Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 Chronique 25:1-28

LI TI ATËNË NI

  • Amasiah aga gbia ti Juda (1-4)

  • Bira na azo ti Édom (5-13)

  • Amasiah avoro ayanda (14-16)

  • Bira na Joas, gbia ti Israël (17-24)

  • Tënë ti kuâ ti Amasiah (25-28)

25  Amasiah ayeke na ngu 25 na ngoi so lo ga gbia, na lo komande na Jérusalem ngu 29. Iri ti mama ti lo ayeke Jéhoaddan, zo ti Jérusalem.+  Lo ngbâ ti sara ye so ayeke na lege ni na lê ti Jéhovah, me lo sara ni na bê ti lo kue pëpe.  Gï so lo bâ so royaume ti lo aluti nzoni awe, lo fâ awakua ti lo so afâ lani babâ ti lo so ayeke gbia.+  Me lo fâ amolenge ti ala pëpe. Lo sara ye alingbi na tënë so ayeke na yâ ti mbeti ti Ndia so Moïse asû, so na yâ ni Jéhovah amû yanga, atene: “A lingbi ababâ awara kuâ pëpe ndali ti ye so amolenge ti ala asara, nga a lingbi amolenge awara kuâ pëpe ndali ti ye so ababâ ti ala asara. Zo oko oko ayeke wara kuâ ndali ti siokpari ti lo wani.”+  Amasiah abungbi azo ti Juda na ti Benjamin+ kue na lo hunda na ala ti luti alingbi na molongo ti akotara ti ala, na gbe ti amokonzi ti azo saki oko saki oko nga na amokonzi ti azo ngbangbo oko ngbangbo oko. Lo hunda si a sû na mbeti iri ti azo so ngu ti ala alondo na 20 ti gue na ni.+ Lo wara azo 300 000 so ayeke akpengba turugu,* so ahinga ti bi likongo nga ahinga ti gbu akota vala.  Lo mû nga talent* ti argent 100 lo futa na angangu turugu ti Israël 100 000 ti tene ala ga amû maboko na lo.  Me mbeni zo ti tâ Nzapa aga atene na lo: “Gbia, zia si aturugu ti Israël ague na mo pëpe, ndali ti so Jéhovah ayeke na azo ti Israël pëpe,+ lo yeke nga na mbeni zo ti Éphraïm pëpe.  Me mo wani mo gue. Mo sara bira ni nga mo sara mbeto pëpe. Tongaso pëpe, tâ Nzapa alingbi ti sara si mo tï na gbe ti wato, ndali ti so Nzapa ayeke na ngangu ti mû maboko na zo+ wala ti sara si zo atï.”  Na mango tënë so, Amasiah atene na zo ti tâ Nzapa, atene: “Ka kilo ti argent 3 420 so mbi mû na aturugu ti Israël so, mbi yeke sara na ni tongana nyen?” Zo ti tâ Nzapa ni atene na lo: “Jéhovah ayeke na ngangu ti mû na mo ye mingi ahon so.”+ 10  Tongaso, Amasiah atene na aturugu so alondo na Éphraïm aga na terê ti lo so ti kiri na ndo ti ala. Ye oko, aturugu ni asara ngonzo ngangu na terê ti aturugu ti Juda, na ala kiri na ndo ti ala na kota ngonzo na bê ti ala. 11  Amasiah azi mbeto na yâ ti lo, lo mû aturugu ti lo wani, lo gue na ala na Popo-hoto ti Ingo+ na lo fâ aturugu ti Séir+ 10 000. 12  Aturugu ti Juda agbu ambeni turugu ni 10 000 na fini lê ti ala. Ala gue na aturugu ni na li ti mbeni kota tênë, ala pusu ala kâ ala tï na gbe ni, na yâ ti ala kue afâ kete kete. 13  Me aturugu so ague fade ti mû maboko na Amasiah na yâ ti bira si lo tene na ala ti kiri so,+ ala gue alï na bira na yâ ti agbata ti Juda, a komanse na Samarie+ juska na Beth-Horon.+ Ala fâ azo 3 000, nga ala gbu gbâ ti akungba. 14  Me tongana Amasiah akiri na peko ti so lo gue lo fâ azo ti Édom, lo mû anzapa ti azo ti Séir lo ga na ni. Lo kpo anzapa ni so na nduzu si ala ga tongana anzapa ti lo.+ Lo komanse ti kuku na gbe ti ala na ti zö na ala asandaga. 15  Ngonzo asara Jéhovah ngangu na terê ti Amasiah, na lo tokua mbeni prophète so ague atene na lo: “Anzapa so asö azo ti ala na maboko ti mo ape so, mo mû peko ti ala ngbanga ti nyen?”+ 16  Na ngoi so prophète ni ayeke sara tënë na gbia, gbia atene na lo: “Eskê e la e zia mo zo ti mungo wango na gbia?+ Kanga yanga ti mo!+ Mo ye ti tene a fâ mo ngbanga ti nyen?” Prophète ni akaï, me lo tene: “So mo sara ye so nga mo mä wango ti mbi ape so, mbi hinga so Nzapa amû desizion awe ti futi mo.”+ 17  Na pekoni, Amasiah gbia ti Juda amä terê na azo ti mungo wango na lo, na lo tokua ndo na Joas, molenge ti Joachaz molenge ti Jéhu so ayeke lani gbia ti Israël, lo tene: “Ga e sara bira na popo ti e.”*+ 18  Joas gbia ti Israël atokua azo na Amasiah gbia ti Juda, lo tene: “Keke ti sisi so ayeke na kodro ti Liban atokua ndo na keke ti cèdre so ayeke na kodro ti Liban, atene: ‘Mû molenge ti mo ti wali na molenge ti mbi ti ga wali ti lo.’ Me mbeni sioni nyama ti Liban ahon na terê ti keke ti sisi ni na lo dö yâ ni. 19  Mo tene: ‘Mbi* sö benda na ndö ti azo ti Édom.’+ Baba alï mo, na mo ye ti tene a gonda mo. Me ngbâ na yâ ti da* ti mo. Ngbanga ti nyen mo yeke gi ye ti ngangu na ndö ti mo si mo na azo ti Juda kue atï?” 20  Me Amasiah ake ti mä tënë so,+ ndali ti so tâ Nzapa la aye ti zia lo na maboko ti wato,+ ngbanga ti so ala mû peko ti anzapa ti Édom.+ 21  Tongaso, Joas gbia ti Israël ague, na lo na Amasiah gbia ti Juda asara bira na popo ti ala na gbata ti Beth-Shémesh,+ so ayeke na sese ti Juda. 22  Azo ti Israël asö benda na ndö ti azo ti Juda, tongaso zo oko oko akpe akiri na yanga-da* ti lo. 23  Joas gbia ti Israël agbu Amasiah gbia ti Juda, molenge ti Joas so ayeke molenge ti Joachaz,* na gbata ti Beth-Shémesh. Na pekoni lo gue na Amasiah na Jérusalem, lo kungbi mbage ti gbagba ti Jérusalem ni ayo coudée 400,* a londo na yanga ti gbagba ni so a iri ni Yanga-ti-gbagba-ti-Éphraïm+ a si na ti so a iri ni Yanga-ti-gbagba-ti-Coin.+ 24  Lo mû lor na argent kue, akungba kue so ayeke na yâ ti da ti tâ Nzapa nga na Obed-Édom.* Lo mû nga ati so ayeke na yâ ti ando ti batango amosoro ti da* ti gbia.+ Lo gbu nga ambeni zo na ngangu ti tene a futa mbeni ye na lo awe si lo zi ala. Na pekoni lo kiri na Samarie. 25  Amasiah,+ molenge ti Joas so ayeke lani gbia ti Juda, angbâ na fini ngu 15 na peko ti kuâ ti Joas,+ molenge ti Joachaz so ayeke lani gbia ti Israël.+ 26  Âdu ti tanga ti mbaï ti Amasiah, ti londo na tongo nda ni juska na kongo nda ni, a sû ni na yâ ti Mbeti so afa tënë ti gigi ti agbia ti Juda na ti Israël. 27  Ti londo na ngoi so Amasiah atourné peko na Jéhovah ti ga na ni, azo amä terê+ ti fâ lo na Jérusalem, na lo kpe lo gue na gbata ti Lakish. Me ala tokua azo na peko ti lo na Lakish, na azo ni afâ lo kâ. 28  Ala mû kuâ ti lo na ndö ti mbarata ala kiri na ni, na a lu lo na terê ti akotara ti lo na gbata ti Juda.

Kete tënë

Na Hébreu: “aturugu so a soro ala.”
Talent oko ane kilo 34,2. Bâ na B14.
Wala “e tingbi terê lê na lê.”
Na Hébreu: “Mo.”
Wala “yangbo.”
Na Hébreu: “tente.”
A iri lo nga Achaziah.
Mètre 178 tongaso. Bâ na B14.
Wala “so Obed-Édom ayeke bâ ndo na ndö ni.”
Wala “yangbo.”