Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 Chronique 30:1-27

LI TI ATËNË NI

  • Ézéchias asara Pâque (1-27)

30  Ézéchias atokua yanga na yâ ti kodro ti Israël+ nga na ti Juda kue, lo tokua même alettre na azo ti mara ti Éphraïm na ti Manassé,+ ti ga na da ti Jéhovah na Jérusalem ti sara Matanga ti Pâque na Jéhovah Nzapa ti Israël.+  Ye oko, gbia, azo ti lo so ayeke akota zo ti kodro nga na azo ti Jérusalem kue amû desizion ti sara Matanga ti Pâque ni na use nze ni.+  Ala wara lege lani ti sara ni na ngoi so a yeke sara ka na ni so pëpe,+ ndali ti so aprêtre so azi sioni ye na terê ti ala ayeke mingi pëpe+ nga azo abungbi terê na Jérusalem pëpe.  Desizion ni so anzere na gbia nga na azo ni kue.  Tongaso, ala mû yanga ti to mbela na sese ti Israël kue, ti londo na Béer-Shéba juska na Dan,+ ti tene azo aga na Jérusalem asara Matanga ti Pâque na Jéhovah Nzapa ti Israël. A ninga awe la ala bungbi kue pëpe ti sara Matanga ti Pâque tongana ti so Ndia afa.+  Tongaso, azo ti tokua* ni amû alettre ti gbia nga na ti azo ti lo so ayeke akota zo ti kodro, ala gue na ni na yâ ti kodro ti Israël nga na ti Juda kue, tongana ti so gbia ahunda. Ala tene: “Azo ti Israël, ala kiri na mbage ti Jéhovah, Nzapa ti Abraham, ti Isaac nga na ti Israël, tongaso si lo kiri na mbage ti tanga ti ala so akpe na maboko ti agbia ti Assyrie so.+  Ala sara ye pëpe tongana ti akotara ti ala nga na aita ti ala so asara ye lani na lege ni pëpe na mbage ti Jéhovah Nzapa ti akotara ti ala, na lo sara si ala ga mbeni ye so amû mbeto na zo, tongana ti so ala yeke bâ so.+  Ti fadeso, ala sara kpengba-li pëpe tongana ti akotara ti ala.+ Ala woko terê ti ala na gbe ti Jéhovah nga ala gue na ndo so ayeke nzoni-kue+ so lo zia ni nde teti lakue lakue nga ala sara na Jéhovah Nzapa ti ala, tongaso si ngonzo so asara lo ngangu na terê ti ala akaï.+  Tongana ala kiri na mbage ti Jéhovah, azo so amû aita ti ala nga na amolenge ti ala na ngbâa ayeke sara nzoni bê na ala+ nga ala yeke zia aita ti ala na amolenge ti ala ni ti kiri na kodro so,+ ndali ti so Jéhovah Nzapa ti ala ayeke Nzapa so ayeke bâ mawa ti zo* nga lo yeke sara nzoni bê na zo.+ Lo yeke bi lê ti lo yongoro na ala pëpe, tongana ala kiri na mbage ti lo.”+ 10  Tongaso, azo ti tokua* ni ague na yâ ti agbata oko oko kue ti sese ti Éphraïm na ti Manassé,+ ala si même na sese ti Zabulon. Me azo ni ahe ala nga adekongo na li ti ala.+ 11  Ye oko, ambeni zo ti mara ti Aser, ti Manassé na ti Zabulon asara terê ti ala kete na ala gue na Jérusalem.+ 12  Tufa ti tâ Nzapa ayeke na ndö ti azo ti Juda, a sara si ala bungbi oko* ti sara ye so Jéhovah atene na gbia na akota zo ti kodro ti mû yanga na ala ti sara ni. 13  Gbâ ti azo abungbi na Jérusalem na use nze ni+ ti sara Matanga ti mapa so a sara na levure pëpe.+ Azo so abungbi ayeke gbani gbani. 14  Ala londo ala zi agbalaka ti anzapa ti wataka so ayeke na Jérusalem.+ Ala zi nga agbalaka ti zongo na dukane kue,+ ala tuku ni na yâ ti Popo-hoto ti Cédron. 15  Na lango 14 ti use nze ni, ala fâ nyama ti sarango na Pâque ni. Kamene asara aprêtre na azo ti mara ti Lévi, tongaso ala zi sioni ye na terê ti ala nga ala mû anyama ti mungo na sandaga so a zö ni agbi kue ala gue na ni na da ti Jéhovah. 16  Ala duti na aplace so ala yeke duti ka dä, a lingbi na Ndia ti Moïse, zo ti tâ Nzapa. Na pekoni, aprêtre afi na ndö ti gbalaka mênë+ so ala wara na maboko ti azo ti mara ti Lévi. 17  Na popo ti azo so abungbi, azo mingi ayeke dä so azi sioni ye na terê ti ala pëpe. Tongaso azo ti mara ti Lévi la ayeke fâ anyama ti sarango na Matanga ti Pâque ndali ti azo kue so azi sioni ye na terê ti ala pëpe+ ti sara si ala ga nzoni-kue na lê ti Jéhovah. 18  Gbâ ti azo azi sioni ye na terê ti ala pëpe, me kamême ala te kobe ti Pâque, andâ a yeke ye so Ndia ake ni. A yeke mbilimbili azo so alondo na sese ti Éphraïm, ti Manassé,+ ti Issacar nga na ti Zabulon. Me Ézéchias asambela ndali ti ala, lo tene: “Zia Jéhovah, Nzapa so ayeke sara nzoni na zo,+ apardonné 19  zo kue so aleke bê ti lo ti gi tâ Nzapa,+ Jéhovah, Nzapa ti akotara ti lo, atâa so lo zi sioni ye na terê ti lo pëpe, tongana ti so Ndia ahunda ti tene zo asara si lo ga nzoni-kue.”+ 20  Jéhovah amä sambela ti Ézéchias na lo pardonné* azo ni. 21  A yeke tongaso si na nzerengo terê,+ azo ti Israël so ayeke na Jérusalem asara Matanga ti mapa so a sara na levure pëpe+ na yâ ti lango mbasambala. Azo ti mara ti Lévi na aprêtre ayeke sepela Jéhovah lâ na lâ, ala yeke pika aye ti mozoko ti ala ngangu ti sepela na Jéhovah.+ 22  Ézéchias asara tënë na azo ti mara ti Lévi so ayeke sara kua ti Jéhovah na ndara nga lo kpengba ala.* Na yâ ti lango mbasambala+ so ala sara Matanga ni, ala te ye, ala mû asandaga ti beoko+ nga ala kiri singila na Jéhovah Nzapa ti akotara ti ala. 23  Na pekoni, azo kue so abungbi amû desizion ti zia mbeni lango mbasambala na ndö ti lango ti matanga ni. Ni la ala kiri asara Matanga ni lango mbasambala na nzerengo terê.+ 24  Ézéchias gbia ti Juda amû ye ndali ti azo so abungbi. Lo mû abagara 1 000 nga na ataba 7 000. Akota zo ti kodro ni amû ti ala abagara 1 000 nga na ataba+ 10 000. Gbâ ti aprêtre la azi sioni ye na terê ti ala.+ 25  Azo ti Juda kue so abungbi, aprêtre, azo ti mara ti Lévi, azo kue so alondo na sese ti Israël aga,+ awande+ so alondo na sese ti Israël aga nga na ala so asara kodro na sese ti Juda angbâ ti sara matanga ni na yâ ti ngia. 26  A yeke lani ye ti kota ngia mingi na Jérusalem, ndali ti so ngbene ye na ngoi ti Salomon molenge ti David so ayeke lani gbia ti Israël, mara ti ye tongaso ade ti si na Jérusalem pëpe.+ 27  Na nda ni, aprêtre so ayeke azo ti mara ti Lévi aluti na nduzu, ala iri tënë nzoni na ndö ti azo ni.+ Nzapa amä go ti ala, nga sambela ti ala asi na yayu, ndo ti duti ti lo so ayeke nzoni-kue.

Kete tënë

Na Hébreu: “azo so ayeke gue tokua na loro.”
Wala “Nzapa ti grâce.”
Na Hébreu: “azo so ayeke gue tokua na loro.”
Na Hébreu: “a sara si bê ti ala aga oko.”
Na Hébreu: “sava.”
Na Hébreu: “lo sara tënë andu bê ti ala.”