Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 Chronique 9:1-31

LI TI ATËNË NI

  • Gbia-wali ti Shéba aga ti bâ Salomon (1-12)

  • Kota mosoro ti Salomon (13-28)

  • Tënë ti kuâ ti Salomon (29-31)

9  Gbia-wali ti kodro ti Shéba+ amä tënë ti iri ti Salomon so awu mingi. Tongaso lo ga na Jérusalem ti tara Salomon na ahundango ndo so ayeke ngangu mingi.* Lo na gbâ ti azo* la aga. Lo ga nga na achameau so ayô mafuta ti keke ti baume, gbâ ti lor+ nga na atênë ti ngangu ngere. Lo gue na ndo ti Salomon, na lo fa na lo tënë ti ye kue so agbu bê ti lo.+  Salomon akiri tënë na ahunda ti lo kue. Mbeni tënë ti lo so a yeke ngangu na Salomon ti fa ndani* ayeke dä pëpe.  Gbia-wali ti kodro ti Shéba abâ ndara kue so Salomon ayeke na ni,+ da so lo leke,+  kobe so a zia na table ti lo+ nga na lege so lo leke ti tene awakua ti lo aduti na place ti ala. Lo bâ nga bongo so azo ti mungo kobe na zo ayeke yü nga na fason so ala yeke mû na kobe ni, azo so ayeke mû na lo ye ti nyongo ni na bongo so ala yeke yü nga na asandaga so a zö ni agbi kue so lo yeke mû ka lakue na da ti Jéhovah,+ li ti lo akpe kue.*  Lo tene na gbia, lo tene: “Tënë so mbi mä kâ na kodro ti mbi na ndö ti aye so mo sara* nga na ndara ti mo ayeke tâ tënë.  Me mbi yeda na ni pëpe juska mbi ga mbi bâ ni na lê ti mbi.+ Atënë so mbi mä na ndö ti kota ndara ti mo+ asi même ndambo ti ye so mbi bâ so pëpe. Kota ti mo ahon aye kue so mbi mä.+  Azo ti kodro ti mo nga na awakua ti mo so ayeke luti lakue na gbele mo ti mä ndara ti mo ayeke na ngia!  Jéhovah Nzapa ti mo aye mo mingi si lo zia mo na ndö ti trône ti lo ti komande na iri ti lo. Zia a sepela Jéhovah Nzapa ti mo! Nzapa ti mo aye azo ti Israël,+ na lo ye si kodro ti ala angbâ lakue lakue. Ni la lo zia mo gbia na ndö ti ala ti tene mo fâ ngbanga na lege ti mbilimbili.”  Na pekoni, gbia-wali ni amû na gbia talent* ti lor+ 120 nga na gbâ ti mafuta ti keke ti baume na atênë ti ngangu ngere. Gbâ ti mafuta ti keke ti baume so gbia-wali ti kodro ti Shéba aga na ni na Gbia Salomon so, a kiri a ga na mara ni gbani tongaso pëpe.+ 10  Awakua ti Hiram na ti Salomon so amû lor na kodro ti Ophir+ si aga na ni, a ga nga na akeke ti algoummim nga na atênë ti ngangu ngere.+ 11  Gbia amû akeke ni so lo sara na escalier ti da ti Jéhovah+ nga na ti da* ti gbia,+ lo leke nga na aharpe nga na ambeni ye ti mozoko so ayeke na kamba ndali ti azo ti hengo bia.+ Ade a bâ mara ti akeke ti algoummim tongaso na sese ti Juda pëpe. 12  Gbia Salomon amû na gbia-wali ti kodro ti Shéba ye kue so lo ye nga na ye kue so lo hunda. Aye ni ahon ati so lo ga na ni na gbia.* Na peko ti aye so, gbia-wali ni na awakua ti lo azia lo, ala kiri na kodro.+ 13  Lor so a yeke ga na ni na Salomon ngu oko oko ayeke talent 666.+ 14  A diko na yâ ni pëpe lor so lo yeke wara na maboko ti azo ti kango ye nga na ambeni zo ti dengo buze, wala lor na argent so agbia kue ti azo ti kodro ti Arabie nga na agouverneur ti kodro ti lo ayeke ga na ni.+ 15  Gbia Salomon aleke akota vala 200 na lor so a mélangé ni na ambeni ye+ (a zia sicle* 600 ti lor ni so na terê ti vala oko oko).+ 16  Lo leke nga akete vala* 300 na lor so a mélangé ni na ambeni ye (a zia mine* 3 ti lor na terê ti kete vala oko oko). Na pekoni gbia azia avala ni so na yâ ti da so a iri ni Gbako ti Liban.+ 17  Gbia aleke nga kota trône na pembe ti doli, na lo mû lor ti nzoni ni lo sara na terê ni kue.+ 18  Zo ayeke monté escalier omene si lo si na trône ni. A pika na terê ti trône ni mbata ti gere so a leke ni na lor. Aplace ti ziango maboko dä ayeke na terê ti trône ni mbage na mbage. A zia astatue ti bamara+ use so aluti na nduzu na terê ti amaboko ti trône ni mbage na mbage. 19  Astatue ti abamara+ 12 ayeke na ndö ti a-escalier ni na mbage ti yanga ni. Omene na mbage nga omene na mbage. Mbeni royaume ade asara mara ti ye tongaso pëpe. 20  Aye kue ti nyongo na ye ti Gbia Salomon, a sara ni na lor. A sara nga akungba kue ti yâ ti da so a iri ni Gbako ti Liban na lor ti nzoni ni. Mbeni ye so a sara na argent ayeke dä pëpe, ndali ti so na ngoi ti Salomon, a bâ argent tongana senge ye.+ 21  Gbia ayeke na abateau so ayeke gue na Tarsis,+ so awakua ti Hiram+ la ayeke kpe na ni. Fani oko na yâ ti ngu ota, abateau ti Tarsis ayeke yô gbâ ti lor, argent, pembe ti doli,+ amakako nga na apendere ndeke so a iri ala paon aga na ni. 22  Tongaso, Gbia Salomon ayeke na mosoro nga na ndara ahon tanga ti agbia ti sese kue.+ 23  Agbia ti sese kue ayeke gi lege ti bâ* Salomon ti mä atënë ti ndara so tâ Nzapa azia na bê ti lo.+ 24  Zo oko oko ayeke ga na lo acadeau: aye so a leke na argent nga na lor, bongo,+ aye ti bira, mafuta ti keke ti baume, ambarata nga na avuko kororo.* Ala yeke ga na aye ni so na lo ngu na ngu. 25  Salomon ayeke na ando ti lango 4 000 ndali ti ambarata nga na apuse ti mbarata ti lo, nga lo yeke na ambarata* 12 000.+ Lo zia ala na yâ ti agbata so a yeke bata apuse ti mbarata dä nga na ando so ayeke nduru na gbia na Jérusalem.+ 26  Salomon akomande na ndö ti agbia kue, ti londo na terê ti Ngu ti Euphrate juska na sese ti aPhilistin nga na yanga ti sese ti Égypte.+ 27  Gbia asara si argent ayeke mingi na Jérusalem tongana atênë so ayeke mingi na Jérusalem, nga lo sara si akeke ti cèdre ayeke mingi tongana akeke ti sycomore so ayeke na Séphélah.+ 28  A yeke mû ambarata na Égypte+ nga na tanga ti akodro kue si a ga na ni na Salomon. 29  Âdu ti tanga ti mbaï ti Salomon,+ ti londo na tongo nda ni juska na kongo nda ni, a sû ni na popo ti atënë ti prophète Nathan,+ na yâ ti prophétie ti Ahijah+ zo ti kodro ti Shilo nga na yâ ti atënë ti Iddo,+ zo ti fango peko ti avision so andu Jéroboam,+ molenge ti Nébat. 30  Salomon akomande na Jérusalem na ndö ti Israël kue ngu 40. 31  Na pekoni Salomon akui, na lo wu terê ti lo tongana ti akotara ti lo. A lu lo na yâ ti Gbata ti David babâ ti lo.+ Molenge ti lo Roboam aga gbia na peko ti lo.+

Kete tënë

Wala “aparabole.”
Wala “gbâ ti azo so atambela na molongo.”
Na Hébreu: “Mbeni tënë so akara Salomon.”
Na Hébreu: “yingo ti lo ayeke dä mbeni pëpe.”
Wala “atënë ti yanga ti mo.”
Talent oko ane kilo 34,2. Bâ na B14.
Wala “yangbo.”
A lingbi nga ti tene “Salomon amû na lo amatabisi so ngere ni alingbi terê na ati so lo ga na ni, me lo zia nga ambeni na ndö ni.”
Sicle oko ane gramme 11,4. Bâ na B14.
Akete vala so mingi ni azo ti pikango kokora la ayeke gbu ni.
Mine so a sara tënë ni na yâ ti mbeti ti Genèse ti si na Malachie, nengo ni oko alingbi na gramme 570. Bâ na B14.
Na Hébreu: “agi ti bâ lê ti.”
Na Hébreu: “a ye ti sara tënë ti nyama so kororo na mbarata si adü lo.”
Wala “azo ti kpengo na mbarata.”