Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

2 Chronique 19:1-11

LI TI ATËNË NI

  • Jéhu asuku na Josaphat (1-3)

  • Ambeni ye so Josaphat aleke yâ ni (4-11)

19  Na pekoni, Josaphat gbia ti Juda akiri na yanga-da* ti lo na Jérusalem na nzoni terê.*+  Jéhu+ molenge ti Hanani,+ zo ti fango peko ti avision, aga awara Gbia Josaphat na lo tene na lo: “Zo ti sioni la mo yeke mû maboko na lo?+ nga azo so ake Jéhovah la mo yeke ndoye ala?+ Ye so asara si bê ti Jéhovah ason ngangu na terê ti mo.  Ye oko, a bâ ambeni nzoni ye so mo sara;+ na tapande mo zi na yâ ti kodro ni ayongoro yanda* nga mo leke bê ti mo* ti gi tâ Nzapa.”+  Josaphat angbâ ti sara kodro na Jérusalem, me lo kiri lo gue na popo ti azo, a londo na Béer-Shéba juska na ndo so ahoto ayeke dä na Éphraïm,+ ti sara si ala kiri na mbage ti Jéhovah Nzapa ti akotara ti ala.+  Lo zia nga ajuge na yâ ti agbata kue ti Juda so ngangu gbagba ayeke na terê ni na yâ ti kodro ni kue.+  Lo tene na ajuge ni: “Ala sara hange na kua so ala yeke sara so, ndali ti so ala yeke fâ ngbanga na iri ti zo pëpe me na iri ti Jéhovah. Lo yeke na ala na ngoi so ala yeke fâ ngbanga.+  Tongaso ala sara mbeto ti Jéhovah.+ Ala sara hange na kua so ala yeke sara, ndali ti so Jéhovah Nzapa ti e ayeke fâ ngbanga mbilimbili,+ lo yeke sara kangbi na popo ti azo pëpe+ nga zo ayeke pete goro na lo pëpe.”+  Na Jérusalem, Josaphat azia nga ambeni zo ti mara ti Lévi, ambeni prêtre nga na ambeni mokonzi ti ahale ti akotara ti azo ti Israël ti sara kua ti juge na iri ti Jéhovah nga ti leke atënë ti azo ti Jérusalem.+  Lo mû yanga na ala, lo tene: “Tongana ala kpe mbeto ti Jéhovah, ala yeke be-ta-zo nga bê ti ala ayeke use use pëpe,* a yeke nzoni ala sara ye tongaso: 10  Lakue tongana aita ti ala alondo na yâ ti agbata ti ala aga na ala mbeni tënë so andu tënë ti tukungo mênë,+ wala tënë ti mbeni ndia, mbeni commandement, andia so ayeke fa lege na zo, wala ambela, a lingbi ala gboto mê ti ala; tongaso si ala duti na tënë na li ti ala na gbele Jéhovah pëpe. Tongana ala sara tongaso pëpe, bê ti lo ayeke son ngangu na terê ti ala nga na aita ti ala. A yeke nzoni ala sara ye so si ala wara tënë pëpe. 11  Bâ kota prêtre Amariah la. Lo yeke na ndö ti ala na yâ ti atënë kue so andu kua ti Jéhovah.+ Zébadiah molenge ti Ismaël ayeke mokonzi ti ahale ti Juda na yâ ti atënë kue so andu kua ti gbia. A zia azo ti mara ti Lévi na ndö ti ala. Zia ala sara ye tongana koli nga zia Jéhovah aduti na azo kue so asara ye so ayeke nzoni.”*+

Kete tënë

Wala “yangbo ti gbia.”
Wala “na siriri.”
Wala “mo mû bê ti mo kue.”
Wala “ala mû bê ti ala kue na lo.”
Wala “aduti na ye so ayeke nzoni.”