Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 Chronique 29:1-36

LI TI ATËNË NI

  • Ézéchias aga gbia ti Juda (1, 2)

  • Aye nde nde so Ézéchias aleke yâ ni (3-11)

  • Lo zi aye ti sioni na yâ ti temple ni (12-19)

  • Akua ti yâ ti temple ni akiri alondo (20-36)

29  Ézéchias+ ayeke na ngu 25 na ngoi so lo ga gbia. Lo komande na Jérusalem ngu 29. Iri ti mama ti lo ayeke Abijah, molenge ti Zacharie.+  Lo ngbâ ti sara ye so ayeke na lege ni na lê ti Jéhovah,+ tongana ti so kotara ti lo David asara lani.+  Na yâ ti kozo ngu ti komandema ti lo, na kozo nze ni, lo zi ayanga ti da ti Jéhovah na lo kiri lo leke pekoni.+  Na pekoni, lo iri aprêtre na azo ti mara ti Lévi, na lo bungbi ala na lê ti kota lacour na mbage ti est.  Lo tene na ala: “Ala azo ti mara ti Lévi, ala mä mbi si. Ala zi sioni ye na terê ti ala+ nga ala sara si da ti Jéhovah Nzapa ti akotara ti ala aga nzoni-kue, na ala zi aye ti sioni so ayeke na ndo so ayeke nzoni-kue.+  Ababâ ti e amä lani yanga ti Jéhovah Nzapa ti e pëpe nga ala sara ye so ayeke sioni na lê ti lo.+ Ala dö Jéhovah ala zia, ala sara sanka ti tabernacle ti lo na ala tourné peko na lo.+  Ala kanga nga ayanga-da ti véranda+ ti temple ni nga ala mingo alampe.+ Ala zia ti zö dukane+ nga ti yâa na Nzapa ti Israël asandaga so a zö ni agbi kue+ na ndo so ayeke nzoni-kue.  Ni la, bê ti Jéhovah ason na terê ti azo ti Juda nga na ti Jérusalem,+ na lo sara si ala ga mbeni ye ti mungo mbeto na zo, mbeni ye so asara si li ti zo akpe nga lo gbu yanga ti lo,* tongana ti so ala yeke bâ na lê ti ala so.+  Ye so asara si a fâ akotara ti e na épée,+ a mû amolenge ti e ti koli, amolenge ti e ti wali nga na awali ti e a gue na ala na ngbâa.+ 10  Ti fadeso mbi ye ti te mbele na Jéhovah Nzapa ti Israël,+ tongaso si lo zia ti sara ngonzo ngangu na terê ti e. 11  Amolenge ti mbi, a yeke pëpe ngoi ti tene ala dö kua ti ala azia la,* ndali ti so Jéhovah asoro ala ti luti na gbele lo, ti sara kua na lo+ nga ti zö asandaga so a mû na lo.”+ 12  Na mango tënë so azo ti mara ti Lévi alondo ti sara ye. Ti ahale ti Kohath,+ a yeke Mahath molenge ti Amasaï na Joël molenge ti Azariah. Ti ahale ti Mérari,+ a yeke Kish molenge ti Abdi na Azariah molenge ti Jéhallélel. Ti ahale ti Guershon,+ a yeke Joah molenge ti Zimmah na Éden molenge ti Joah. 13  Ti ahale ti Élizaphan, a yeke Shimri na Jéuel. Ti ahale ti Asaph,+ a yeke Zacharie na Mattaniah. 14  Ti ahale ti Héman,+ a yeke Jéhiel na Shiméï. Ti ahale ti Jéduthun,+ a yeke Shémaïah na Uzziel. 15  Ala bungbi aita ti ala ndo oko, ala zi sioni ye na terê ti ala, na ala ga ti zi aye ti sioni na yâ ti da ti Jéhovah, a lingbi na tënë so Jéhovah atene si gbia amû yanga ti tene ala sara ni.+ 16  Aprêtre ague na yâ ti da ti Jéhovah ti zi aye ti sioni na yâ ni. Ala sigi na aye ti anzapa ti wataka kue so ala wara na yâ ti temple ti Jéhovah, ala tuku ni na lê ti lacour+ ti da ti Jéhovah. Na pekoni, azo ti mara ti Lévi amû ni ague atuku ni na yâ ti Popo-hoto ti Cédron.+ 17  Ala komanse kua ti zingo aye ti sioni ni na kozo lango ti kozo nze ni. Na lango miombe ti nze ni, ala si na véranda ti da ti Jéhovah.+ Ala mû lango miombe ti sara si da ti Jéhovah aga nzoni-kue. Na lango 16 ti kozo nze ni, ala hunzi kua ni. 18  Na peko ti aye so, ala gue na ndo ti Gbia Ézéchias na ala tene na lo: “E zi aye ti sioni na yâ ti da ti Jéhovah kue awe. E zi aye ti sioni na terê ti gbalaka ti zongo na asandaga+ nga na akungba kue ti kua ti gbalaka ni.+ E zi nga aye ti sioni na terê ti table ti mapa so a dö ni na ndö ti terê*+ nga na akungba ti kua ni kue. 19  Âdu ti akungba ti kua kue so Gbia Achaz adö ni azia na ngoi ti komandema ti lo na ngoi so lo sara ye na lege ni pëpe,+ e leke ni kue, e sara si a ga nzoni-kue+ na e zia ni na devant ti gbalaka ti Jéhovah.” 20  Gbia Ézéchias alondo hio na ndapre, lo bungbi akota zo ti gbata ni, na lo na ala ague na da ti Jéhovah. 21  Ala gue na akoli-bagara mbasambala, akoli-taba mbasambala, akete koli-taba mbasambala na akoli-ngasa mbasambala ti mû tongana sandaga ndali ti siokpari tënë ti kodro ni, tënë ti ndo so ayeke nzoni-kue nga tënë ti azo ti Juda.+ Lo tene na aprêtre, ahale ti Aaron, ti mû anyama ni so na sandaga na ndö ti gbalaka ti Jéhovah. 22  Tongaso, a fâ abagara ni,+ aprêtre amû mênë ni afi na ndö ti gbalaka.+ Na pekoni, ala fâ akoli-taba na ala fi mênë ni na ndö ti gbalaka. Ala fâ akete koli-taba ni na ala fi mênë ni na ndö ti gbalaka. 23  Ala ga na akoli-ngasa ti mungo na sandaga ndali ti siokpari na devant ti gbia nga na azo ti congrégation ni, ala zia maboko ti ala na ndö ti akoli-ngasa ni. 24  Aprêtre afâ akoli-ngasa ni, ala mû mênë ni ala yâa na sandaga ndali ti siokpari na ndö ti gbalaka, ti sara si a zi siokpari ti azo ti Israël kue, ndali ti so gbia atene sandaga so a zö ni agbi kue nga na sandaga ndali ti siokpari ayeke ndali ti azo ti Israël kue. 25  Andâ na ngoi ni so, lo hunda na azo ti mara ti Lévi ti luti na terê ti da ti Jéhovah na acymbale na maboko, na aharpe+ nga na ambeni ye ti mozoko so ayeke nga na kamba. Lo hunda na ala ti sara tongaso alingbi na commandement so David,+ Gad+ zo ti fango na gbia peko ti avision nga na prophète Nathan+ amû. Jéhovah la amû commandement ni na aprophète ti lo si ala fa peko ni. 26  Tongaso, azo ti mara ti Lévi aluti na aye ti mozoko ni na maboko ti ala, aye ti mozoko so David aleke lani, na aprêtre ayeke na atrompette na maboko ti ala.+ 27  Ézéchias amû yanga ti tene a zö anyama ni na sandaga na ndö ti gbalaka ni.+ Na ngoi so a komanse ti zö sandaga ni, a komanse nga ti he bia ti Jéhovah nga a hûru atrompette ni alingbi na totongo ti aye ti mozoko so David, gbia ti Israël, aleke. 28  Azo ti congrégation ni kue aba li ti ala na sese na ngoi so a yeke he bia ni nga atrompette ni ayeke toto. Aye ni ague tongaso juska a hunzi ti zö sandaga ni. 29  Gï so ala hunzi ti yâa sandaga ni, gbia na azo kue so ayeke na terê ti lo akuku, ala kpo li ti ala na sese. 30  Gbia Ézéchias na akota zo ti kodro ni atene na azo ti mara ti Lévi ti sepela Jéhovah na atënë ti bia ti David+ nga na ti Asaph+ zo ti fango peko ti avision. Tongaso, ala sepela Jéhovah na kota ngia na bê ti ala, nga ala kuku, ala kpo li ti ala na sese. 31  Na pekoni Ézéchias atene: “So fadeso a zia ala nde* ndali ti Jéhovah awe so, ala gue na da ti Jéhovah na asandaga nga na asandaga ti kiringo singila.” Tongaso, azo ti congrégation ni kue akomanse ti ga na asandaga nga na asandaga ti kiringo singila, nga zo kue so bê ti lo apusu lo ti mû ye aga na asandaga ti tene a zö ni agbi kue.+ 32  Wungo ti anyama so congrégation ni aga na ni ti tene a mû na sandaga so a zö ni agbi kue ayeke: abagara 70, akoli-taba 100, akete koli-taba 200. Anyama so kue ayeke ti tene a zö ni na sandaga na Jéhovah.+ 33  A mû nga abagara 600, ataba nga na angasa 3 000 ndali ti ambeni sandaga. 34  Me wungo ti aprêtre so alingbi ti zi poro ti anyama ti mungo na sandaga so a zö ni agbi kue ayeke mingi pëpe. Tongaso, aita ti ala azo ti mara ti Lévi amû maboko na ala+ juska kua ni ahunzi nga juska ti tene aprêtre ni azi sioni ye na terê ti ala awe si.+ Ti tâ tënë ni, wungo ti azo ti mara ti Lévi so ahinga atene* ala doit ti zi sioni ye na terê ti ala la ayeke mingi ahon ti aprêtre. 35  Anyama ti sandaga so a zö ni agbi kue ayeke mingi;+ amafuta ti anyama so a yeke mû na sandaga ti beoko+ nga na asandaga ti sämba so a yeke zia na terê ti asandaga so a zö ni agbi kue ayeke nga mingi.+ A yeke tongaso si a kiri na* akua so a yeke sara na da ti Jéhovah na place ni. 36  Ézéchias nga na azo kue ayeke na ngia mingi ndali ti ye so tâ Nzapa asara ndali ti ala,+ teti so aye ni so kue asi hio mingi.

Kete tënë

Wala “lo he azo.”
Wala “ala wu terê ti ala la.”
So ti tene mapa ti ziango ni na gbele Nzapa.
Na Hébreu: “So fadeso a mû lege na ala ti sara kua.”
Na Hébreu: “so bê ti ala ayeke mbilimbili.”
Wala “a leke.”