Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 Pierre 2:1-22

LI TI ATËNË NI

  • Awafango ye ti wataka ayeke bâ gigi (1-3)

  • A yeke fâ ngbanga biani na li ti awafango ye ti wataka (4-10a)

    • A-ange so a bi ala na yâ ti Tartare (4)

    • Kota ngu ti ngoi ti Noé; Sodome na Gomorrhe (5-7)

  • Aye so a hinga na awafango ye ti wataka (10b-22)

2  Ye oko, tongana ti so aprophète ti wataka ayeke lani na popo ti azo ti Israël, awafango ye ti wataka ayeke duti ande na popo ti ala nga.+ Na mayele, azo so ayeke ga na asecte so ayeke ga na kuâ na zo si ala yeke lï na ni na popo ti ala, na ala yeke gue juska ti ke wa ti ala so avo ala vongo,+ si ala iri futingo hio tongaso na ndö ti ala wani.  Nga, azo mingi ayeke tï na peko ti asioni ye so ala yeke sara sân kamene,*+ na ndali ti ala, azo ayeke sara sioni tënë ti lege ti tâ tënë.+  Nga, na bê ti warango ye, azo so ayeke wara go na ndö ti ala na lege ti atënë so a ba yâ ni bango. Me ti azo so, ngbanga ti ala so a dë ni ândö awe+ ayeke ga yeke yeke pëpe nga futingo ti ala ayeke lango pëpe.+  Biani, Nzapa agbanzi lani terê ti lo pëpe ti punir a-ange so asara lani siokpari,+ me lo bi ala na yâ ti Tartare,*+ lo kanga ala na chaîne na yâ ti ndo* so avuko pitipiti ti bata ala ti ku na ngbanga.+  Nzapa agbanzi nga terê ti lo pëpe ti punir mbeni dunia ândö,+ me lo bata Noé, wafango tënë ti ye so ayeke mbilimbili,+ lo bata lo na ambeni zo mbasambala+ na ngoi so lo ga na kota ngu so apika na ndö ti mbeni dunia ti azo so akpe Nzapa pëpe.+  Nga, so lo sara si agbata ti Sodome na Gomorrhe aga mburu ti wâ, lo fâ ngbanga na ndö ti akodro so,+ si lo zia ni tongana mbeni tapande ndali ti azo so akpe Nzapa pëpe, tapande ti aye so ayeke ga.+  Me lo zi Lot+ so ayeke zo ti mbilimbili, lo so vundu asara lo mingi ndali ti asarango ye ti azo so ayeke buba ndia ti Nzapa si ayeke sara sioni ye sân kamene;*  biani, lâ na lâ so zo ti mbilimbili so ayeke sara kodro na popo ti ala, âme* ti lo so ayeke mbilimbili awu pono na lege ti ye so lo bâ nga so lo mä ndali ti sarango ye ti ala so ague nde na ndia.  Tongaso, Jéhovah* ahinga tongana nyen ti zi na yâ ti tara azo so avoro lo na bê ti ala kue,+ me lo hinga ti bata azo so ayeke mbilimbili pëpe ti ku na lâ ti ngbanga si a futi ala,*+ 10  mbilimbili ala so ague na peko ti mitele na nzara ti sara si mitele ni+ aga sioni na ala yeke bâ ala so akomande* na ndö ti ala tongana ambumbuse zo.+ Mbeto asara ala oko pëpe, li ti ala akpengba, mbeto asara ala pëpe ti tene asioni tënë na terê ti azo so Nzapa amû na ala gloire, 11  andâ a-ange, atâa so ala lingbi ti ala ti sara ye mingi nga ala yeke ti ala ngangu mingi, azia tënë na li ti awafango ye ti wataka so pëpe na tenengo asioni tënë; ala sara tongaso pëpe ndali ti so ala kpe mbeto ti Jéhovah.*+ 12  Me akoli so ayeke tongana anyama so ayeke na hingango ndo pëpe, anyama so a dü ala gï ti tene a gbu ala a fâ ala, a yeke futi ande ala na yâ ti sarango ye ti ala so alingbi na futingo ndali ti aye so ala hinga ni pëpe+ si ala yeke sara sioni tënë ni so; 13  ala yeke sara sioni na terê ti ala wani, so ayeke futa ti asioni ti ala la. Ala bâ ti ala sarango ye alingbi na anzara ti bê ti ala na kota lâ tongana ye so ayeke ga na ala ngia.+ Ala yeke asaleté nga asioni ye; na nzerengo terê kue, ala yeke bi terê ti ala na yâ ti afango ye ti ala ni so ahanda zo, na oko ngoi so ala yeke sara matanga legeoko na ala.+ 14  Lê ti ala asi singo na nzara ti gingo wali nde+ na ala zia lege ti siokpari gbä, nga ala yeke handa azo* so gere ti ala aluti kpô pëpe. Ala yeke na mbeni bê so a fa lege na ni ti sara bê ti ye. Ala yeke amolenge so a deba ala awe. 15  Ala dö nzoni lege azia awe, nga a hon na ala yongoro. Ala mû lege ti Balaam,+ molenge ti Béor, lo so andoye futa ti peko ti sioni sarango ye,+ 16  me a suku na lo ndali ti so lo doro ye so ayeke mbilimbili.+ Mbeni nyama ti yongo kungba so ayeke sara ka tënë pëpe asara tënë na lo na go ti zo nga akanga lege na ye ti buba so prophète ni aye ti sara so.+ 17  Azo so ayeke ali ti ngu so ngu ayeke dä pëpe, ala yeke ambinda so kota pupu ayeke hon na ni hongo, na a leke vukongo ndo ti bingo ti ku na ala.+ 18  Ala yeke tene atënë ti baba so aga na ye ti nzoni na zo pëpe, nga na lege ti anzara ti mitele+ nga na sarango ye ti sioni sân kamene,* ala handa ala so alondo ti sigi fafadeso na maboko ti azo so na lege ti sarango ye ti ala, ala girisa lege awe.+ 19  Atâa so ala mû zendo ti mû liberté na azo so, ala wani ayeke angbâa ti aye so abuba awe.+ Ndali ti so zo so mbeni zo ahon lo na ngangu, zo ni amû lo na ngbâa awe.*+ 20  Tâ tënë, tongana ala sigi awe na yâ ti asioni ye ti dunia so+ na lege ti tâ hingango ye na ndö ti Seigneur nga na Sauveur Jésus Christ, me ala kiri ala yôro terê ti ala na yâ ni si a mene ala kue, dutingo ti ala ti nda ni aga sioni mingi ahon ti kozoni.+ 21  A yeke fade nzoni mingi ndali ti ala tongana ala hinga nzoni pëpe lege ti mbilimbili, ahon ti tene na peko ti so ala hinga ni awe ala kiri atourné peko na commandement so ayeke nzoni-kue so a fa ni na ala.+ 22  Ye ni asi na ala alingbi na tënë ti mato so: “Mbo akiri na terê ti dengo ti lo wani, na mama ti cochon so a sukula lo awe akiri akpaka terê ti lo na yâ ti popoto.”+

Kete tënë

Grec: asélgéïa. Bâ na kete bakari.
A lingbi nga ti tene “lo zia ala na yâ ti kota dû.”
Grec: asélgéïa. Bâ na kete bakari.
Bâ na A5.
Na Grec: “a lungula ala.”
Ge, tënë “ala so akomande” andu Nzapa na azo so lo mû komandema na ala.
Bâ na A5.
Wala “a-âme.”
Grec: asélgéïa. Bâ na kete bakari.
Wala “zo so mbeni ye ahon lo na ngangu, ye ni amû lo na ngbâa awe.”