovah la atene na lo, atene:+ ‘Deba David!’ Tongaso zo wa la apeut ti hunda lo, atene: ‘Nyen la mo sara so?’” 11  David atene na Abishaï nga na awakua ti lo kue, atene: “Asingana molenge so mbi dü lo dungo na yâ ti mbi si agi ti fâ mbi*+ so, si zo ti mara ti Benjamin?+ Ala zia lo kpô si lo deba mbi, ndali ti so Jéhovah la atene na lo ti sara ni! 12  Peut-être Jéhovah ayeke bâ pasi ti mbi,+ na Jéhovah ayeke kiri ti sara nzoni bê na mbi ahon adeba so a yeke deba na mbi laso so.”+ 13  David na azo ti lo angbâ ti hon na ndö ti lege, me Shiméï ayeke tambela ti lo na terê ti hoto ni. Lo yeke deba lo,+ lo bi atênë na mbage ti lo nga lo tuku gbâ ti sese na mbage ti lo. 14  Gbia na azo ni kue ague ngbii ala si na ndo so ala ye ti gue dä. Ala fatigué, ala duti, ala wu terê ti ala. 15  Me âdu ti Absalom na azo ti Israël kue, ala si na Jérusalem; Ahitophel+ ayeke na terê ti lo. 16  Hushaï,+ kamarade ti David* so ayeke mbeni zo ti Arki,+ aga na ndo ti Absalom. Hushaï atene na Absalom: “Gbia na nduzu!+ Gbia na nduzu!” 17  Tongana Absalom amä tënë so, lo tene na Hushaï: “A yeke tongaso la mo yeke fa tâ ndoye na kamarade ti mo? Ngbanga ti nyen mo gue na peko ti kamarade ti mo ape?” 18  Hushaï atene na Absalom: “Ên-ën, mbi yeke na mbage ti zo so Jéhovah asoro lo, nga so azo so nga na azo ti Israël kue asoro lo. Mbi yeke ngbâ na terê ti lo. 19  Mbi kiri mbi tene: ‘Zo wa la mbi yeke sara kua na lo zo wa? A yeke na molenge ti lo ape? Mbi yeke sara kua na mo tâ gï tongana ti so mbi sara kua lani na babâ ti mo.’”+ 20  Absalom atene na Ahitophel: “Ti mo, nyen la a yeke nzoni mbi sara?”+ 21  Ahitophel atene na Absalom: “Lango na awali ti babâ ti mo ti use ndo+ so lo zia ala ti bâ ndo na ndö ti da*+ ti gbia so. Tongana azo ti Israël kue amä so mo ga tongana mbeni ye so afun sioni na hôn ti babâ ti mo, ala so amû mbage ti mo ayeke kiri ti wara ngangu.” 22  Tongaso, ala leke tente na Absalom na ndö ti da,+ na Absalom alango na awali ti babâ ti lo+ ni na lê ti azo ti Israël kue.+ 23  Na ngoi ni kâ, a bâ wango so Ahitophel+ ayeke mû tongana* tënë so alondo na yanga ti tâ Nzapa. A yeke nga tongaso la David na Absalom ayeke bâ na wango kue so Ahitophel amû.

Kete tënë

Mbilimbili alê ti figue nga peut-être atûmuru.
Wala “Âta.”
Wala “agi âme ti mbi.”
Wala “zo so David ayeke zi bê ti lo kue na lo.”
Wala “yangbo.”
Wala “ayeke tongana ti so zo ayeke hunda.”