Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 Samuel 11:1-27

LI TI ATËNË NI

  • David asara lango-sioni na Bath-Shéba (1-13)

  • David asara ti tene a fâ Urie (14-25)

  • David amû Bath-Shéba na wali (26, 27)

11  Na tongo nda ti ngu,* agbia ayeke gue ka ti sara bira. Tongaso, David atokua Joab, awakua ti lo nga na aturugu ti Israël kue ti gue ti futi azo ti mara ti Ammon. Ala sara camp na terê ti Rabbah,+ me David angbâ na Jérusalem.+  Mbeni lâ, na lakui,* David alondo na ndö ti gbogbo ti lo, lo yeke tambela na ndö ti da* ti lo ti gbia. Kâ, lo bâ mbeni wali so ayeke sukula ngu, wali ni ayeke pendere mingi.  David atokua mbeni zo ti gue ti hunda tënë na ndö ti wali ni. Zo ni aga atene na lo, atene: “Iri ti wali ni ayeke Bath-Shéba.+ Lo yeke molenge ti Éliam+ nga wali ti Urie,+ zo ti mara ti Heth.”+  Na pekoni, David atokua azo ti gue ti mû wali ni ti ga na lo.+ Tongana wali ni aga, David abungbi na lo.+ (Ye so asi na yâ ti ngoi so wali ni ayeke zi sioni ye na terê ti lo.)*+ Na pekoni, wali ni akiri na ndo ti lo.  Wali ni amû ngo. Lo tokua ndo na David, lo tene: “Mbi yeke na ngo.”  Tongana David amä tënë so, lo tokua ndo na Joab, lo tene: “Tokua na mbi Urie, zo ti mara ti Heth.” Tongaso, Joab atokua Urie na David.  Tongana Urie asi na ndo ti David, David ahunda lo wala Joab na tanga ti aturugu ni ayeke senge? nga bira ni kâ ayeke tambela tongana nyen?  Na pekoni, David atene na Urie: “Gue na yanga-da, mo wu terê ti mo kete* si.” Tongana Urie asigi na yâ ti da ti gbia ni, gbia atokua na lo mbeni matabisi.*  Me Urie angbâ alango gï na yanga ti da ti gbia ni, lo na azo ti kua ti seigneur ti lo kue. Lo gue na yanga-da ti lo pëpe. 10  Tongaso a tene na David, a tene: “Urie ague na yanga-da ti lo pëpe.” Na mango tënë so, David atene na Urie: “Mo londo na mbeni yongoro tambela la mo ga so ape? Mo gue na yanga-da ape ngbanga ti nyen?” 11  Urie akiri tënë na David, atene: “Sanduku+ ni nga azo ti Israël na ti Juda ayeke lango na gbe ti akpangba. Nga seigneur ti mbi Joab na awakua ti seigneur ti mbi ayeke lango na yâ ti ngonda. Tongaso, a yeke na lege ni ti tene mbi gue na yâ ti da ti mbi, mbi te ye, mbi nyon ye nga mbi lango na wali ti mbi?+ Ti tâ tënë ni, so mo yeke na fini,* mbi yeke gue pëpe!” 12  Na pekoni, David atene na Urie: “Mo ngbâ ge laso, na kekereke mbi yeke zia mo ti kiri.” Tongaso, Urie angbâ na Jérusalem na lango ni so nga na ndade ni. 13  David atokua a iri lo ti ga ti tene lo na lo ate ye na ala nyon ye. David asara si lo soulé. Me na lakui ni, Urie ague na yanga-da ti lo pëpe. Lo ngbâ lo lango na ndö ti gbogbo ti lo na terê ti azo ti kua ti seigneur ti lo. 14  Na ndapre, David asû lettre, lo zia ni na maboko ti Urie ti gue na ni na Joab. 15  Na yâ ti lettre ni, lo tene: “Zia Urie na devant na place so bira ni ayeke ngangu mingi dä. Na pekoni, ala zia lo gï lo oko na lê ni, tongaso si a fâ lo.”+ 16  Joab abâ gbata ni nzoni, na lo zia Urie na ndo so lo hinga so angangu zo ti bira ti awato ni ayeke dä. 17  Tongana aturugu ti gbata ni asigi ti tiri na Joab, ala fâ ambeni wakua ti David. Urie, zo ti mara ti Heth, ayeke nga na popo ti azo so akui.+ 18  Joab atokua mbeni zo na David ti fa na lo peko ti aye kue so asi na ngoi ti bira ni. 19  Lo tene na zo ti tokua ni, lo tene: “Tongana mo hunzi ti fa peko ti bira ni kue na gbia, 20  peut-être gbia ayeke sara ngonzo na lo tene na mo: ‘Ala gue tâ nduru na terê ti gbata ni ti tiri ngbanga ti nyen? Ala hinga pëpe so azo ayeke luti na ndö ti gbagba ni ti pika ala na akokora? 21  Zo wa la afâ lani Abimélek+ molenge ti Jérubbesheth zo wa?+ A yeke wali ape? Wali ni aluti na ndö ti gbagba, lo mû tênë ti nekango na ye si lo bi ni na li ti Abimélek, na Abimélek akui na gbata ti Thébez. Ala gue tâ nduru na terê ti gbagba ni ngbanga ti nyen?’ Na pekoni tene na lo, mo tene: ‘Wakua ti mo Urie, zo ti mara ti Heth, nga kue akui.’” 22  Tongaso, zo ti tokua ni atene na David atënë kue so Joab atokua lo ti tene na lo. 23  Na pekoni, zo ti tokua ni atene na David: “Aturugu ti ala ahon ndö ti e. Ala sigi ti tiri na e na yâ ti ngonda, me e tomba ala juska na yanga ti gbagba ti gbata ni. 24  Azo ti pikango akokora aluti na ndö ti gbagba ni ala pika awakua ti mo, na ambeni wakua ti gbia akui. Wakua ti mo Urie, zo ti mara ti Heth, nga kue akui.”+ 25  Na mango tënë so, David atene na zo ti tokua ni: “Tene na Joab: ‘Gi bê ti mo pëpe, ndali ti so azo ayeke kui ka na ngoi ti bira. Kiri mo tiri ngangu, mo mû gbata ni.’+ Nga mo tene na lo atënë so ayeke mû ngangu na lo.” 26  Tongana wali ti Urie amä so koli ti lo akui, lo sara mua ti koli ti lo. 27  Gï so ngoi ti sarango mua ni ahunzi, David atokua a mû wali ni a ga na lo na da ti lo. Lo ga wali ti lo,+ na lo dü na lo mbeni molenge ti koli. Me ye so David asara so ayeke sioni na lê ti Jéhovah.+

Kete tënë

So ti tene ti londo na milieu ti nze ti mars ti si na milieu ti nze ti mai.
Wala “tongana lakui apusu nduru.”
Wala “yangbo.”
Sioni ye ni ayeke peut-être bango yâ ti lo.
Na Hébreu: “mo sukula gere ti mo.”
Wala “part ti gbia,” so ti tene part so zo ti yambango agene atokua na gene so a ne lo mingi.
Wala “so âme ti mo ayeke na fini.”